男人四十先箍牙 (十八)

[27.06.2012] – week 11 – aligner (6/46)

被公司調到新location, 首日返工, 同事邀請我tea time到starbucks飲杯野吹下水, 同事打算請我飲咖啡, 點知我揀左支水, 同事大感不快, 以為我唔俾面… 當然, 我即刻又要解釋係因為我帶住牙箍, 唔方便飲咖啡或甜野…

因為個牙箍係新戴第三日, 所以… 一如以往, 講野快或大聲時, 難免會唔小心噴口水, 真係幾尷尬, 特別係在新同事面前… 唯有頻頻道歉兼解釋, 唉, 真係失禮, 煩…

[04.07.2012] – week 12 – aligner (6/46)

戴左牙箍後, 基本上已自動斷絕食街邊小食, 今日經過街邊雞蛋仔檔, 忽然興緻起, 好想好想食… 但係帶住牙箍又食唔到, 外賣雞蛋仔帶到返到屋企就霖晒, 肯定唔好食… 靈機一觸, 就衝入附近商場, 搵個冇乜人既暗角除左個箍, 再去買雞蛋仔… 越難得到既野, 真係越會珍惜, 雖然只係一底雞蛋仔, 但食落感覺真係好美味… 我, 真係好耐都無食過街頭小食了!

[10.07.2012] – week 13 – aligner (7/46)

又到期換新牙箍, 戴新箍必然既痛楚, 已經漸漸習慣… 今日早上, 忽然想出街食早餐, 因為好耐無出過街食早餐了; 早餐在屋企食, 可以更加有效控制除箍時間, 食完早餐亦可以即時刷牙戴返個箍, 遠遠比在街上食早餐除箍時間短, 令箍牙時間更加長, 希望效果好啲! 諗下諗下, 又再一次打消出街食早餐既念頭… 有時, 真係幾懷念茶記既早餐A…

中午時間, 見完客, 路過壽司店, 就一個人就走左入去食壽司… 回想一下, 原來箍左牙咁耐都冇食過壽司… 叫左客炸蠔壽司, 食既時候先發現, 我連咬開粒炸蠔都好費力, 可能因為新箍效應, 牙齒比較酸軟無力… 此時, 望見身邊位婆婆, 都係一個人在食壽司, 但佢食得極為暢快… 唉, 而家我連老人家既牙力都不如了…

[11.07.2012] – week 13 – aligner (7/46)

夜晚約左好耐無見既舊同事去食麻辣雞煲, 因為係打邊爐形式, 傾下食下… 不經不覺就除左箍成四個鐘咁耐, 再戴返個箍既時候, 感覺簡直就好似第一日換新箍時候咁! 痛不欲生… 原來, 唔戴四個鐘, 加上飲飲食食, 啲牙真係會亂晒籠, 所以戴返個箍後, 就會感覺牙箍得好緊!

[12.07.2012] – week 13 – aligner (7/46)

唔知點解, 今日特別講得多個」二」字, 每當講呢個字既時候, 就會感覺牙箍拉得特別緊! 都唔知係好事定壞事… 會加強個牙箍既矯正能力, 定係反而會拉錯位呢?

[13.07.2012] – week 13 – aligner (7/46)

今日約左牙醫檢查牙齒, 順道拿新箍… 今次轉左去旺角診所見醫生, 地方比長沙灣細好多, 不過就係專門做invisalign, 因為流水作業式, 排隊時間都比長沙灣快少好多! 我約八點鐘, 七點四十五分到診所, 七點五十五分就已經可以見醫生, 八點就可以離開診所…!

唔知點解, 今次我覺得醫生睇得好馬虎下… 只係稍為睇左一下我啲牙, 再用一個極快既速度幫我洗左前排上下既幾隻牙… 真係好快, 所以俾佢支工具」電」到我標晒牙血… 姑娘仲建議我流緊牙血唔好咁快戴返個箍住喎…

醫生最後講左句, 叫我一定要每日戴足22個鐘呀! 因為我啲牙形比較特別, 戴唔夠時間就會無效果… 唔通, 佢睇得出我成日戴唔夠22個鐘?!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (十八) 有 “ 2 則評論 ”

  1. 兄弟, 我上星期終於都去左做牙模, 診所話要寄去德國做個內箍, 所以估計八月中就可以上箍,
    我好快同你一樣, 要戒零食、街邊小食等東西了.
    我有時間就會來關心吓你既進度, 等我上箍後再黎update吓我既情況你知。
    大家加油呀!

    近排聽左呢首歌,好有意思,同你分享吓:

  2. 恭喜! 做內箍, 照理應該唔會影響零食, 街邊小食喎, 因為牙面仍然外露, 對咀嚼應該唔構成困難… ^^

    剛剛睇到電視朱咪咪廣告, 原來愛x健都有箍牙服務, 但就唔係invisalign, 佢宣傳內箍技術…

    兄弟, 你上箍後記得有時間就報告下進度, 可能你內箍既時間會比invisalign短, 正所謂, 快人一步, 理想達到, 更加快擁有整齊既牙齒!

    努力!

發表回覆

你的電郵地址並不會被公開。 必要欄位標記為 *