男人四十先箍牙 (九十七)

[29.04.2015] – week 159 – (29 + 29 + 1/26)

痛了三日, 終於有機會寫下blog… 同大家分享下最新既箍牙狀況…

聰明既網友, 已經可以從我既標題睇到… 我第二度加箍了… 今次加左26個箍… (應該係最後一次加箍啦)

自從星期一開始戴返箍後… 真係好唔慣! 到今日為止, 成個口腔已經被鋒利既箍邊/Attachment凸起既粒粒刮損晒…

每日都要講好多野既我… 真係一字一痛苦… 無人知…

好! 由星期一講起啦…

星期一, 係約左牙醫覆診, 並取新箍既日子… 約左醫生夜晚10點15分… 真係好夜, 不過比較適合我, 一來我住得近, 二來, 時間比較易夾… OT夜啲都唔會影響我既booking…

十點前到診所… 並唔太多人, 10零個客在等咁上下… 對我黎講, 已經係好少人… 平時迫到出街…

等左10分鐘左右, 護士叫我入房… 坐上手術椅, 閒聊幾句就比左套新箍我試…

一套落去… 嘩! 無比舒服… (相比起戴Retainer)

好耐未試過咁貼服既感覺… 而且, 一啲壓迫感都無… 唔知點解… (不過遲啲就知味道xddd)

護士話, 今日醫生會幫我加attachment呀… >_<

再多一陣… 醫生入黎啦…

慣常既動作, 都係意出驚人既開場白… 今次… 醫生一入黎就問我… 「你咩霖把?」

其實, 我再一次回應唔到醫生既呢句說話…

霖把? 咩料呀?…

不過, 我估約呆左3秒左右, 我終於知道佢問乜了… 大時代嘛… 呢排個個都係度傾霖把架啦…

不過, 我又真係心中無霖把… 我就順口講句… 「無喎!」

咁醫生就繼續… 話佢有啲客話多謝佢, 就醒個霖把叫佢買喎…

不過醫生話佢自己鬼有時間睇市咩… 唔敢買…

講講下… 就將啲工具掙開我左右兩邊腮啦… 原來, 醫生準備幫我黐attachment… 一共15粒 ($#@$@^%$^!)

上8下7… 真係… 駛唔駛咁多呀? 我依家啲牙好亂咩???

醫生邊幫我整, 又開始邊喃喃自語… 又話… 以前佢無乜生意果陣(無乜生意? 似係N年年既事咁喎)… 日日睇4份報紙, 不過呢… 而家忙, 就得番星期日, 一日睇報紙喎…

又繼續講… 佢呢… 買乜跌乜, 賣乜升乜… 炒野都係唔岩佢, 都係安安份份做野岩佢多啲… 發達唔到佢咁上下講依啲說話…

口裡面塞滿工具既我, 雖然講唔到野串佢, 只能接連反佢白眼以示不滿… 大佬呀, 係人都知你渣幾架跑車返工啦, 仲係度扮勞動階層… #_#!

發表完偉大實業論後, 醫生就走左啦… 但我口中既新attachment仲未乾透, 未可以開口住… 口水仍然隱約咁從撐開個口既器具邊流出黎, 真醜死鬼…

完成黐attachment後, 護士再比套牙箍我戴(惡夢開始了…!)

戴上去還好… 但護士叫我試下除… 點知… 哇!!! 咁難除既?

原來大部份attachment都在大牙位置, 令到從後開始除既牙箍無從入手… 我估, 我大約用左1分鐘… 先可以成功除到個牙箍出黎…

點知, 暴力除左牙箍後… 咦?! 門牙粒attachment甩左… 駛唔駛咁快呀?! 我諗…

護士好快咁安慰我, 話… 唔緊要既… extend療程, 甩左1, 2粒係唔駛要既… 如果下次覆診, 醫生覺得需要, 就會幫你加番啦…

我其實都冇乜所謂啦… 15粒, 甩果驅一粒, 何足掛齒…

今次拎左4對新箍走…約左下次覆診日期, 原來都已經要六月中了…

夜啦… 仲有少少重新戴箍既野想同大家share下, 不過太攰了… 聽朝又要早起, 暫止休息一下先…

new braces 2015

(待續…)

男人四十先箍牙 (九十六)

 

[16.03.2015] – week 153 – retainer

今日終於夠期見醫生… 等左好耐既今日, 可以盡情咁傾訴大牙隙既問題…

首先見我既, 係姑娘… 佢幫我影牙既最新狀態相… 影得好仔細, 係用晒啲擴你個咀唇既器材, 清清楚楚咁影晒你既牙齒, 包括口腔內既相, 一覽無遺… 另外, 除左露齒相, 仲會影埋你正面, 兩個側面既咀部狀況添! 例如合埋咀, 啲牙仲有幾凸咁…

原本影呢啲相, 我都無乜野… 但姑娘一路影, 一路氹細路咁… 「拿… 合埋你個咀咀先」, 「好… 比啲牙牙我睇啦」, 「拿… 放鬆啲牙仔…」 成四十幾歲既我… 真係額頭上充滿左冷汗…

姑娘問我啲牙點, 我都忍唔住講比佢知… 有牙隙, 同埋, 啲牙好似唔太齊了… (包括下面果排牙, 已經有少少排得唔夠圓了!)

