男人四十先箍牙 (六十九)

[06.10.2013] – week 78 – aligner (29 + 4/32)

話咁快, 內地黃金週就黎放完… 亦都代表我下星期就會重回上上落落大陸既日子…

上個星期, 雖然話唔駛上大陸, 但在香港公司都忙個不停… lunch除左箍, 諗住食完飯輕鬆多陣唔戴住, 點知坐低無耐就俾人捉左去開會, 一開就半晝… 轉下眼… 戴箍時間又嚴重不達標…

睇黎, 第#4箍又要迫自己戴3個星期… 計下計下, 如果個個箍都要戴3個星期… 我相信呢度既網友全部都會快過我箍完 (包刮77個箍那位 T_T) 我真係會變左全程陪你地箍牙直至完成… 好偉大…

今日突然醒起, 原來我仲未book下次見醫生既時間… 因為上次護士俾左4套箍我, 話覆診時間太遠, 未有得book住… 點知… 時間過下一星期, 過下又一星期… 我都唔記得上次見醫生係幾耐之前… 不過, 我仲有2個新箍未戴… 以我2-3星期一副新箍既進度… 仲可以捱多個幾月先見醫生, 下星期約醫生, 時間應該仲好鬆動…

尋日經過百老匯, 入去睇下啲水牙線… 嘩… 睇中心水果支philips, 要成八百幾九百蚊… 打左折都要八百鬆啲… 雖然對佢印像感覺良好… 但都係睇定啲先, 唔好太衝動, 否則會好似屋企支電動牙刷咁… 我估都有好幾個月無掂過佢了! 都係用普通牙刷有feel啲… (買左水牙線, 可能又會覺得普通牙線好feel啲)

唔留意由自可, 一留意… 牙漬又好似嚴重左, 啲牙齒咬合面上… 有啲凹凸不平既小窿, 之前好地地, 但而家有啲地方留左啲漬係度, 其實都幾難睇… 箍牙之前係無架! 應該都係因為用牙箍… 令到啲漬長期黐在上面, 無被飲水, 或口水沖刷… 久而久之形成左牙漬…

唔知, 完成療程後, 有冇方法一次過徹底洗走佢呢? 又或者講… 佢地捱唔捱到我完成療程呢? 可能好快就變左蛀牙了! T_T

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十九) 有 “ 18 則評論 ”

  1. 我都有問牙醫(唔係波波)關於水牙缐的功效,唔單止無咁好,直情差好遠喔,叫做當你無用時聊勝於無咋~

    另外,你話果dee漬可唔可以用勤dee去牙醫度洗牙來整走佢?我打算半年洗一次~

    1. 哦, 我就算買左水牙線, 都打算繼續用普通牙線架… 諗住可以集中火力沖刷下啲鬼祟位…

      另外, 我會問下醫生, 咀嚼面啲牙漬可以點整走佢… 真係幾礙眼下…

  2. 你醫生有冇講話如果戴唔足, 或者帶少左 係咪可以戴多幾日去補返咁樣?
    其實一日戴20個鐘係咪都ok, *雖然我知冇咁好…

    1. 呢點係可以肯定既! 如果你每日戴少兩個鐘… 一套箍就即係每日戴少左2 x 14 = 28個鐘… 你只要戴多28 / 20 = 約2日就可以了… 係咪計落相差唔遠呢? 每日又可以輕鬆好多… 我因為工作關係, 而家每套箍都戴3個星期, 即係平均每日戴 22 x 14 / 21 = 約15個鐘… 雖然耐左好多先換得箍, 但每日就可以輕鬆啲…

      1. 琴日又去見牙醫, 有d attachment 甩左, 佢幫我睇下棚牙就換左一個新既箍上去,問我一日帶幾多個鐘, 我話22個(90%都會帶到22) 之後佢話咁可以箍快d 佢話10日換一個箍都得, 而甩左果d attachment又唔理住….雖然之前都講過話箍得好可以7-10日就換一個箍, (唔知因唔因為我要帶77個箍啦..)但我覺得佢好似好求其, 不過佢都幾出名, 同埋佢診所主要都係個箍牙………希望信得過啦…

        1. 我成日都聽見人話甩attachment, 我自己就無甩過(touchwood); 我除箍已經係暴力mode, 唔知點解啲attachment可以咁頑強!

          其實, 我一直都覺得醫生話每日一定要22個鐘… 其實係保險, 佢地明知啲人永遠戴唔夠, 一陣話其實每日18個鐘就得, 啲人又會再戴少啲… 所以寧願講多啲, 費事你地戴得太少…

          1. 你的醫生技術真好,我的醫生昨天幫我裝了十六粒attactment,夜晚除牙套時,都不敢太大力,但都竟然有一粒碎了,不是甩,真的是粉碎,好化學…

    1. 我睇到你個blog既漂牙相, 真係靚左好多, 我箍完後都要認認真真係漂返白佢, 希望唔會太遲啦, 我成日覺得, 箍完牙後, 啲牙已經會蛀爛晒, 哈哈!

  3. 你好呀!我原本已放棄箍牙的,因已三十有多,但看完你的blog,另我下定決心箍牙,看了動畫片現等緊箍到,我有50個箍及要裝十七粒attactment,姑娘話會很難除下的,有沒有秘決?
    大家共勉之!

    1. 我都係岩岩箍,一箍就即用attactment。
      第一次唔知點除用左勁耐用整損晒流血。
      因為attachment係出面,所以只要你係最後個大牙位由入向外除,會易好多。

      1. 謝謝分享心得,我會試試的。
        剛剛開始帶第一個牙套,未上attactment都很難除,每次都在門牙處卡住,第二個套會上attactment,到時會更困難。
        之前看動畫片時話會用50個牙套,我想都是兩年時間,所以確定箍牙,但當到診所上第一個牙套時,竟然話要70個牙套,醫生解釋話後期20個牙套只是完美啲,才追加的,如果不喜歡完美,到時可以不用的,你們有否這些情況?

        1. 我相信去到尾1/3既療程, 啲牙已經好齊… 最後既1/3應該都係泊返靚晒啲牙… 所以唔好俾70個牙套嚇親, 只要箍1/3, 就已經開始靚, 去到尾1/3… 其實已經成形… 好好享受等待完成既日子…

          我都係箍到大半追加15個箍… 本來都有小小失望, 不過諗深一層… 價錢一樣, 又可以再箍靚啲… 何樂而不為?

    2. 我用左attachment咁耐, 而家仲加到十幾粒… 心得係… 要有信心啲attachment好穩陣, 大力啲由大牙位從內向外, 下向上, 左向右拉起就好快攪掂…

      我初初用attachment既時候, 除箍一定要入廁所慢慢除, 而家已經進化到搭地鐵上扶手電梯, 無人我就兩下手勢就除晒, 放埋入牙箍盒都未到頂… V ^_^」

      1. 好勁呀!我到現在過子一星期都是在家對住鏡慢慢除才除到,中午吃完飯到商場洗手間除都除唔到呀,唯有不停用水潄口或飲水,捱足半天返到屋企才除到吧!

發表回覆

你的電郵地址並不會被公開。 必要欄位標記為 *