男人四十先箍牙 (七)

[23.04.2012]

第一日返工…

為左保持形像, 希望第一次見同事談吐唔失禮… 在公司樓下偷偷搵個位除左牙箍… 先上去report duty…

返工詳情唔講了…

大約九點除箍, 捱到十一點半, 覺得無乜野需要再講, 又偷偷走入廁所戴返個牙箍…

戴到lunch前五分鐘, 又走入廁所除箍出去食飯… 真係好麻煩… 不過, 都係第一日先係咁, 以後睇定啲, 可能去到餐廳先除箍, 就算係十數分鐘, 戴得幾耐得幾耐啦… 始終希望緊守每日戴22個小時規則… 就算唔夠, 都儘量接近22小時…

食完飯, 大約兩點先戴返個箍… 計落即係除左箍成個半鐘… 加埋今朝返工又冇帶成兩個幾鐘… 即係今日遠遠唔達標了!

都無辦法… 唯有下午開始戴足全日…!

下午有機會同同事對話, 我唔知佢地聽唔聽到我痴脷根, 但我自己就肯定覺得勁漏風了! 啲si音c音… 全部都漏晒風… 唉… 形像何存呀?!

同啲同事唔係咁熟… 又無理由無啦啦話人聽自己箍緊牙…

唯有第日搵機會透露下… 希望人地多多體諒…

(待續…)

男人四十先箍牙 (六)

[20.04.2012]

箍牙的第五日, 基本上已漸漸習慣箍牙生活, 每日定時除箍進食, 刷牙潄口用牙線… 成為例牌動作…

不過, 在第五日中午左右, 感覺到下唇內側好像給牙箍的膠邊刮損了… 可能上一晚同朋友食飯暢談得太興奮, 說話太多, 令牙箍跟下唇內側磨擦太激烈, 不知不覺間刮損了…

後果就係… 現在每次講野都會隱隱作痛…

之前聽朋友講, 佢細個時用鋼箍就成日會刮損口腔, 攪到係咁生飛滋… 佢話用我呢種透明牙箍唔會喎…

其實, 世事邊有絕對丫… 而家咪又係損左! 用手指摸下個牙箍邊, 真係幾利下, 唔明點解invisalign唔將個邊收圓少少…

[21.04.2012]

箍牙的第六日…

每次戴回牙箍前, 我都儘可能用牙擦輕輕清潔牙箍, 先再戴上… 希望保持牙箍清潔, 及戴上去時比較清新…

但當晚正在洗擦牙箍時… 啪的一聲, 聽到硊裂既聲音, 大吃一驚… 仲以為個牙箍斷左…

檢查之下, 原來在上排牙箍門牙位的內側裂開了… 裂口好細, 大約1mm左右, 輕輕按時會啪喇啪喇咁響, 真係好得人驚… 驚再試多兩下會一直裂落去, 成個牙箍分成兩節…

今日只係第六日, 個牙箍仲要戴多八日! 以後真係要好小心… 我唔想第一個箍就要返廠! 以後仲有45個箍要戴, 點捱呀?

不過… 雖然個箍裂左, 戴落又好似冇乜問題咁… 希望佢頂得到八日後換箍啦…

[22.04.2012]

箍牙的第七日… 亦係我漫長待業假期既最後一個休息日… 因為收到offer了! 聽日就返工了…

唔知戴住個牙箍點同同事傾計… 但係希望唔會有障礙啦, 我唔希望啲同事第一個印像以為我係痴脷根…

總結七日, 每日最開心既時間, 就係進食既時候, 因為可以除低個箍, 真係一種解脫黎…

唔駛被個牙箍鎖住, 又可以食野, 簡直係雙重享受!

(待續…)

男人四十先箍牙 (五)

女朋友公事繁忙, 今晚又唔可以陪我食飯, 所以我既最後大餐要一個人食…

我揀左平常最喜愛既垃圾食物做大餐… 就係麥當勞…

大餐叫左麥樂雞餐+脆香雞翼+雙牛芝堡, 最後真係飽到塞唔入… 仲有少少想嘔既感覺, 不過無所謂, 就算幾唔健康都好, 以後兩年… 食量一定會大減, 以前肥左既都會十倍瘦返…

聽從護士既忠告, 飽餐後徹底擦左牙, 用牙線, 仲用埋潄口水清潔牙齒, 正式戴上金剛圈…

帶左之後, 感覺兩個箍好有力, 將啲牙緊緊套住… 但不致於痛… 之前在網上爬過唔少文, 有啲人未習慣話會痛… 我就唔覺痛, 只係感覺到有股力在口腔內… 一邊睇住電視, 好快仲習慣左添…