無聊地等左醫生約五分鐘… 佢真係忙, 客多到呢…

見到醫生後, 再訴相同既苦… 醫生問: 「你緊係戴唔夠時間啦!!!?」

我就理直氣壯咁回: 「梗係有戴足啦, 每日8個鐘一定有!!!」

醫生就話: 「咩呀! 要戴最少12個鐘喎!」

呢刻, 我靜左… 咦? 我真係完全無印像佢講過要每日戴最少12個鐘喎… 如果係臨訓戴, 點都無可能戴到12個鐘啦… 我每日訓到8個鐘已經係神蹟, 我日日都係迫自己每晚11點戴穩定器, 先叫7點零起身夠8個鐘…

如果要12個鐘, 我真係晚飯都未食完就要戴retainer了… 陰公… 點計都計唔掂條數… (同埋戴左又講唔到野, 點見人啊?!)

醫先又話, 都預左我啲牙會歪架啦, 不過估唔到佢地咁活躍姐…

我都唔知好事, 定唔好事黎… 啲牙活躍… 咁… 我估都好過死屍咁掛 >_<

醫生仲未發揮完… 又再話: 「咁, 你一定仲未有女朋友啦?! 啲牙咁活躍…」

其實我真係唔太明佢呢句既意思… 不過算啦… 我地呢啲地球人, 有時好難明白火星人既說話了… 我都係讀多兩年書先同佢傾計…

重點係… 要再倒模加箍啦… @_@ 雖然, 我其實真係唔介意繼續箍牙, 講真… 無箍牙呢個半月… 我真係有少少唔捨得戴箍既感覺…

醫生一邊準備個牙模, 一邊話, 第日倒模唔再需要咁煩啦… 用部機scan就得啦… (高科技)

不過佢地未上training, 所以暫時仲係要用舊方法倒… 醫生話下次再倒模, 就可以用機啦…

我問… 「下? 乜我仲會有下次咩?」 (鴉… …)

今次, 倒模真係倒左幾次都失敗… 醫生話有窿喎, 係我啲口水太汹湧… 不過, 呢個都係我既問題, 我一打開口(包括刷牙), 唔夠一陣啲口水就係咁湧出黎… 我都唔知點解…

最後, 我估我倒模都倒左20分鐘… 今次真係賺左… 好少留在手術椅上咁耐囉…

為左增添一啲箍牙既成功感… 護士load左我3年前既牙齒寫真比我睇… 其實… 我已經唔認識3年前既牙… 好陌生… 佢地陪伴左我30年… 但我用3年時間, 就將佢地忘記得一乾二淨…

睇返啲相… 我再一次諗到果句… 「我以前點忍到佢地咁耐既呢?」

由於太重口味… 有興趣, 有勇氣既網友先好碌落去睇… 否則, 就此停止, 下回再見啦, 係咁先…

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

開!

before_alignment
(有人問我點解啲牙相係都鍾意用黑白… 答: 因為多牙漬囉, 黃禁禁咁, 都係變左黑白順眼少少, 睇整齊度姐, 又唔係睇有幾白… 可? xdddd)

.

.

.

.

.

.

.

.

.

.

另外, 補充多句, 上次出左篇blog後, 有朋友反映話… 我出果張牙隙相, 我啲牙好似未箍牙咁, 幾唔齊下… 其實, 我自己都有覺啲牙唔整齊架, 所以有少少失落feel…

不過, 今次覆診完睇返3年前既真正未箍牙相, 又突然開心返了… 因為, 真係已經改善左好多好多好多好多囉… (拍手)

(待續…)

男人四十先箍牙 (九十五)

[14.03.2015] – week 152 – retainer

三月頭, 去左泰國旅行… 終於叫暫時抛開繁忙既生活, 安安靜靜咁玩幾日, 游下水, 曬下太陽…

不過, 某日… 赫然驚見一張selfie內既自己… 門牙旁有條大黑隙!!!

其實, 我唔係好肯定呢條大黑隙, 係戴retainer後形成, 定係箍完牙之後一直都有…

點解我會認為係載retainer之後形成呢? 因為… 每晚戴retainer既時候, 都好有壓迫感… 好似越黎越難戴咁, 所以… 我覺得係日頭唔戴retainer既時候, 啲牙移動得好利害, 再者… retainer只係托牙後面, 前面只係用驅一條鐵線作穩定, 應該唔能夠好準確咁固定返我歪左既牙…

所以, 久而久之… 歪左既牙, 經過retainer向前推, 就歪都更利害… 最後形成左一條大隙… (見下圖)

teeth_gap
(其實真係幾見者心傷, 第一, 從某角度, 真係一條好明顯既大黑隙, 第二, 牙齒既黑三角真係好嚴重, 睇黎… 係」不治之症」了 >_<)

下星期一, 我就會去見醫生覆診, 到時一定要將呢件事上報… 睇下醫生有乜辦法啦, 再者… 如果要繼續戴retainer, 我都希望可以選擇一個」有效」同」見得人」既透明箍…

有效意思係… 我總覺得而家既retainer, 只係主力托住後面, 總之就向前推就算, 我感覺唔夠全面, 啲牙好易好似而家咁… 歪左都唔知…

見得人既意思係… 我有時夜晚好夜都會見到同事, 朋友… 為左唔想太晏先開始戴retainer, 我一般11點左右就開始戴, 如果戴鐵線retainer, 一來真係講唔到野, 二來… 真係唔好睇囉…

(待續…)

男人四十先箍牙 (九十四)

[22.02.2015] – week 150 – retainer

今日年初四, 要準備迎接四日假期既完結… 無出街, 留在同屋hea, 同抹單車… 尋日好健康, 聯同朋友同事去左踩成日單車, 成身散晒… 果然, 越少做運動, 越易攰… 肚腩又肥左!

