男人四十先箍牙 (八十七)

[26.08.2014] – week 124 – aligner (29 + 23/32)

如果呢度有人等我更新blog, 等到變化石, 我只能講萬分抱歉…

無錯, 近半年我真係懶寫blog… 除左返工, 空閒時間唔係去玩興趣, 就係去識女仔, 希望大家原諒我, 我依家成四十歲人都未有女友… 實在應該係先做正經事, 再寫blog的… 係咪?

眼見一日過一日, 個blog日日都keep住有固定page view, 我就感覺到, 真係有人默默咁支持緊我, 希望我分享多啲箍牙經驗…

不過老實講, 箍左都兩年幾… 真係已經無乜特別野可以寫, 有時甚至可以講, 箍到麻木晒… 牙箍變左我老朋友, 有時戴箍除箍, 自然到唔需要特別去記住…

由於我既食飯時間極度唔穩定… 同戴箍時間唔夠22小時一日… 我通常會箍2星期零3日… 即係一共17日… 枉費左診所姑娘親手幫我編好晒既換箍日期(14日)… 我會用筆重新編排一次… 寫返落個箍袋, 然後在手機上set好換箍日期提示… 咁就唔驚過期唔記得換箍…

今個星期換左新箍(23號)… 竟然箍左兩日仲覺得好緊… 好鬼酸軟… 攪到連切開既蘋果都趙唔係好到… 我已經連續幾日食蘋果做晚餐… 換箍前後分別真係好大… 之前仲可以shock shock聲咁趙蘋果, 換左箍後… 就只有吞蘋果… 好似蛇咁…

至於點解食蘋果做晚餐… 都係為左清下腸胃, 皆因成日返大陸同啲同事大吃大喝, 多鹽多油, 真係肥左好多, 個肚… 趁夜晚, 有心情, 有少少毅力就自己斷下肉… 食下蔬果… 留返啲quota去大陸食

另外, 踩左兩年既小單車… 終於換左部大單車… 又有新屎坑令自己個個星期六都去踩下車, 運動下… keep下fit…

上星期同朋友去踩單車, 朋友幫我影左啲相, 後尾放在facebook tag返返俾我睇… 原來我踩車途中經常都開心笑, 露出牙齒, 睇返相我自己都覺得靚…

以前… 朋友幫我影既相, 如果見牙既… 我通常都會覺得難睇, 好想快d delete左佢, 特別係在facebook上tag我名… 我會好快咁untag左佢, 驚死俾人見到棚亂七八糟既哨牙 >_<

bike invisalign

好啦, 時間都唔早, 又打住咁多先… 聽日又要返大陸工作了!

真心希望下篇唔駛再等一個月… 否則我好驚箍完都寫唔夠100篇 xddddd…

(待續…)

男人四十先箍牙 (八十六)

[24.07.2014] – week 119 – aligner (29 + 21/32)

原本打算星期一覆診完畢, 就打blog… 可惜睇完醫生都成十點半, 返到屋企已經太攰… 第朝一早又返大陸… (下刪一萬個理由), 最終拖到今晚先的起心肝打blog…