女朋友夜晚返到黎, 傾左陣計, 佢竟然無發覺我帶左牙箍…

實情係, 我從睇醫生, 倒模, 直至戴箍, 我都冇話過俾佢知… 想俾個意外驚喜佢, 點知… 透明牙箍原來真係咁勁, 連身邊最親既人都唔發覺…

不過, 一開口, 我自己就即時有痴脷根既感覺… 好多發音自己都覺得古怪… 例如啲c音, s音之類… 可能因為上下排牙因為扣左箍, 合唔埋, 所以發啲sssss音就漏晒風…

結果, 全晚佢都竟然冇發覺…

[17.04.2012]

第朝起身, 帶左成晚箍, 第一次除箍刷牙… 嘩! 感覺前排棚牙好酸軟… 除箍既時候, 感覺就好似監生拔啲牙出黎咁, 個心真係好驚一拔就連啲牙都拔埋出黎… 最後, 當然無事… 但刷牙時候, 真係一刷一驚心, 因為刷牙時一接觸到前排牙齒, 立即有酸軟感覺… 啲感覺, 就好似幾十年前換牙時候咁… 酸酸下就甩出黎… 所以咪話唔驚…

啲牙酸軟晒, 連早餐都唔係好想食… 求其丁左個公仔點心食就算…

食野根本無法用到門牙, 只好將食物直接放到口腔內, 用大牙咬…

突然有個感覺, 就係好想戴番個牙箍, 因為無左牙箍既保護, 成日都覺得啲牙好鬆…

早餐後再做戴箍前指定動作(擦牙, 牙線, 潄口), 就戴返個箍了… 戴好之後, 感覺好實在, 好安全…

夜晚同女朋友出街食飯, 飯前先偷偷地除左箍, 飯後又偷偷戴返, 佢依然無感覺到我有咩唔同… 真奇怪, 我講野明明覺得好痴脷根喎… 唔通只係我自己錯覺? 還是平日我覺野本身就痴脷根呢?

夜晚回到屋企, 我終於都忍唔住同佢講左我箍左牙, 佢都好驚奇… 驚奇唔係個箍隱藏得好… 係驚奇我做乜成四十歲人先去箍牙…

我當然冇講箍牙想結婚靚仔啲, 只係話呢個係兒時夢想, 只係三十年後先實踐姐…

(待續…)

男人四十先箍牙 (四)

等左差不多個半月, 四月頭終於收到診所的sms, 說我的aligners已寄到, 叫我預約時間到診所取箍… 由於仲未搵到野做, 我梗係想即時取箍啦, 點知… 預約都要成個星期後先可以見醫生… 無辦法, 唯有懷住興奮心情等多一個星期…

因為見工忙, 所以其實都好快就過左一星期…

預約好下午五點見醫生… 去到診所, 又係慣常地多人… 成間等候室都坐滿晒人… 都係後生仔女, 我呢位中坑坐入去, 顯得格格不入…

好彩, 等候時間唔太耐, 大約等左半個鐘… 姑娘請左我入去…

原來, 今次唔係醫生見我, 就係呢位姑娘… 佢交左一塊化粧鏡俾我, 叫我渣住… 然後拎左一排三對牙套出黎… 每對牙套都有個密封膠袋包住, 而每個膠袋都有個密封拉鍊, 同埋獨立編號及使用日期…

姑娘話, 每對箍會用兩個星期, 所以每對牙箍個使用日期相隔14日, 而每日係要箍至少22個鐘, 如果箍唔夠時間, 要自己延期, 及通知診所…

我心諗, 嘩! 22個鐘! 真係好苛刻… 每次進食及刷牙都要除箍, 戴回箍前又要先刷牙潄口及用牙線… 即係每日得2小時進食3餐及刷牙3-4次, 如果保持正常生活節奏, 恐怕要不斷要延期…

諗諗下, 我都開始聽唔到姑娘同我講乜, 只記得佢不斷問我: 「有冇問題?」, 「記唔記得戴箍前要做乜?」, 「記得一定要用牙線!」

態度嚴如教師… 不過我唔係話佢惡, 只係佢太急… 我一時應付唔到…

重要時刻來臨, 姑娘由第一個膠袋拿出一對牙箍… 教我點分上下牙箍; 其實, 有少少常識既人都會分到, 上排箍既門牙係大好多的… 不過, 當然, 我有耐心咁聽晒佢講…