首先同大家拜個年… 祝大家身體健康, 心想事成… 當然, 仲有棚靚牙, 未箍牙既… 就今年下定決心, 去醫生度檢查同落實箍牙計劃啦… 早一日靚都係好事黎! ^_^

不經不覺, 原來已經箍完牙兩星期… 過左一個唔需要戴箍既農曆年… 亦係好自由既農曆年, 因為唔再需要為左戴住牙箍而對食物敬而遠之… 乜野都食得… 但… 後遺症, 就當然係肚滿腸肥… 自己都覺得自己太過份…

另一個問題, 就係… retainer既問題了…

我而家, 只係會訓覺得先戴… 近期適逢假期, 大部份時間, 都可以戴足八個鐘(甚至超過好多添)… 但每次戴同除, 都有啲困難…

每次戴retainer, 其實啲牙都已經free左成日… 走晒位, 所以一戴落去果下… 真係恐怖呀… 以前用膠牙箍… 就算戴落去緊, 個心都無咁唔舒服… 但用retainer, 戴落去… 真係好似夾格頂返齊啲牙咁… 由於retainer係硬膠, 所以… 真係好似監生刮落啲牙度咁… 心裡面真係1000個唔舒服…

同時間, 攝個retainer入去既時候, 發出格格聲… 真係聽到都毛管楝… 暫時黎講, 兩星期都唔係好慣…

除既問題… 就係感覺啲牙有啲酸… 呢種感覺, 在三年前… 除膠箍既時候感受過… 就好似監生拔啲牙出黎果種感覺… 但今次因為有鐵線, 所以接觸到啲牙… 特別難受… 可能, 我有少少牙齒敏感掛?

在呢兩個星期間… 我其實唔係臨訓戴先戴retainer既… 而係我確定左我唔會再食野, 我就會戴上穩定器, 希望爭取更多時間用佢… 可惜, 一戴左retainer… 就會變左口齒不清… 我曾經試過戴住retainer傾電話, 傾唔到一分鐘… 對方已經問我, 係咪食緊野… 因為… 我真係好似黐脷根咁… 講野一舊舊… 攪到要即刻除左佢先可以再講…

我三月請左大假, 諗住渡下假… 而家諗起要帶埋個retainer去, 仲要晚晚戴住… 諗起都灰灰地… 唔知, 過安全關時, 會唔會響機要搜袋呢? 我試過放個金屬小腳架(手指咁大)… 都響機, 海關要反轉我成個袋先搜到個小腳架出黎, 仲問長問短… 今次, 比人搜到副」假牙」出黎, 唔知會點呢可? ummm… this is my… retainer… huh?! ummm… false teeth >_<

好啦… 上回講到, 臨離開診所以姑娘叫住我… (唔通…)

當然唔係問我拎facebook啦… 原來係話, 我已經完成左療程, 佢會送啲潔牙貼我用… 哇, 一送就成袋咁多… 真係感動呀… (其實上次比我果幾支都未用 >_<「)

另外, 仲比左支去漬膏我… 話煙漬/奶茶漬好有效喎… 唉… 唔通我啲牙漬真係咁難睇… 忍唔住要送我咁多美白產品… 呵…!

gift_bag

whitening_strips

cleaning_liquid

不過呢, 其實點解我仲未用啲漂牙產品呢… 係因為我多年前, 睇過報導… 話用得多呢類產品, 其實對牙既琺瑯質一啲都唔好… 因為美白既原因, 係呢類產品其實係腐蝕左表面果層, 所以露出黎既白色, 其實係內層既琺瑯質… 長期咁蝕落去, 其實會令到啲牙變薄… 更容易有牙齒敏感…

當然, 我會再搜集下資料… 先再決定用唔用啦…

又攰啦… 今次講住咁多先…

(待續…)

男人四十先箍牙 (九十三)

[09.02.2015] – week 148 – retainer

正所謂高處未算高, 低處未算低… 原本諗住完成晒箍牙療程… 終於可以鬆口氣, 享受下無箍日子… 點知… >_<

先賣個關子, 講返上次見完醫生後… 呢三個星期既消遙日子先…

話說上次見完醫生, 醫生話我日頭可以唔戴箍… 只需要夜晚戴住#29號箍訓就得…

人就係咁, 要戴既時候成日覺得最好快啲完成… 但一年又年又一年… 終於完成療程… 一下子要我唔戴… 我就偏偏唔捨得除… 竟然日頭都照戴… 仲戴得耐過之前…

我亦試過專登食完早餐後一直都唔戴, 直至放工十點後返到屋企… 臨訓前先戴返… 哇! 個箍緊到呢… 証明, 唔戴12個鐘頭以上, 啲牙偷偷咁走晒位…

直至今晚覆診去拎retainer… 竟然mark錯左時間, 約9點, 但mark錯左10點… 攪到9點姑娘打黎催我, 夠晒鐘, 你仲黎唔黎呀? 醫生9點半要走啦喎…