去到今時今日, 箍牙生活已經踏入最後直路… 只剩十個咋…

星期一晚, 約左夜晚十點鐘… 公司唔太多野做, 仲有時間返屋企食飯換衫沖涼刷牙,先再出返去睇醫生

九點九去到診所, 今晚出奇地少人… 平日坐得滿滿既等候室, 只得小貓三隻, 加埋我就四隻…

果然, 等左唔夠10分鐘, 就已經可以見醫生…

已經記唔起, 上次黎係幾時… 大約都已經有三個月…

護士安排左我坐上治療椅, 牆上大電視顯示住我兩年幾前既相片, 當日既我… 影左正面, 側面既相, 仲要依起棚哨牙笑…

當年仲係發福中年… 睇住當年滿臉」福相」既我, 我真係好想叫姑娘」轉台」…

另外, 大電視上亦顯示住我當年口腔照… 已經唔多記得, 原來當年既我… 牙弓係一個好尖既V字…

兩年時間, 真係過得好快… 回想起, 當年諗… 唔知箍兩年時間點過… 點知… 無啦啦就已經過左兩年…

但仲未箍完 =____=」

正當腦裡響起薰妮既」懷念過去常陶醉一半樂事一半令人流淚」既旋律… 醫生就突然係我後面打招呼…

佢第一句就話: 「嘩, 你做咩攪成咁呀?」

其實呢句說話, 我近期都成日聽… 因為近期多左個興趣, 個個星期日去射箭, 所以, 曬到成舊炭咁黑…

我以為醫生驚嘆我一臉古銅色既肌膚… 點知, 佢第二句就話… 「你啲頭髮…」

醫生, 又講中一眾中年男人既死穴… 我心諗… 死? 唔係佢見我後尾枕好稀薄下嘛?! 雖然, 我仍覺得自己算係同年齡之中頭髮濃度同髮線適中…

我連忙: 「下?… 咩呀? 唔好嚇我喎…」

好彩, 最後醫生講左話: 「你多左好多白頭髮喎!」

我即刻個心舒暢晒… 証明, 白頭髮對中年男人唔係咩致命傷… 有時, 多左白頭髮, 倍添幾分滄桑感… 可能對中年男人黎講, 仲添多幾分魅力…

好… 自high說話唔好多講… 講返正題…

醫生例牌同我傾下啲牙既狀況, 例如咬食有冇問題, 換箍有冇痛之類… 基本上, 我每次答案都雷同及巧合, 都係答相同…

講到橡筋問題, 我話俾醫生聽, 我已經好多次冇用橡筋… 正當有千言萬語既怨言湧上心頭, 準備講之際… (想話俾醫生聽近期根本戴唔到橡筋, 及不斷被橡筋彈親牙肉)

醫生就同我講, 都唔駛再戴橡筋了, 啲牙都好齊下了… (個心團火即刻淋熄左)

聽到醫生咁講, 當然有無形既開心… 一來聽到以後唔戴加橡筋, 又唔駛煩, 二來聽到醫生都話啲牙齊… 唔開心就假…

之後, 醫生再檢查牙石… 話我再有改善了, 上兩三次, 真係啲牙石多到俾佢奚落… 上一次, 已經話我改善左… 今次, 連我自己都覺得好少好少… 最後, 醫生都好心再幫我洗埋呢三個月, 僅僅積左既少少牙石… 洗左約半分鐘… ok啦!

洗完牙之後, 醫生再同我講左句… 「咦? 你啲頭髮少左咁多既…?」

=_______=」 大佬, 呢句好致命喎…

原來, 佢係望到個電視上面, 兩年前既我… 當年, 我個髮型仲係斯文教師西裝分界look, 的確… 係幾厚下…

如今, 我原來已經同醫生剷到一樣高既青… 呢啲就係醫生講既」少頭髮」… 嚇得我丫…

醫生今次再俾多六套新箍我… 我再下次黎, 將會係10月幾既事了…

醫生話, 箍完牙就要做retainer了…

我心諗, 其實… 都仲有一大段日字喎… 連埋21號, 一共有12個… 攪得黎, 我都41歲生日了! 呵… 真係前後渡過4個生日…

最後, 姑娘好好心機咁俾左6套新箍俾我…

仲幫我順序將啲膠袋釘埋一齊, 仲叮囑我小心被啲釘吉親… 哇… 咁好態度, 又細心, 真係有少少鍾意左佢…

唔知係唔係時日無多… 我臨離開診所, 竟然有少少唔捨得… 覺得間診所好溫暖, 醫生好風趣, 啲姑娘好親切, 啲病友好靚…

(待續…)

男人四十先箍牙 (八十五)

[29.06.2014] – week 116 – aligner (29 + 19/32)

本blog又休息左6星期無寫… 真係唔好意思… 戴箍已經無乜特別事好寫… 事實呢6星期真係忙, 忙工事, 亦忙認識女仔… 其他時間, 主要都係新興趣射箭(真架), 同釣魚(手機遊戲)

上兩星期, 發生左件事… 其實應該寫blog, 不過真係無時間, 所以… 一直延遲到今日放假, 兼夜晚無街去… 先乖乖坐定定寫下blog…

件事, 源於我老細同我一齊有個新興趣, 就係射箭… 有一晚, 我地一齊去睇射箭用品… 之後一齊去食飯…

食飯例牌動作, 我就係偷偷地去廁所除箍… 到而家, 我一直都無對任何同事講我箍牙既事… 除左有一次在廁所被一個同事撞破外, 其他時間, 我箍牙一直都係一個在公司既小秘密…

