男人四十先箍牙 (六十七)

[24.09.2013] – week 76 – aligner (29 + 3/32)

箍牙既後遺症-黑三角, 今日終於出事…

話說今日食飯後, 都同啲同事吹左好耐時間水, 之後去廁所戴返個牙箍, 戴牙箍前照一照鏡…

OH!!!… 出事! 有粒好大既食物殘渣攝實左在上排門牙同旁邊牙齒間既黑三角, 仲係填滿左個黑三角… 好鬼樣衰… 我諗, 同同事傾計既時候, 啲同事都見到呢個醜態, 只係無人當面笑我…

唉! 我其實在飯枱, 食完飯後已經不斷飲水潄口, 原來都無乜幫助… 呢個神秘黑三角, 攝左野入去, 係完全無感覺的… 好彩今次唔係攝菜, 否則真係樣衰多x10倍…

下次無得離開飯枱, 都好應該用牙籤了細心撩下… 免得同類醜事再發生!

唉, 耿耿於懷中… 不吐不快呀!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十七) 有 “ 16 則評論 ”

  1. 師兄~
    睇完你呢個BLOG我都決定箍牙!
    不過睇完晒醫生後難題就黎啦。
    要決定磨牙隙定係MOK 4 隻牙。
    我記得你以前D POST係話磨牙隙,所以你都決定無MOK到??

    1. Hi, 好高興… 我既blog可以令你踏上箍牙既旅程… 加油!

      醫生檢查完我啲牙後, 話我唔駛剥牙… 因為, 我啲牙係向外飛… 所以其實牙與牙之間, 有好多空隙… 所以, 只需要箍返入黎就OK, 唔駛剥… 至於磨牙隙, 係啲牙泊返入黎之後, 有時唔夠位走, 醫生就會定期幫我磨啲牙隙出黎, 等佢地有位移動囉…

      至於你醫生俾你2選1… 咁… 如果可以唔剥牙既話, 當然揀唔剥啦! 但係… 磨牙隙, 同剥牙… free出黎既空間其實爭好遠喎! 你都係問清楚醫生… 到底兩件事有咩分別會好啲… 你自己衡量下邊種會適合你多啲!

      1. 其實開頭醫生都話唔洗剝。
        我都係向外飛左上排牙。
        不過我睇完個動畫唔係向入好多。哈哈,可能我太貪心以為可以向入移多d.
        所以醫生先話想移入多d就要剝4隻。
        不過最後我都決定唔剝啦。
        因為唔想無左咁多隻牙,話晒牙都係跟自己一世嫁麻!
        其他想整牙既朋友仔最開頭要諗清楚剝唔剝啦:)

  2. 我開始左箍牙一個星期, 今日換第二個箍再加attachment, 不過我個case好唔同, 因為我中線唔對齊而要帶77個箍。我見親最多都係50幾個, 我多人成20幾30個, 即係要箍多人一年, 箍完都要3年…… 真係好漫長呀!!!!!
    岩岩加左d attachment覺得好刮口, 可能因為有隻爆牙, 所以食野會刮親, 搞到我頭先食完飯就想快d帶返個箍。反而帶住個箍就唔會有刮既情況。

    1. 嘩… 你77個箍… 比我仲要多十幾個… 俾你羸左!

      我初頭加attachment都好唔慣, 好容易咬到咀唇… 我諗完全係自然反應, 唔駛驚… 我經過兩三個月, 已經習慣左… 我同你一樣… 戴返箍之後, 啲attachment就唔會刮到個咀… 仲有, 戴左箍之後… 亦都唔會咁既咬到唇… 真係神奇!

      加油… 雖然時間長… 但… 其實你啲牙慢慢移緊位… 去到廿零三十個箍, 已經會同以前好大分別… 已經靚好多, 唔駛心急… 唔會去到七十七個箍先見效… (我經常都係咁同自己講, 而且, 都係事實既)

  3. 其實不論箍唔箍牙都可能出現此情況呀,仲要回想起由唔知幾時起sip入去果下先激死!所以我同好朋友之間,吃完飯會一齊E起個嘴笑一笑,不過,可能男人比較難咁樣-_-#

    另外,我想問下你幾時知你要另外印模,重新戴一set架?佢唔係一開始就計好左嗎?

    1. 咁你岩… 我地男同男食飯唔會咁做(向對方笑), 同女更加唔會囉… 但你講既情境, 食完飯互相E起個咀笑一笑, 都幾」可愛」…

      我去到29個模, 醫生就幫我重新印過一套模了… 因為醫生在我廿零個箍既時候, 發現牙箍與牙中間既虛位越黎越大… 相信如果繼續用以前印落套箍… 箍出黎效果可能無預期中咁好…

      因為啲位已經開始唔準確… 醫生話, 呢啲都係好正常… 療程越長… 電腦計出黎既偏差會越多… 咁佢咪幫我造過一套模囉… (免費, 感動中)

      我上一套模, 原本有46個… 我戴左29個… 新呢一set, 共有32個… 我已經戴到第4個了…

      仲剩28個… 仲有好漫長既日子…

        1. 無喎… 頭兩個箍真係幾fit… 無乜空位… 當然… 相比起我舊箍既空位達到成mm咁闊… 我接受唔到… 新箍就算有, 都好唔明顯… 我無特別去留意呀… (當你唔特別留意都睇到有虛位, 就係好有問題了)

          1. 死啦,我門牙有一隻都幾明顯!波波仲話戴戴下會無,我依家第二個箍都仲見到
            {(-_-)}

          2. 其實我都有chewies, 不過, 我接受唔到咬chewies既」吱吱」聲… 手管都楝埋! 最後都係無用… 零願得閒就上下齒咬合下算數, 希望唔會再出現」離箍」既情況啦!

  4. 嘿!攝條菜還好,我是攝了一整條芽菜!一整條芽菜橫貢喺我排箍嘅上邊,我個樣一定好搞笑!﹙好了我沒有自拍下來別期待照片!﹚我同事都在笑XD 這都不是醜事,箍牙必經的呀,有機會就第一時間刷牙好了!

    1. 芽菜又真係攪笑左啲… 你既鋼線又真係層架一樣, 係一個好好既收納空間…

      我自從戴左invisalign後, 我出街唔敢飲有色既飲品, 因為個牙箍好似一個透明膠兜咁… 我怕啲有色液體留左在牙箍內… long long下… 被人見到就超樣衰…

發表回覆

你的電郵地址並不會被公開。 必要欄位標記為 *