男人四十先箍牙 (六十五)

[11.09.2013] – week 74 – aligner (29 + 3/32)

擁有11粒attachment既第三日… 個箍真係好難好難除… 一來, 隻新物料好貼牙, 二來, 11粒attachment令到個牙箍扣得啲牙好緊… 而家, 最快都要成半分鐘先可以除到晒兩個箍… 仲係要忍住痛除… 希望快啲可以適應到…

本來習慣睇醫生當晚會寫blog, 但放工實在太攰, 加上又返左大陸… 攪到隔左成兩日先寫呢篇blog…

話說星期一放工… 又係匆匆忙忙去診所… 一如以往既」客似雲來」… 整個等候室都係女性… 一個中年男人擠在女人堆中間, 仍然係好尷尬… 但… 講真, 我已經開始習慣…

等下等下… 好彩有個新game, 123猜猜猜陪我… 等左45分鐘… 就輪到我見醫生…

例牌檢查完牙齒後, 醫生話我多左好多牙石… 唉… 我都唔想… 睇怕都係因為我大陸多油多鹽多糖… 食完飯又冇得刷牙, 次次都係清水潄口, 匆匆戴回牙箍… 啲牙唔污糟就有鬼啦…

今次醫生話要幫我鋤下啲牙… 唉! 我最驚就係呢樣野…

鋤牙唔恐怖, 最恐怖係醫生鋤之前, 會用一枝」牙籤」在你牙縫中攝開條隙… 攝既過程… 真係痛不欲生… 好彩, 我都叫做忍得下痛既人… 但一攝一鋤既過程… 我都好明顯渣緊拳頭… 攪到成個手心都係汗…

幸運既係… 今次鋤牙時間唔係太長… 我估3-4分鐘左右啦…

之後… 戲肉就到… 我本來得4粒attachment… 今次要加多7粒… 變成11粒啦…

醫生護士夾手夾腳幫我戴上一個定位牙箍… 上面有晒標記, 方便黐啲新attachment上去… 個牙箍非常薄… 貼左上去… 一啲感覺都冇…

整個黐attachment過程, 我估大約10分鐘左右… 其間, 只聽見/感覺醫生護士不斷用工具在我口中」做手術」… 又唔知佢地攪緊乜… 段時間真係幾難過… 最主要, 係怕不自覺係咁流口水… 但又好彩, 守得住個水壩… 我唔係太接受到當住陌生人前流口水…

10分鐘過後, 護士叫我除返個定位牙箍潄口… 嘩… 個牙箍真係好薄, 加上已經整左11粒attachment… 攪左好耐我都除唔到… 護士話幫我除… 點知佢都除唔到… 最後要兩個護士一齊先攪得掂… 救命…

每次見醫生… 佢見到我有牙石, 都會免費幫我」攪掂」… 呢份禮物, 真係貼心… 不過, 免費係其次… 最主要係我常有呢個疑問… 到底係唔係我唔識刷牙呢?

臨離開診所… 護士俾左四套新箍我… 即係話… 兩個月後再見了!

之後既兩日… 每次除牙箍, 其實都好唔習慣… 每次都拼盡九牛二虎之力… 先可以成功除到箍… 自問已經唔係剛剪完指甲… 但加左attachment之後, 的確會令個箍咬得好實…

一個唔小心… 回彈既牙箍仲好容易夾親口腔內既肉… 一但損埋, 啲飛滋肯定痛足幾日…

就好似剛剛有4粒attachment既時候, 都需要一啲時間適應… 我希望唔需要太耐啦!

今日打住咁多先… 今晚剛從大陸回來, 聽朝一早又要上返去了… 要爭取時間休息下…

(待續…)

P.S. 我仍然覺得啲護士稱呼我為」病人」唔多洽當… 我箍牙之嘛… 無病喎!

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十五) 有 “ 12 則評論 ”

  1. 多謝你寫個咁詳細的blog 呀,好具參考性呀~~
    我都係考慮左好多年先決定箍牙,星期六戴上第一副箍,一共29個。
    好彩睇了你的描述,對於一dee情況,(如牙齒酸軟,除箍時感覺差dee除埋dee牙等)我先無咁擔心咋!(我同你同一個醫生,佢真係好鬼忙,廢事成日問佢野…)
    但依家我先係第一個箍的第二日…..有排捱~~

    1. soso, 你只有29個… 真係好幸福… 真係眨下眼就完成啦! 醫生太好生意了… 其實每次真係唔太多時間同佢」吹水」… 不迥, 其實佢係有whatsapp既… (wechat都有添), 但雖然係咁… 我從來都冇whatsapp同wechat佢…

      可能真係冇乜野好問… 二來, 如果真係有緊急野問, 例如甩左attachment, whatsapp醫生… 我估佢都幫唔到我架啦, 哈哈! 我真係一個好」自立」既人… >_<

  2. 我以前喺國內做嘢,都有同事箍牙﹙同我一樣鋼線!﹚,每次食嘢等埋單時佢就會去刷牙。而家到我出街時都會帶埋牙刷牙膏去刷牙﹙吉之島12蚊店有時有十支迷你裝牙膏仔賣,或者用兒童牙膏,好方便!﹚
    加油呀師兄!

    1. 講真, 我箍左成年牙… 我都未接受到在屋企/酒店以外地方刷牙… 唔知在公司廁所/或餐廳廁所… 在陌生人面前刷牙會係咩感覺呢? 可唔可以分享下? 嘿嘿…

      1. 第一次喺公司刷牙都幾尷尬,不過見證我刷牙嘅同事反而覺得司空見慣 -_- 後來見我刷牙嘅同事多數會問我箍牙幾錢,箍幾耐,有無特別刷牙方法,牙膏喺邊度買,點戴橡筋,邊度買牙膏潄口水平啲…
        而第一次喺酒樓刷牙我記得係灣仔打完邊爐,拎住支牙膏同牙刷經過全場行去廁所,係無人留意到我嘅。直到刷梗牙,有位太太好好奇我做乜,我啤咗佢一眼佢就立即抹手走人。我發覺後生女係唔會理我刷牙的,係啲四五十的太太會行注目禮,婆婆會我一齊,洗假牙。

        1. 唔好意思呀,我搭嘴講一句,醫生話吃完飯唔好即刻去刷牙,因果時口腔充滿酸性,而牙膏係「簡」性,會影響法瑯質,所以吃完飯用清水漱口一分鐘,再用牙缐,再吃個香口膠已經可以啦〜〜

          1. 吓? 乜食完飯唔可以即刻擦牙架咩? 死啦, 我箍左牙四個月, 日日午餐後, 都係公司廁所擦牙, 我地公司都有幾個人經常係公司廁所擦牙, 佢地無箍牙, 只是愛清潔

          2. 其實牙醫係咁講既… 剛食完野, 啲酸性物質黐左在牙面上… 如果即時擦牙, 好容易會刷損啲法郎質… 好容易令到啲牙變得敏感… 即係呢… 食雪糕, 食凍野會有酸軟感…

            所以, 最好食完野後用清水潄口… 再等十零廿分鐘先去刷牙最好…

發表回覆

你的電郵地址並不會被公開。 必要欄位標記為 *