當我除完牙箍, 出返黎坐低既時候… 我老細突然問左我一個問題… 就係…

「你箍左幾耐?」

我老細呢一問… 其實都令我有啲突然…

我老細都留意到我臉色噩然, 所以佢補左一句… 佢以前都箍過invisalign, 所以好耐之前已經留意到我有戴箍架啦… 只係無特別出聲…

當呢個小秘密被識穿, 我地交換左好多箍牙既趣事… 同埋, 我老到而家都繼續有戴retainer, 佢係戴膠既, 都爛過兩次, 又要再換… (我雖然未到戴retainer時間, 但我都已經諗好左戴金屬版喎, 訓覺戴, 唔駛透明啦 :P)

原來我老細以前門牙有條隙, 影相笑都特別尷尬… 佢都係三十頭先箍… 箍完牙, 而家已經被喻為公司數一數二最靚仔既同事, 真係幸福, 你話啲牙靚幾大影響呢…

其實, 我地亦都傾左唔少追女仔心得… 估唔到, 講箍牙… 兜兜轉轉都係去呢個話題, 哈哈!

最後, 分享一樣奇怪既問題… 我唔肯定關唔關箍牙事… 就係… 我發覺我將口盡打開(最大最大)既時候, 感覺好緊, 同好攰… 唔知係唔係牙弓型狀改變左既關係? 定係我咀嚼既方式, 呢兩年改變太大? 引致某部份肌肉退化左呢?! Orz…

(待續…)

男人四十先箍牙 (八十四)

[19.05.2014] – week 110 – aligner (29 + 17/32)

今日打blog, 先發現原來跳左一個箍無寫(#16)… 上一篇都已經成個月之前寫了…

真係唔好意思, 最近忙工作, 有新老細上場, 新官上任, 真係報侍佢都花凸好多時間… 另外, 亦忙識女仔, 雖然牙齒齊左係增強信心不少, 畢竟在下年紀都唔細, 又唔係高帥富, 所以… 暫時仍在食白果, 連追都無機會追… orz

如果唔係連日受」橡筋困擾」, 可能呢篇blog有排都唔會出現…

講到橡筋… 自從前幾日換左#17號箍後, 每日例必受橡筋彈牙肉之痛…

原因係, 呢個箍, 下排既像筋扣位, 好似印得唔好… 凹位好淺, 稍為郁動下… 就會拍一聲, 橡筋應聲向上彈, 彈落啲牙肉度, 真係痛死…

rubber_lock
(上圖: 淺左既凹位, 下圖: 正常凹位)

經過幾日既無故驚嚇事件, 我決定呢set箍唔用橡筋了… 又無理由用一邊, 唔用一邊掛?

(待續…)

男人四十先箍牙 (八十三)

[20.04.2014] – week 106 – aligner (29 + 15/32)

happy_anniversary_2nd

話咁快, 箍左牙兩年了… 剛好復活節假期… 飲食活動多左, 同朋友食飯… 唔方便又戴又除… 有時一除就除兩三個鐘… 我估一日可能只係戴左16-18小時… 睇黎, 呢個箍要延長多幾日先得了…

不過佳節流流… 唔理得咁多了, 最緊要都係自由自在地過… 箍牙… 唯有適量延長啦 T_T

祝大家都有一個愉快既復活節假期!

(待續…)

男人四十先箍牙 (八十二)

[12.04.2014] – week 104 – aligner (29 + 15/32)

經過一星期既刻苦工作, 在工作上與同事周旋了近整個星期… 可能文化, 眼界與價值觀的不同… 要令每事都進行得暢順無阻, 認真讓每刻心力交悴…

難得捱到週末, 去街的心情沒有了… 反而早上跟在trip中同事(whatsapp上)討論了上週出現了的問題… 計劃了下週的工作…

我記得, 4月16日… 就會是箍牙的2週年紀念了… 一如上年, 我會進行漢堡包測試… 來認真感受下弧形牙弓的可愛…

但4月16我將會在大陸… 只怕不太方便, 趁今日沒什麼心情去街… 就去了樓下的麥當勞買個雙層芝士孖寶餐回家食…

大概… 香港的淪陷日子不遠, 麥當勞迫滿人… 一眾麥記員工, 以至麥記經理都忙到頭昏腦漲… 麥記經理甚至以近」失控」的態度跟操大陸口音的師奶對答… 大概也是因為大陸師奶的stupidity, 令本來已忙得透不過氣的經理添上無謂煩惱…