終於上牙箍了…! 姑娘教我先將門牙套入, 然後手指順勢往內推… 將牙箍緊緊由外至內套到整排牙齒上…

過程比想像中容易… 不過牙箍有少少緊, 因為上排牙齒唔整齊, 左邊的犬齒原來沒有成功扣上, 所以後排的大牙也沒扣好…

姑娘叫我用力點按一下犬齒的位置… 啪一聲, 牙套緊緊扣在牙齒上… 開始感覺到有點拉力…

到下排牙箍, 因為有了經驗, 很快便將牙箍扣好… 從鏡子上看, 透明牙箍真係好貼服… 唔留心睇, 真係唔會睇得出帶左牙箍…

戴箍後, 上下排牙齒都感覺到很有拉力, 但感覺不到拉動方向…

還未享受夠戴箍的樂趣, 姑娘便教我除牙箍…

說得很簡單, 只須要用食指或姆指在牙箍最尾的部份挑起, 從尾到前一路退出來…

開頭實在有點不知所措, 牙箍扣得很緊, 在早上又剛剛剪了指甲, 要挑出來特別吃力… 手指有點痛…

上排牙箍除了大概半分鐘… 但除下排牙箍, 真的花了很多時間, 我諗… 大約一分鐘左右吧? 肯定的是, 過程中我流左好多口水出黎, 成功除出來的時候, 牙箍仲帶血… 我同姑娘都大吃一驚… 我望住姑娘, 問佢: 「吓?! 點解咁架!」

我當然唔係怪佢, 只係問下佢除箍流牙血係唔係正常姐?

姑娘望一望我口腔, 佢話係我除箍既時候手指刮到牙肉, 所以流血喎…

之後, 姑娘又叫我試下再帶一次… 今次因為有左經驗, 快左好多…

戴好之後, 醫生剛好經過… 望左一下… 真係一下… 我估佢應該記得我棚牙… 只講左一句… 「嘩! 你有排箍呀…!」 之後就走左…

當時, 我只可以講係: 「無言以對」

我以為個箍從此戴住走… 醫生走後, 姑娘又叫我除返出黎, 然後再入袋, 叫我今晚臨訓前先開始用喎…

我第一時間諗到既就係…

要食餐最後的豐富晚餐… 因為, 今後兩年幾就日日無啖好食了…!

另外, 診所」送」了一個牙箍盒俾我… 好精美的, 剛好可以放一對牙箍, 而且打開時印有提示你每天要戴22小時的字句, 底部更可以讓你寫上聯絡姓名及電話, 好讓你不小心違失後, 都有機會讓好心人交還給你… 因為… 如果只係唔見個盒就問題不大, 但如果盒連牙箍一齊唔見就大鑊, 因為要重造一對牙箍, 代價係千幾蚊! 真係要好好保管…

[16.04.2012]

兩年半既箍牙持久戰… 正式序幕!

(待續…)

(三個獨立包裝既牙箍, 每個都有編號及使用日期)

(溫馨提示, 每日都要記得帶22小時)

(無作大, 我的牙弓真係好尖)

男人四十先箍牙 (三)

大約二月尾, 牙醫診所打俾我… 仲諗住佢地通知我個牙箍已經造好…

點知, 原來係通知我, 話美國嗰邊reject左個牙模… 原因係倒模唔成功喎! 要再倒過… 唉! 乜咁架? 攪到我幾失望…

約左一星期後, 再去診所重新倒模…

去到診所後, 睇到診所同美國invisalign公司通訊來往既system, 介面好似email咁(當然複雜好多), 每次來往既case都好似一個email咁有晒archive, 裡面就會連同好多3d模型同相片, 分析結果之類…

醫生在我面前開左reject既case出黎睇, 3D模形上指示上排牙模倒衰左, 有個缺口, 所以造唔到牙箍, 所以… 今次去診所就只係做返上排牙模就可以…

不過, 又係老問題… 我既尖形牙弓, 又令醫生搵左一大輪牙模工具先可以成功印模…

醫生今次好小心, 印好模之後, 細心檢查多幾次, 確定真係無問題先放我走…

成個過程好順利, 唔知點解今日冇乜人等, 由等至到步出門口, 都係大約20分鐘… 比起上次兩個幾鐘, 真係好快!

