男人四十先箍牙 (六十三)

[19.08.2013] – week 71 – aligner (29 + 1/32)

唔能夠唔承認, 新既牙箍真係箍得好緊好緊! 而家未上啲attachment粒粒, 戴左成個星期, 個牙箍一樣貼服到極貼, 要除出黎真係要費九牛二虎之力… 真係唔敢想像第日在牙上裝左attachment後, 除箍會係件幾痛苦既事!

invisalign呢隻叫SmartTrack既新質料, 真係唔講得笑… 柔軟中又帶點硬… 頭幾日戴, 真係感受到啲牙俾佢推郁左既酸軟, 以為穩定左會容易啲除箍… 哈, 又唔係喎… 一樣咁難除!

前幾日, 偷偷地冇人時, 在廁所好努力咁除箍… 點知… 除極都除唔到… 以前既箍, 基本上兩三秒就一定除晒… 而家, 最快起碼都十零秒先除得晒上下箍…

正當無從入手咁除下箍既時候, 竟然被突然入廁所既同事撞到正…

終於, 隱藏左三個月既秘密有第一個同事知左…

傾左兩句關於牙箍既事, 佢都好直接咁講… 「真係估唔到你呢個年紀都會箍牙」… 呢位80尾未到90後既年輕人… 講說話真係直囉唔該…

估唔到換新箍仲未上attachment, 就已經唔能夠再暪住同事…

我相信月尾公司去大陸三日旅行, 肯定會俾更多人」發現」我係箍牙人士…

被人發現唔緊要, 我最怕大陸啲食食玩玩團, 有牙箍唔太方便咋… 而家啲同事成人食零食我都唔參與, 扮晒節食(其實真係要), 已經唔係咁好… 上去玩, 又乜都唔食, 真係好快俾人孤立了!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十三) 有 “ 14 則評論 ”

  1. 我同事見我箍牙, 問」不是小孩子才箍牙的嗎?」 (她是普通話人), 我話只要自己喜歡, 什麼年齡都可以箍牙, 與及做對自己好的事, never too late

  2. 唔緊要喎師兄, 我都係剛轉新工兩個月, 無刻意隱瞞… 每日lunch 都係廁所線牙同洗箍。都有同事見到, 咁我咪話箍緊牙囉, 梗有人會笑. 亦有人會加油, 唔好太上心, 大家少見多怪o者~

    食零食都係攞個氣氛大家一齊輕鬆下, 唔食野咪吹下水囉~

    attachment 我都有上, 同師兄你差不多, 有 10 粒, 由第一副箍已經上左….. 亦係用smarttrack 呢種….. 感覺就頭幾日d attachment 會」刮」…… 咁有attachment 的位置會較難除. 但過左頭兩副箍都慣晒, 師兄你唔駛擔心, 一定掂既~

  3. 其實我已經看過你的日記有個多月, 係未箍牙前看的.
    我也是中女一個…., 因為隱適美太貴了所以用傳統那一類, 牙釘用象牙色那個, 所以
    從外觀看上去不太明顯, 只是見到一條金屬線, 還可以接受… 幸好我的職業不用經常見客. 哈哈.
    由上箍到今只有個多月而已. 暫時只做上顎牙上箍…..所以未感受到其他人說的痛. 但酸軟感一定有的.
    最後, 我想問下大家如果要脫牙的話要脫那一隻, 醫牙建議我脫大臼齒. 謝謝
    箍牙人士加油 !!!!!

  4. 一口氣追晒您的日誌,寫得好好。👏!睇完我決定與老公一齊去箍牙。在箍的過程我就可以用由拜讀您的文章得來的資訊與心得,對老公進行心理輔導支持。我可以順便修身瘦面添。實在感謝您提供箍牙一路以來的心路歷程,仲要文章寫得如此精彩流暢。一位聰明豁達的男性,又燃燒住追夢的正能量,還要擁有發展出和追夢過程相匹配的能力,絕對是一個非常有魅力的筍盤。必能早日覓得另一半!💗

    我的先生也是因為兒時家人並不重視牙齒保養,導致有d哨牙,耿耿於懷,影響部分自信(雖然我催眠佢靚仔😳)卻又未提起一圓兒時的願望勇氣。對箍牙有多種顧慮,並也認為箍牙最好年齡已過。始終有忐忑顧慮。我則運氣好一半,天生上牙過長,外觀美麗,但咬合不正。我認為有夢仍要追,一有能力可以實現就要追!所以當我做出與另一半一齊箍牙的決定後,我感覺是不容易堅持的路。我睇完blog主您的全部文章後,我覺得猶如接過一張地圖,上面標示了通關重點。我會手握這份地圖,箍牙路上不時為自己打氣。(我也已經轉工北上,樂觀的話週末會返港,先生一直在內地,在港有兼讀課程,在香港與內地的日子為1:1)您文章內連約診就診時間安排都寫得非常詳盡,不禁再一次高呼非常有參考作用,感激您的點滴分享!

    1. 多謝你既鼓勵… 你同老公一齊箍牙, 真係聽到都幸福… 兩個人一齊做件咁」有意義」既事…仲有唔駛一個戒口, 一個隨時大魚大肉咁慘, 哈哈!

      原來你都係中港兩邊走既人… 我份工由原來一星期兩日, 急速增加至一星期四日了… 我呢兩個星期, 直情大半時間在內地… 攰到連blog都懶寫… 希望今日覆完啲comment後, 會努力寫返一篇…

  5. I start my first braces on 31 Aug with many attachment(near 20) ~_~;;
    I need to do 27 totally… but I dun feel ant painful… touch wood hehe
    Add oil every Invisalign user ^^

發表回覆

你的電郵地址並不會被公開。 必要欄位標記為 *