突然, 我發覺… 原來我既EQ其實唔低… 起碼… 在處理stupidity環境, 我仍能保持到」不失控」…

今次既漢堡包測試… 效果並無2013年度咁明顯… 牙弓(特別係上排)擴闊左不少…

2014_mcdonalds_test

睇返上年4月既blog (男人四十先箍牙-五十一), 仲滿以為過去既2月能順利完成整個箍牙療程…

點知… 一年後既今日… 仲剩17個箍未上… 即係… 起碼都仲有近一年時間箍呀… 真係一年又一年… 等到2015… 好彩我又唔係真係咁急…

(待續…)

男人四十先箍牙 (八十一)

[06.04.2014] – week 104 – aligner (29 + 14/32)

前排話會密啲打blog, 點知今日一睇… 轉眼又過左兩個星期… 光陰真係唔等人… 時間過得咁快, 容乜易就退休…

雖然遲左, 都要講返星期一換箍既情況…

約左醫生夜晚十點檢查/加拎新箍… 無錯, 係夜晚十點… 因為我怕返工要OT或返左大陸, 約夜晚十點比較穩陣… 臨去之前仲抱有一線希望, 咁夜應該少人啲, 點知去到… 成個等候室都係坐滿晒人…

今次好少少, 成個等候室廿人左右… 有3個男性… 1個係陪女朋友, 1個就廿歲中左右… 另1個, 就係壯年組既我… 可能太耐冇去覆診了… 攝入一個充滿女仔既房間, 心裡面又不禁氾起一陣尷尬…

我九點九左右去到, 等下等下… 20分鐘後就輪到我… 都已經算好準時了!

醫生既閒話家常, 今次劈頭第一句… 就係問我… 「喂, 你尋晚去左邊?」

嘩, 大佬… 我真係即時O左咀… 唔識答, 本人記性唔太好, 平日節目咁平淡, 所以你問我尋晚食左乜, 去左邊… 我真係一下子好難up得出… 我好自然地反應: 「唔記得喎!」

呢個答案, 連我自己都接受唔到… 不過醫生其實都無理我, 原來佢目的, 主要係問我有冇見到落雹… 佢咁講落, 我又的確有見証呢個千年難得一見既moment, 回想起上一晚, 我的確在晚飯回家時, 被淋到落湯雞之際, 忽然簷逢間砰砰拍拍地有啲bb彈既物體酒落黎… 足足有5至10秒咁耐…

一睇之下… 哇… 原來係冰雹, 成地都係, 我住深水埗, 真係估唔到市區都會出現落雹…

(已經拉到好遠, 我講返醫生果邊先…)

原來醫生想話我知, 佢尋晚都瀨左野, 渣車出街時… 天空落起冰雹, 打到佢架車花晒… T_T

我諗, 佢都應該好傷心下… 靚車喎… 我印像中佢有部渣法拉利… (曾幾何時在whatsapp/wechat/line? 見過佢張車相)

好, 終於言歸正傳… 醫生話… 我棚牙都冇乜野要攪了, 都係磨少少虛位, 清下牙石就OK…

我話俾醫生知, 我而家每副箍都用兩個幾星期… 醫生不經意咁回左句, 話… 戴到牙箍貼服就可以了… 我估, 大約佢講緊俾我知… 其實唔駛睇日期, 自己都感覺到幾時需要換箍既… 我都大大話話戴左兩年箍, 果種感覺的… 我懂的… 不過, 我又唔多急, 同埋… 我啲牙箍, 我自己重新mark過時間… 所以, 為左方便, 我暫時, 每副箍都會戴兩個星期零三日…

前兩日, 照鏡時… 留意到… 啲牙漬越黎越深了(仲要在啲牙既咀嚼面, 同牙背, 感覺超難清洗)… 可能平日飲得咖啡奶茶多, 真係幾難睇下… 唔知做藍光, 會唔會改善到呢… 不過真係要等到箍完晒先做…

DSC_1997r
(在診所既冷氣見到呢包香薰, 都幾好聞, 有機會買返包回家聞下)

(待續…)

男人四十先箍牙 (八十)

[23.03.2014] – week 102 – aligner (29 + 14/32)

