男人四十先箍牙 (八十)

[23.03.2014] – week 102 – aligner (29 + 14/32)

最鍾意就係週末, 無乜特別野做… 可以訓到自然醒…

今朝九點零, 太陽從窗簾間滲進房內… 感覺好溫暖… 當然, 另一原因, 係我貓星主人仍然懶左在我枕頭上…

自從入冬以來, 我家主人對我寸步不離, 由梳化, 電腦椅, 直至床上都鍾意黐住我… 凍既日子, 主人會訓入我被窩內, 好似今日無咁凍, 佢就鍾意訓枕頭…

想起近日在網上見到一張貓貓鍾意同主人一齊睡枕頭既漫畫… 我就隨手拎起部電話, 同主人黎張selfie… 影返同一個feel, 我自己都好鍾意張相, 連忙開心share到facebook上…

無心插柳, 竟然收到唔少既like同留言…

最令我感動既說話… 莫過於有朋友讚我啲牙靚@_@」, 仲唔止一個… 我期待左四十年既聲音,  差啲感動到喊出來… 我發夢都無諗過會有人讚我牙靚… T_T

細心睇返張相… 陽光打落新牙箍度(尋晚先換架), 啲牙顯得特別雪白… 留心啲, 仲會睇到牙箍既像筋都係度添!

20140323

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (八十) 有 “ 10 則評論 ”

  1. 兄弟, 仲記得我嗎? 內箍果個呀!
    真係好快, 唔經唔覺我都箍左1年半了, 叫做完成左一大半.
    睇住啲牙變齊, 講真, 個人都多左自信心,
    而且笑多左, 尤其係影相時E起崩牙笑, 真係好開心呀!

    雖然見唔到你全相, 但睇一半, 發現原來你都KEEP幾好喎!
    你最近有冇識到女仔呀? 加油呀, 我正努力中!
    不過, 活到我地咁既年紀, 其實最緊要開心! 我早排一個死黨去左滑雪一星期,
    雖然兩條麻甩佬, 但真係玩得超開心.
    去箍牙, 其實都算係令自己開心的一種, 不過一開頭就痛苦啲….哈哈!

    1. mac兄, 我當然記得你啦… 估唔到, 咁快… 我地就識左超過年半… 我諗你既牙已經變得好齊啦, 應該仲會快過我完成添! 我絕對feel到你感受, 現家做人多左自信, 好多時… 「以笑遮醜」, 就真係有效, 好過以前 「以笑遮醜, 仲更醜 :p」

      我最近好積極識女仔了, 畢竟都四張野, 係時候認認真真搵另一半… 都識左啲既, 有待發展啦, 自己工作都好困身, 衰啲講, 拖都無乜時間拍, 拍我都驚好快散… 要另一半真心體諒先掂呀…

      你話正在努力中, 點先? 係咪追緊? 定有鎖定目標呀? 聽到都鄧你高興…

      努力呀, 希望早日收到你好消息!

  2. 之前已經有睇你個BLOG了…你D牙仔真係齊左好多好多^^
    我都好想箍好耐了, 但我媽成日都反對..><
    我好想今年唔理媽反對, 實現這個心願~~
    你可唔可以話我知你係邊間牙醫診所箍的, 同幾錢, THX~~

    1. 下? 阿媽反對? 點解呀… 牙齒靚左, 對將來任何事幫助都會好大的… 好好同阿媽傾下啦, 如果要佢資助既話, 否則… 其實你自己可以話事啦! ^_^
      已pm

  3. 我20幾歲都箍緊牙^^,而家係 13/32
    初時同朋友講起話想箍牙,比朋友話:咁老先嚟箍?效果無細細個箍的好。

    睇你個blog 好正面呢!大家一齊努力!

    *箍牙半年我都係得塊面瘦左好多炸,有咩方法可以好似你咁減磅?

    1. 二十幾歲… 箍完仲大把時間靚喎!

      減磅, 其實係需要節食, 做運動… 箍牙, 只係幫到部份啦, 戴住個箍, 係會食少左好多零食… 所以就幫到少少手咁啦!

      你感覺到瘦臉咪好囉… 塊臉瘦左, 個人就顯得瘦架啦… ^_^

發表回覆

你的電郵地址並不會被公開。 必要欄位標記為 *