印完模, 即係又要再等一個月, 真係幾心急…

(待續…)

男人四十先箍牙 (二)

等到二月初,終於見醫生… 登記時覺得舖仔細細,但原來間診所並非想像中咁細,可講係天外有天…

箍牙服務應該為佢賺左唔少錢,開完一間又一間分店,舖頭都越變越大…

見醫生前,接受左一系列"免費"既服務,包括x光,同驗牙都免費,當然,排得期黎見醫生都唔會有邊個會臨時縮沙,價錢亦都心裡有數,所謂免費,都係令你先行出一步姐…

影完x光, 姑娘俾返張x光片我睇, 仲問我: 「你覺得哨唔哨呀?」

從x光照片睇出黎既門牙, 簡直嚇死人, 似足從牙肉中打橫直插出黎咁… 此時姑娘真係攞境, 我都唔知點回應好…

由排隊,驗呢樣驗嗰樣,直至見到醫生,接近攪左兩個鐘,不過,其實"等"係佔左八成時間… 如果打算只請半日假,最後一定會變請一日… 但weekday上午都咁多人,真係有啲意料之外…

講返醫生,睇完我啲牙之後,都眉頭一皺… 佢話我個牙弓唔係圓,係好尖,好難攪喎,要箍返變圓… 我其實都唔係好知佢講乜,總之… 我知道既係… 會比平常人要箍耐好多,budget亦比我預期中多,但無辦溘啦,等左咁多年先開始,唔通真係會為out budget而放棄咩…

但唯一令我放心啲既就係,唔制剥牙… 醫生話我個case,係要將個牙弓拉返圓佢,即係除左門牙外既牙都向外拉,咁之前唧左出黎既門牙就可以推入返去…

醫生話可以俾我返去考慮下,我就話唔駛喇,梗係盡早攪啦…

我㨂左用invisalign(即係透明牙箍、好似叫隱適美),梗係用呢個啦,唔通幾廿歲人仲好似啲小學生咁用龬箍咩?細路就叫可愛,叫我用鋼箍,邊有面目返工?過唔到自己囉!但代價係貴至少一個double…!

之後,又影一輪相,我諗… 應該係影緊箍牙前後之前篇掛?270度影晒,係差在未舉埋自己個名牌在胸前… 仲要勁依起棚牙笑,真係自從做左哨牙仔後,幾廿年未試過影相依成咁…

倒模係要分上下排牙黎做,見到醫生同助手都面露難色,好似好難搵到一副岩我既倒模工具咁,我心諗… 唔係真係咁罕見姐下嘛?如果係,不如唔收我錢做case study啦!

印像中都試左四五次先成功倒晒上下排牙模… 牙模工具係藍色既, 上面會唧啲淺藍色軟膠, 仲有黃色同粉紅色, 可能唔同顏色係for唔同用途… 牙咬落去之後, 啲軟膠大約五分鐘就會變硬, 倒模成功… 間中聽到佢地gi gi jum jum咁講啲我唔明既對話,大概都係話… "呀?所有顏色都用齊晒先得…" 咁上下,我估,應該係個牙模既難整程度掛?

個牙模要send返美國造,醫生話大概一個月左右,我個case大約要落四十幾個箍,以兩星期一個黎計,我最快都應該要兩年幾先攪晒… 真係另一個漫長既作戰… 戰後已經變左老兵一名…

(待續…)

男人四十先箍牙 (一)

年紀就快四十… 終於下定決心, 做一件三十年前已經應該做既事…

就係箍牙, 點解之前細個唔做?

好簡單, 家貧囉… 細個時候, 老豆話箍牙動輒要駛幾廿萬喎… 邊有錢整丫? 當年愉景灣都唔駛一千蚊一呎, 你話幾十萬係幾咁多錢呢?

一個孝順既小朋友, 又點敢為左自己外表, 令到屋企要付出咁沉重既代價呢?

之後, 參差不齊既牙齒(特別係對大板牙)陪伴我過左好多個年頭, 讀書年代亦無人會叫我真名, 只會叫我哨牙仔… 我亦漸漸習慣左… 當年深信, 外貌對於出黎社會待人處事係無影響既… 當然, 事實係唔係又係另一回事…

回想得太遠, 講返現在… 合約工作上年年尾結束了; 暫時未搵到工作… 整日悶在家中… 就自然會有好多奇怪想法…

其中一項, 就係去完成多年來既心願… 箍牙…

記得阿妹之前用左兩年時間黎箍好左棚牙, 笑起上黎靚好多… 我諗, 就趁四十歲前, 戶口仲有點錢, 仲未有太大家庭負擔… 就立定決心, 盡早去搵牙醫! 仲應該趕得及在結婚前完成, 希望影相靚啲! :P

決定搵返阿妹之前個牙醫, 聽聞幾出名… 出名平…

平既代價, 就係排大長龍… 一月中左右打電話去排期見醫生… 竟然要二月頭先有機會見醫生…

反正都等左咁多年… 其實唔爭在半個月…

(待續…)