最鍾意就係週末, 無乜特別野做… 可以訓到自然醒…

今朝九點零, 太陽從窗簾間滲進房內… 感覺好溫暖… 當然, 另一原因, 係我貓星主人仍然懶左在我枕頭上…

自從入冬以來, 我家主人對我寸步不離, 由梳化, 電腦椅, 直至床上都鍾意黐住我… 凍既日子, 主人會訓入我被窩內, 好似今日無咁凍, 佢就鍾意訓枕頭…

想起近日在網上見到一張貓貓鍾意同主人一齊睡枕頭既漫畫… 我就隨手拎起部電話, 同主人黎張selfie… 影返同一個feel, 我自己都好鍾意張相, 連忙開心share到facebook上…

無心插柳, 竟然收到唔少既like同留言…

最令我感動既說話… 莫過於有朋友讚我啲牙靚@_@」, 仲唔止一個… 我期待左四十年既聲音,  差啲感動到喊出來… 我發夢都無諗過會有人讚我牙靚… T_T

細心睇返張相… 陽光打落新牙箍度(尋晚先換架), 啲牙顯得特別雪白… 留心啲, 仲會睇到牙箍既像筋都係度添!

20140323

(待續…)

男人四十先箍牙 (七十九)

[08.03.2014] – week 99 – aligner (29 + 13/32)

今日換新箍時, 相比左一下新箍同舊箍既色澤… 真係嚇左一跳… 舊箍#12號, 用左只係約兩個半星期… 拼埋雪白既新箍上! 竟然黃到有點恐怖…

只怪我近呢兩個星期, 間中都會偷下懶, 唔除箍就飲奶茶或有色飲品… 雖然我飲完之後都會飲大量清水, 期望會將啲殘留既飲品顏色, 特別係糖份沖走, 以免染色或引致蛀牙…

不過, 事實証明… 係冇用既! 以往換箍, 雖然個箍都係好明顯黃左, 但今次真係黃得太恐怖… 我影左相, 不過以免影響各位網友食慾, 都係係留返俾自己睇, 不時警剔下自己唔好再咁貪飲貪食… 一來對牙齒唔好, 二來… 事實, 我近期真係圓潤左, 個肚腩! Orz

今日翻看facebook舊照片, 我以前影相, 有時都會微微E起棚牙… 我以前, 真心覺得無乜問題… 但而家睇返, 真係四個字… 「有冇攪錯」, 唔明點解舊時可以覺得冇問題…

old_photo_2012
(2012年箍牙前既相片, 當年塊臉仲有啲包添)

某程度, 睇返舊時facebook既相, 除左對後生既自己有啲陌生, 亦都不時有後悔感… 諗如果早幾年, 早十年箍齊棚牙, 我既2012, 2013, 2014會有啲咩唔同呢?

不過, 人當然唔應該成日回頭看…

現在, 我已經唔再吝嗇笑容, 笑多啲, 個人親切啲… 人緣亦都好啲… 我開始認識多左異性朋友, 唔知… 有冇機會今年…

(待續…)

男人四十先箍牙 (七十八)

[22.02.2014] – week 97 – aligner (29 + 12/32)

唔知邊度黎既厄運, 長假回來後… 竟然一連病左4日…

同時間, 亦換左一副新的牙箍… 不過, 呢副新箍, 真係令我痛足幾日…

首先, 久違了既新箍酸痛, 竟然返左黎… 已經唔記得幾耐換新箍冇感到酸軟… 大病初癒既第一日, 我換上第12號箍, 點知訓醒後既早上… 食早餐竟然無力, 仲有酸痛感覺… 真係自己都嚇左一跳!

之後既一日, 都感覺古古怪怪… 用大力咀嚼既時候, 總係好似唔太發到力咁!

雖然話復原得都幾快, 第二日已經無左酸軟感… 不過另一個好耐冇出現既問題… 又再重現…

可能放假耐左… 積落既工作太多, 需要開會討論既機會亦不斷, 令我把口突然工作量暴升… 講得野多, 講得野密, 自然被牙箍刮傷口腔既機會又自動提升… 不消兩日, 我已經感覺到口腔內出現飛滋… 亦都好快, 每次講野都變成一件苦事… 特別今日, 真係痛到入心… 雖然唔算需要成日講野, 係有時手痕用手輕輕隔住臉皮摸一下… 都感受到牙箍既鋒利… 証明, 入面真係損晒了!

最後… 同大家講, 今天是」星期六」, 我仍在公司奮鬥中… 正所謂, 有咁耐風流… 放年假, 放病假積落既工作, 從未意圖離開過我… 現在回復工作, 十倍痛苦奉還!

(待續…)