好彩我住得近, 咁岩又放工返到屋企… 仲諗住刷個牙食啲野先去覆診, 急到求鬼其著左街坊裝飛的去診所… 10分鐘唔駛就出現左係診所… 眼見歷史性咁少人… 鬼咩, 醫生大哥都已經準備睇埋呢幾個症閃人啦… 唔冷清有鬼…

有半點唔好意思之下… 9:15分左右就見醫生… 呀, 唔係… 係先見姑娘… 姑娘比左我個度身訂造retainer我睇… 我一睇… WHAT THE… HELLO… 點解… 咁似阿婆副假牙既?!

真心真心覺得好核突呀…

我以前一直以為retainer係一副鐵線, 點知… 原來鐵線背後另有乾坤… 就係… 一副半透明既膠托… 好戲在後頭…

姑娘教我戴入口, 之後… 哇… 我感覺好似有幾支探熱針一齊放左入我脷底脷面一樣… 果一刻, 我只感覺缺堤了… 口水從口腔內四面八方一直湧出黎, HOLD都HOLD唔住… 姑娘一手就拿起盒紙巾比我, 當刻… 我真係好感覺到當眾失禁既尷尬…

想開口唔該姑娘時… 死勒… 我連講野都有困難… 如果三年前… 我第一次戴牙箍, 講野發唔到sss音係黐脷根10粒星既話… 我今日戴住retainer, 黐脷根指教就肯定係50粒星… 因為, 我條脷根本就比上下retainer既兩塊膠夾實左, 上下動彈不能… 莫講話要講野, 就算唔出聲, 我條脷都唔知放上定放下好… 好唔慣條脷在口內長期舔住塊膠囉… >_<「

當然, 我相信好多人第一次戴上retainer, 都有相同既場面… 否則姑娘係唔會咁氣定神閒…

無耐… 醫生就入黎檢查…

佢一望, 首先注意到既… 唔係我無助既神情, 醫生係留意到我臉上既3塊膠布…

無錯… 我前幾日去脫左臉上既3粒大墨… 就在生日正日前1日… 我鼓氣左勇氣, 去做左laser脫墨… 無知既我, 仲以為脫完就可以大搖大擺去街, 點知… 脫完墨會留下3個火山洞, 要過一排先會復完… 所以, 我而家長期臉上都貼住3塊大膠布… 如果各位網友係街見到個中坑, 左邊臉貼住3塊正方形膠布… 不妨同我打個招呼… ^_^

越講越遠, 講返正題… 醫生見面, 劈頭就話我: 「嘩! 乜你都咁貪靚既!」

我就問醫生: 「乜你咁醒, 一睇就知我做過乜黎?」

醫生就話… 佢果度萬千少女客人, 佢有乜未見過丫… 咁我諗一諗, 又係既… 無啦啦臉上有膠布, 無十成都有九成係脫墨啦…

醫生再問, 你有好目標拿? 要整靚去追?

咁我就話… 「係呀, 我仲有好多個目標添…」 (好有自信咁款 :P)

醫生都費鬼事理我… 佢話, 叫我戴retainer戴到三月中, 就再返黎造牙模…

我一聽… 下?! 忍唔住爆左句… 「又…???」

原來, 醫生話幫我再檢查下… 因為我啲牙呢三年移動幅度好大, 如果無剥過牙, 好容易會反彈… (咁似減肥廣告既?)

醫生話趁invisalign療程未expire, 再去訂造新箍, 想再整好啲喎… @_@」

雖然諗落心情有啲忐忑… 諗深一層, 其實醫生都係追求完美, 再三倒模再整好啲… 其實對我黎講都係好事…

醫生仲話… 一般人戴retainer係三四年… 我呢種case, 戴retainer係三五七八年… 我聽完, 心情真係好似直插谷底咁… 戴隱形牙箍三五七年, 我真心講尚可接受, 戴阿婆假牙訓要戴三五七八年… 我心理上真係一時接受唔到, 即時由心底」下」左出黎呀… 救命!

最後, 護士教我除左副假牙… 呀… 唔係… 除左副retainer至真…

哇… 由於係金屬既關係, 除出黎既時候… 真係好恐怖, 因為啲金屬箍住啲牙, 除出黎有啲磨擦到, 感覺有啲敏感, 起雞皮, 三年前既感覺又返黎啦… 就好似夾硬拔隻牙出黎咁… 如果對自己既牙肉缺乏信心, 真係做唔出…

再者, 一路除個箍… 澎湃既口水又不斷湧出黎… 姑娘又急忙為我遞上紙巾… 真係醜死鬼…

除完之後, 我問姑娘… 係唔係個個都係咁架, 又流口水又黐脷根…? 姑娘笑笑口咁話… 都要啲時間習慣下啦! >_<

(穩定器 – 上顎)
retainer upper

(穩定器 – 下顎)
retainer lower

最後, 我約左3月中再覆診… 醫生話主要係檢查下用左retainer之後, 牙齒移位嚴唔嚴重喎… 有需要就趁最後機會再造套新箍啦…

本來, 以為係咁先啦… 點知臨出門口… 姑娘叫住我唔好走… (害羞)

