男人四十先箍牙 (六十二)

[12.08.2013] – week 70 – aligner (29 + 1/32)

今日, 放工8點急忙趕去牙醫診所拎期待左成兩個月既新箍, 成身大汗去到診所… 一入門口, 簡直可以用萬人空巷黎形容… 成間診所都係客, 企爆左個十幾人既等候室, 連reception都企爆埋… 我估大大話話都有廿幾人…

護士小姐叫我去另一個舖位等住先, 到我既時候會打電話叫返我過黎… 咁我就死死地氣走過隔離街既診所等… 點知… 原來連呢間診所都爆埋… 最後, 我就企係診所街外門口等… 好彩, 呢個世界有智能電話, 有低頭族, 咁做企街都冇咁悶… 話咁快就企在街上等左45分鐘…

終於等到見醫生… 見醫生之前, 係另一位護士送上新牙箍俾我試戴…

new_aligners

一戴之下… 嘩… 咁長既?! 放入口差少少啃親喉嚨… 睇真啲… 原來新既牙箍會包埋智慧齒… 唔怪得一戴上去咁唔慣啦…

另外, 新牙箍既物料同以前都唔同左… 以前既箍比較硬, 欠缺彈性… 但今次一摸上手, 真係好感覺到有少少橡膠既感覺… 軟身小小…

戴上去後, 一照鏡… 咦? 咁多粒粒既…! 數下數下… 原來下排有7粒attachment, 上排有4粒… 嘩…! 大鑊了! 以後真係難戴難除了!

望一望個invisalign膠袋, 咦? 印刷精美左好多… 用料都靚左好多… 再望一再… U1 of 32?!

原來, 成套模都做過晒… 由原來既一套46個箍, 變成一套32個箍… 計一計數… 我之前戴左29個箍, 而家重新開始計32個… 嘩! 咪變成一共61個箍?!!!

本來, 只係戴多17個箍就完成整個療程… 而家一下子多左15個… 真係唔知笑好定喊好! 順利完成整個療程都起碼要涯多年幾!

個blog真係要改名為」男人箍牙箍到四十幾」先岩…

個箍由診所戴到返屋企, 諗住食飯時除… 點知… 唔知係啲新物料夠貼身… 定係新箍既原故… 真係好難除… 除左成分幾鐘先除得晒兩個…

心諗, 慘了… 以前除箍好快, 就算同同事一齊去廁所, 都冇人知我戴箍… 如今啲物料貼咁多, 而且咁多attachment(而家啲牙仲未上新粒粒)… 就咁笑起上黎, 已經睇到好多粒粒在牙箍上, 好樣衰呀! 從今開始, 又唔敢露齒笑了!

聽聞一早又起程返大陸了… 今日都忍唔住打篇blog先… 趕住早睡早起, 打到亂七八糟, 請勿見怪… 早抖! ^_^

後記: 臨訓前刷牙照鏡… 發覺就算唔E起棚牙笑, 就咁講野, 下排牙齒前面既三粒attachment真係好鬼顯眼呀! 好樣衰呀! 嗚… 我以後點見人啊?

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十二) 有 “ 5 則評論 ”

  1. 嘩!46變61?難免會有啲灰。。。加油啊!不過最緊要都係箍完整齊又靚多啲嘅效果。
    多咗粒粒,就真係要適應下啦,基本上樣唔樣衰係自己形住,其實人哋係唔太覺嘅!唔洗擔心。
    我個牙窿愈來愈細啦,希望快啲拍埋!但黑三角開始形成,點算呢?你有無呢個問題呢?

    1. 有呀, 我啲黑三角似乎都冇會合埋既跡象… 唉! 難睇都唔係最大重點… 係成日會有食物殘渣攝左入去… 一下唔記得照鏡或用牙簽整走佢, 俾同事見到真係樣衰死囉! 我已經不下四五次在廁所照鏡時照到有野攝住… 輕則都係啲白色既食物, 重則… 綠色既菜葉都試過… 嗚嘩, 我既顏臉何存呢啊!!! >_<

    1. 我諗過啦, 帶鋼粒粒, 啲人起碼一睇就知你係箍牙… 但佢見唔到我個箍, 但見到咁多粒粒係我啲牙度, 我驚人以為我食野唔乾淨, 或者無刷牙囉, 哈哈!

  2. 咦?! 黠解會加箍0既? 唔係電腦計好你要幾多套就幾多套架咩?

    我上個星期去左診所睇3D 圖, 我有50套, 而且第二套已經要加attachment, 好驚驚!

發表回覆

你的電郵地址並不會被公開。 必要欄位標記為 *