男人四十先箍牙 (十六)

[12.06.2012] – week 9 – aligner (5/46)

Lunch時候, 同同事去左食小炒, 同事叫左味京都肉排, 進食既時候不為意, 我竟然用門牙嘗試咬斷肉排, 點知… 一咬之下, 有肉絲攝左入大牙隙之間, 用牙簽點都了唔番出黎, 又唔敢用脷嘗試頂出黎, 怕郁親啲門牙, 唯有尷尷尬尬唔多敢開口講野完成午餐…

食完lunch後, 急急跑去藥房買pack方便牙線清理返出黎… 從今之後, 我公事包都會帶備牙線, 以備不時之需…

[17.06.2012] – week 10 – aligner (5/46)

因工作壓力大, 呢幾日比較放縱於食物上面, 戴牙箍時間遠遠不夠醫生建議既22小時…

星期四, 放工經過燒烤店, 一口氣買左極大量既串燒回家慢慢嘆; 包括雞比, 雞全翼, 雞中翼, 豬頸肉, 雞軟骨等等… 完全忘記左自己已經好耐冇用門牙進食, 但呢啲串燒, 大部份都用上門牙進食的…

因為已經係新箍既第四日, 所以牙齒已經冇乜酸軟感, 而且漸漸習慣門牙可以輕輕用力咬開食物… 但呢啲燒烤食物, 特別係串燒類, 要從竹籤上扯出黎食, 兼夾燒烤過既食物外表非常煙un, 真係非平常既力道可以應付… 食既時候都冇乜點, 但之後戴返個箍就知大鑊… 終於體驗到咩叫現眼報!

唔知係唔係食燒烤時啲牙用力過度, 胡亂移晒位, 戴箍時候竟然感覺好有壓力, 似足頭三日戴箍咁…

朝早訓醒時, 竟然再一次酸軟起黎, 以前真係未試過… 似乎, 箍牙時食呢類食物, 真係會好影響牙齒!

星期六夜晚, 同朋友出街食飯傾計, 樂極忘形, 餐後竟然一直都唔記得帶返個牙箍, 即係… 大約有四五個鐘冇戴, 連埋早餐同午餐除箍進食既時間, 即係總共無帶箍超過六個鐘, 遠遠超過醫生建議既兩個鐘!

夜晚, 決定在最尾一日按情況, 睇下需唔需要自我延期一日!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

發表回覆

你的電郵地址並不會被公開。 必要欄位標記為 *