到底咩事呢? 要下回分解啦… 聽朝我又返番上大陸了… 要爭取時間休息… 我會盡快繼嬻寫埋落去! 我都驚自己唔記得左… :P

欠大家既comment回覆, 都會盡快覆… 近排真係比較忙, 請唔好見怪… >_<

(待續…)

男人四十先箍牙 (九十二)

[24.01.2015] – week 145 – aligner (29 + 29/32)

踏入2015年第四個星期了, 我仍然係用緊#29號箍…

今日係約左牙醫覆診既大日子, 所以一早訓醒就換衫見醫生…

印像中, 今次應該係第一次在週末見醫生, 以前一般係在weekdays… 可能因為旺角診所結左業, 所以星期六都開埋掛? 都要既, 咁好生意… 唔開多幾日疏導下人潮點得?

一如所料, 少左一間診所換來既結果, 就係大爆棚, 睇牙既朋友堆到診所水泄不通, 候症室同reception都塞爆左, 我唯有被安排至另一個舖位等候…

一等又45分鐘, 好在近期愛上左一隻手機遊戲SimCity Buildit, 一玩可以玩個幾鐘, 所以排隊對我黎講係無乜難度…

留意到既係… 今日全部都係女顧客, 另外… 全診都係女護士, 真係陰氣極重呀…

輪到我既時候, 係一位女護士先招呼我… 一輪問候(當然係我既箍牙情況)之後, 佢話我知… 今日會拆attachment了, 我疑問… 唔係仲有3個箍咩?

護士話, 果3個箍, 係鞏固用的, 而且好大力, 話亞洲人唔太適合, 用左會有反效果喎… 我今日真係學到好多野, 原來外國人既牙力係強啲既…

護士亦比左30, 31, 32號箍我睇… 牙箍袋上面明顯寫住30+, 31+, 32+… 比平時既牙箍號碼多左個加號, 係特別啲…

醫生入黎之後, 竟然話我肥左… 話… 我塊臉圓到成個波咁喎… 雖然我自己都感覺自己肥左, 但不致於成個波咁掛… 睇黎, 我真係要認真注意飲食運動了…

醫生二話不說, 拎左去牙石啲工具(好似係)幫我整走口內十幾粒attachment… 整走晒啲attachment後, 仲幫我去埋牙石(牙石又出現了 >_<)

成個過程都好快, 我其實有啲好奇… 究竟啲attachment係點黐上去既呢? 黐得咁實, 三年都未甩過… 但整走佢又咁容易… (仲要無痕跡)

之後呢… 醫生話係時候整retainer囉… 就幫我倒模… 今次倒模, 真係比兩三年前快… 可能啲牙整齊左啦, 牙模易倒左… 1 take過就掂左… 不過呢… 倒模過程就真係幾嘔心下… 要咬落一pat軟膠度, 仲要hold住2分鐘等佢乾, 唔知點解, 有少少作嘔感覺… 間唔中仲聞到陣吹波膠味…

醫生話… 過一兩個星期就可以拎retainer了… 護士竟然約正我生日正日去覆診, 咁我改左生日後既星期一放工去… 無理由生日正日去診所興祝啦掛… >_<

醫生再補一句, 話隔幾個月之後要覆診, 檢查下仲需唔需要加療程… 我心諗… 下? 咁著數? 仲有得加?! 不過… 其實我已經唔知仲可以點再箍了… 而家個形, 都已經好好… 當然… 我相信牙弓可以再圓啲闊啲既… 但就唔算太緊要…

最後, 離開診所前找清左條尾數… 以後真係對牙醫不拖不欠了… 無債一身鬆晒… 護士仲送左啲野比我, 就係牙齒漂白軟膏, 雖然唔知效果如何, 但係睇個包裝… 係幾精美下既… (對比起兩年幾前送果支) xdddd

whitening

包裝係一套4支jel狀既物體, 謢士話係配合我#29號牙箍用的… 每日用, 上下排牙齒前排各6隻, 每次約1小時… 每用完一支就隔一星期再用另一支…

我十幾年前, 公司牙醫保健時都做過一次牙齒漂白, 除左當年特別做左牙模之外, 其餘既野都同呢set jel好似… 當年, 我記得價錢係$2400… x_x

不過當然, 今時唔同往日… 漂白套裝係各藥房都可以隨便買到, 都係百幾二百蚊就攪掂…

拆左attachment, 啲核突粒粒無晒… 可以放心每日用漂白, 亦可以開心笑了…

仲有樣野唔記得講大家知… 醫生話… 我日頭唔駛再戴箍了, 係夜晚戴就得啦… 不過, 我其實仍然會繼續戴的… 已經習慣左, 同埋… at least我會日頭戴箍戴到拎retainer…

既然啲牙已經定左型… 我當然要去做每年一次既實驗…

就係…

漢堡包測試…

2015_mcdonalds_test

結果, 牙印同2014年已經唔太大分別… 細心睇, 當然括度係比較圓(上下都圓左)

唔知點解… 突然間, 有少少寂寞感… 好似無端端就完成個3年箍牙療程… 以後唔會再有新牙箍要換, 又唔需要再定期去見醫生…

感覺有啲奇怪囉…

今次寫住咁多先, 下次拎retainer再報告…

(待續…)

男人四十先箍牙 (九十一)

[20.12.2014] – week 140 – aligner (29 + 28/32)

近期接近放縱, 自從上次見完牙醫, 表示經常每三個星期換箍, 護士姐姐竟然幫我在mark左每個箍戴3個星期… 咁令到我肆無忌憚咁大減每日戴箍時間…

有時早餐除左, 等到食埋lunch先戴返, 有時lunch除左, 又等到食埋晚飯先戴番… 簡直係我自己都接受唔到自己變成咁!

無箍既日子, 我更加主動去參與同事間既零食活動, 有時甚至自己去買糖, 朱古力, 薯片果啲在office大吃…

我而家已經無乜計戴箍時間… 心諗, 都已經到尾聲(如果#29箍係人生最後一個箍既話)… 實質上箍牙成果, 大約已經係咁… 對箍牙完成後既樣貌, 已經無乜期待…

放縱飲食, 另一個大問題, 就係會心廣體胖…

我屬於高果類, 肥對我黎講… 就主要係肥肚腩, 同塊臉… 2年前辛辛苦苦減番黎既小肚腩, 已漸漸變回中肚腩… 箍牙加節食回來既v臉, 又開始變番包包臉… 照鏡都開始接受唔到!

公司返大陸頻密, 放工做運動… 已經變成歷史, 食完就訓變番做習慣…

眼見身體一日比一日累… 應該都係呢幾個問題引致…

接近年尾, 又係訂立下年目標既時間… 我希望, 新一年, 可以回復昔日毅力… 戒得住口, keep得到經常運動, 變番一個健康有活力既人…

同時, 要的起心肝, 搵日去脫墨… (唔記得有冇同大家講過, 但近幾個月, 忽然想過脫左臉上既三粒大墨囉)

凍冰冰既星期六, 我乜都唔理, 大覺訓到下晝一點… 寫埋篇blog後, 都要好好做下正經事了 (例如買聖誕禮物, 仲想買返啲新衫過節)

好啦, 唔知下次會幾時寫blog, 預祝大家聖誕快樂, 新年進步呀!

(待續…)

男人四十先箍牙 (九十)

[12.11.2014] – week 135 – aligner (29 + 26/32)

今日大陸回來, 唔知點解, 竟然的起心肝寫blog… 終於脫離月記, 唔駛等到月尾先update…

星期一去左見醫生, 檢查牙齒同拎新箍… 屈指一算, 原來上一次黎診所, 都快將4個月前了… 臨近尾聲, 我每個牙箍時間越黎越長了… 因為有時真係大半日都戴唔返個箍, 有時食野又唔除箍, 啲時間好亂, 所以索性個個箍戴足3星期或以上了, 戴到自己都feel到完成先換…

正如我上一篇講, 我開始試戴住個箍食野, 因為有時出外工作, 未必下下方便喱埋換箍, 就好似上星期公司seminar, 突如奇來既buffet lunch, 我唔係咁方便去廁所除箍, 就戴住牙箍食飯了… 呢次算係戴住箍食得最多唔同食物既一次了… 亦都係令我深深體會戴箍食野有啲野要特別注意…

其實已經沖破左戴箍咀嚼既限制, 無論魚肉菜飯湯都照放入口… 本來順利食完都好地地, 但當及後去廁所時, 先發現牙箍內攝左一小塊既菜葉!!! 笑起上黎在牙齒中央, 異常醜陋… 我在進食時, 已經多番飲水, 怕啲牙物殘留在牙箍, 點知… 原來呢類殘渣真係沖唔走, 用脷都舔唔走的…

急忙除低牙箍沖洗, 原來積埋積埋在牙箍裡面既殘渣, 多到加埋都夠今晚宵夜… 唔可以輕視牙箍既收納能力…

要記得以後, 就算被迫戴箍食飯, 食完飯(或途中)都要特別注意有冇殘渣攝在牙箍之中… 同人傾計就要份外小心啦! 不時最好用電話個自拍鏡頭(男人), 或鏡(女人)照下有冇野攝住最好…

除左難睇, 其實諗下食物殘渣長期貼住牙齒, 衛生問題都不容忽視, 有酸性或染色既食物, 都好影響牙齒健康啦, 我話…

拉開了話題拉左半個宇宙咁遠, 本來講開星期一見醫生既…

如常地在等候室呆等左半個鐘… 輪到我見醫生了…

今次唔知點解, 有成五分鐘都係個女助護招呼我, 望聞問切, 檢查牙箍, 直至叫我試除牙箍, 都係個女助護做晒… 我仲以為診所轉左模式, 由助護幫我做例行檢查添…

五分鐘後, 醫生入黎… 我先知原來世界係無變過…

醫生第一句就講中左我近期心事… 就係… 「你肥左喎…」

無錯, 我認近幾個月係好食好住, 心境舒暢, 心廣體胖左, 又少運動… 無論肚腩, 塊臉都增左唔少磅… 所以對於醫生既」問候」, 一啲都無hurt… 醫生再問, 「咁其實係好事定壞事?」…

兩睇啦, 肥就即係發福, 福氣黎既… 但係我比較鍾意瘦既自己… 感覺精神啲, 同埋著衫真心覺得好睇左…

醫生檢查完牙齒後, 話我又無牙石喎… 咁似乎我開始識刷牙了… 另外, 醫生亦在我既門口幾隻牙隙分別鉏左幾下…

再同我講… 仲有3個箍就箍完啦!…

咦? 咪住… 咪當我小學雞喎… 我今個箍先係26/32… 就算+3都係29咋… 點會係箍完呢?

醫生話… 最後3套牙箍係因應情況先要戴的, 如果係唔係都戴晒, 就可能會令啲牙泊得太緊… 其實我唔係好聽得明, 不過聽到醫生講早三個箍就可以完成, 都係一件值得興奮既事黎… 計下數, 就算我以後每個箍都戴足3星期, 我都肯定可以在下年生日前完成箍牙, 做返個飲食正常既人啦! (如果真係戴到29/32就收工)

今次檢查時間唔算長, 但吹水時間反而長左…

除左傾」養生之道」外, 另一個我比較意外既話題… 就係醫生話旺角診所, 因佔中關係將會結業了… 呢件事我真係完全關連唔到, 但醫生解釋… 話佔中令到送貨車都泊唔到去附近, 送貨都送唔到…

小弟政治冷感, 對佔中無立場… 但我都係佔中既受影響者之一, 我住深水埗, 本來好多巴士都可以經我樓下… 但佔中後, 由於我家住得近彌敦道口, 所以啲車全部改晒道, 繞過左我屋企先回到正常路線, 所以無論邊一方向回家, 啲車都唔再經我樓下… 我都好耐無搭巴士回家了…

我無去細想旺角診所既結業原因是否合理, 反正唔係我既專業, 我唔理解都係正常… 旺角診所結業, 對我亦係零影響(當然可能以後我診所排既隊更長)… 不過我都快過終點了, 呵呵!

下次再見醫生, 應該會係12月尾, 1月既事… 護士話我知, 我下次黎除左檢查牙齒外… 如順利, 應該會做retainer既倒模了… 否則, 就可能會用埋尾3個箍啦… 對我黎講, 其實要箍到32號箍, 我一啲都唔介意… 我真心唔急完成, 反而, 話少左3個箍療程, 仲有少少唔捨得… 就好似話去日本玩7日, 突然話改4日就番黎既感覺雷同…

最後, 提一提香港invisalign舉辦左個」隱適美箍牙分享贏巨獎」既活動… 勝出者可以獲得4日3夜雙人日本沖繩旅遊套票, 咦好吸引喎! 不過又係沖繩… 我岩岩先去完囉… 我心大心細想參加… 最後都放棄左, 因為要公開身份架… 正如放我既blog上invisalign smile club一樣, 我仍然想保持自己既神秘身份, 咁我先可以盡情咁講自己既野比大家知… 係咪?

好啦, 聽日又要走返上大陸… 今次寫住咁多先…

都好耐無回覆過各位網友既comment… 趁有精神… 回覆埋先休息… [因欠債太多, 如果覆漏, 切勿打臉, 再留言比我啦 ^^]

(待續…)

男人四十先箍牙 (八十九)

[26.10.2014] – week 133 – aligner (29 + 26/32)

好喇, 又黎到我既箍牙」月」記第89篇, 話想寫密啲(好多次), 點知反而仲越黎越疏…

呢個月, 留在香港既時間, 只有4日… 尋晚剛出差回港, 今日終於有番個」閒在家」既星期日早上… 趁未出街, 希望寫一篇blog, 同大家update下近況…

首先, 講一件令我非常欣慰既事 – 就係香港invisalign隠適美公司既smile club, 將我blog既連結放左上佢地既official網頁:

http://www.invisalign.com.hk/smileclub/user/page/starblogger

同時亦為我既blog寫左段簡介:

預計療程時間:30個月

簡介:男人四十先箍牙的作者從事IT行業,從小覺得自己的牙齒不齊,多年來同學、朋友都以「哨牙仔」稱呼他。他的妹妹於年前成功完成了隱適美矯齒療程,在妹妹的影響下,立下決心在結婚前、快四十歲時開始矯齒療程,希望可以改善外觀。雖然婚禮最後未有順利舉行,但無礙他繼續矯齒療程的決心,並特別開設專屬網誌詳細紀錄矯齒過程,與大家分享當中的點滴。立即了解更多有關男人四十先箍牙的療程分享。

—-

當我睇左之後, 呢三年既回憶忽然湧上心頭… 原來, 時間真係可以行得咁快… 轉眼間, 我已經由一個哨牙大肚腩中坑, 變成一個無哨牙既小肚腩中坑了…

我好開心, 寫出既黎blog文有人欣賞, 仲越黎越多人陪我走呢段箍牙旅程… 我感覺到, 條路由從前既崎嶇小徑, 去到現在變成寬闊直路, 越黎越多朋友們陪住我一路走向終點… 諗到呢到, 真係有少少眼濕濕, 好想搵個膊頭(最好係女仔)愉快地哭一場…

多謝invisalign既公關代表陳小姐(原來好靚女 8)~, 可惜這些機會… 不屬於我的 :P), anyway… 多得陳小姐既幫忙同協助, 呢個網頁先可以在invisalign fan club佔一位置, 被更多人認識, pageview都即時提高左喎…

講番呢個月黎發生既事… 就係我放左個幾禮拜長假, 再加兩個禮拜既biz trip, 攪到留在香港既時間得幾日, 真係悶死我既貓貓了…

去旅行+出長trip, 會對箍牙造成問題… 點解? 因為… 呢兩樣」活動」, 都難避免同食野拉上關係… 即係好難因為箍牙而放棄美食囉… 係香港都話可以就住時間黎食野, 但去到外地… 真係機會難得各樣美食都試下… 所以箍牙既時數大減!

同時, biz trip唔係成日可以隨便去戴箍除箍, 攪到有時又唔係食野, 都要」無箍」, 攪到做野時都有少少罪疚感…

上一個箍(28號), 我幾乎戴足一個月… 每日平均都係戴14-16個小時, 所以其實戴成個月… 唔多了…

呢兩個trip另一樣突破發展就係… 我終於練成戴住箍食飯了, 如上面所講, 唔係成日都有機會去除箍食野, 所以有時迫不得已, 都需要戴住箍進食… 而我試過戴住箍食既野, 分別有… 飛機餐(肉, 菜, 飯, 甜品, 果汁), 雪糕, 雞肶, 薯條, 果仁, 爆谷, 意粉, 沙律, 水果… 咦? 好似乜都試過晒咁了… 不過未試過, 亦覺得唔可以既就係直接咬蘋果, 同直接刨成碌粟米…

我始終只開始接受用大牙(隔住個箍)咀嚼, 仲未慣用門牙(隔住個箍)去咬食物囉…

好啦, 又係時候享受下我既週日… 輕鬆一下, 我聽日又返大陸了… (又)希望唔駛一個月後先見… ^_^

biz trip

(待續…)

男人四十先箍牙 (八十八)

[20.09.2014] – week 127 – aligner (29 + 24/32)

今個星期六, 不如以往咁將活動排得密密麻麻… 閒在家中…

早上訂左機票, 在月尾至國慶假期間到外地旅遊… 請三日假期, 有九日連假… 這些機會, 又點可以放過… 回想一下, 原來… 我都有八個月無休息過了…

計一計時間… 下一個牙箍正好在我上機前一日更換, 其實都幾大鑊… 換箍後會不適應兩三日, 咁… 頭幾日旅行, 食野就無晒feel了! 可惜…

每次心血來潮寫blog, 我慣性都會翻睇一下上一篇寫過乜野, 原來… 又快一個月了… 時間過得咁快, 除左工作外, 運動每星期都佔左我兩個半日… 剩下既時間, 就係同家人過, 同朋友過… 當然… 朋友, 大部份係指交往緊既女性朋友…

呢篇blog, 其實主要想抒發下小弟感情方面既事(好似從來無乜特別講過)… 如果閣下除左對箍牙, 唔係對我另一面感到興趣, 可以睇到呢一行字就停了… xdddd

. 十

. 九

. 八

. 七

. 六

. 五

. 四

. 三

. 二

好, 講番我既感情世界… 其實, 有從頭睇我blog既網友, 都會知其實我寫到睇八篇, 我就變成單身漢… 經歷左兩個寒暑, 仍然仲係一個人… 原因, 我估除左因為自己係比較內向, 對異性亦較為怕醜… 加上生活圈子窄, 不喜愛群體活動… 下刪一億字…

所以對搵女朋友, 真係無從入手…

從年頭開始, 其實已經強迫自己主動啲去接觸異性… 亦對朋友既介紹女仔相睇活動積極參與… 的確, 近半年, 係識到多左異性, 亦有唔少發展機會… 不過, 感情既野, 就係咁… 感情要黎自雙方… 數段關係都總欠缺些火花…

而近月, 的確係有一份比較」像真」既情發展過, 可惜最後都無疾而終左… 到而家都仲係好似發緊夢咁… 可能時間太短, 短到自己都懷疑過係咪一件真事, 定只係搭巴士時發既南柯一夢…

我同個女仔, 由識至」散」… 只短短一個月… 講比人知我為愛情受傷都驚比人笑啦… 實屬小跌一交…

我亦都係一個丰子愷既漫畫愛好者… 在此刻, 只能勉勵自己一句: 「跌一交, 且坐坐」

rest

正好, 月尾既旅行可以比自己休息一下… 情路上再出發過… 

朋友叫我, 不如正正經經去speed dating啦, 趁仲未係太老… 又話其實speed dating啲女仔實在係唔錯云云… 又話其實speed dating啲男人真係好騎呢, 我去都應該好有機會云云…

其實, 如果我去speed dating, 係咪又會變成」好騎呢」既新一批?

希望… 箍完牙之後, 唔駛寫」男人四十先媾女」… xddd

.

.

.

.

.

P.S. 如網友想介紹女仔比我識, 不妨也直接與我聯絡 @_@」 [紅]

(待續…)