男人四十先箍牙 (八十六)

[24.07.2014] – week 119 – aligner (29 + 21/32)

原本打算星期一覆診完畢, 就打blog… 可惜睇完醫生都成十點半, 返到屋企已經太攰… 第朝一早又返大陸… (下刪一萬個理由), 最終拖到今晚先的起心肝打blog…

去到今時今日, 箍牙生活已經踏入最後直路… 只剩十個咋…

星期一晚, 約左夜晚十點鐘… 公司唔太多野做, 仲有時間返屋企食飯換衫沖涼刷牙,先再出返去睇醫生

九點九去到診所, 今晚出奇地少人… 平日坐得滿滿既等候室, 只得小貓三隻, 加埋我就四隻…

果然, 等左唔夠10分鐘, 就已經可以見醫生…

已經記唔起, 上次黎係幾時… 大約都已經有三個月…

護士安排左我坐上治療椅, 牆上大電視顯示住我兩年幾前既相片, 當日既我… 影左正面, 側面既相, 仲要依起棚哨牙笑…

當年仲係發福中年… 睇住當年滿臉」福相」既我, 我真係好想叫姑娘」轉台」…

另外, 大電視上亦顯示住我當年口腔照… 已經唔多記得, 原來當年既我… 牙弓係一個好尖既V字…

兩年時間, 真係過得好快… 回想起, 當年諗… 唔知箍兩年時間點過… 點知… 無啦啦就已經過左兩年…

但仲未箍完 =____=」

正當腦裡響起薰妮既」懷念過去常陶醉一半樂事一半令人流淚」既旋律… 醫生就突然係我後面打招呼…

佢第一句就話: 「嘩, 你做咩攪成咁呀?」

其實呢句說話, 我近期都成日聽… 因為近期多左個興趣, 個個星期日去射箭, 所以, 曬到成舊炭咁黑…

我以為醫生驚嘆我一臉古銅色既肌膚… 點知, 佢第二句就話… 「你啲頭髮…」

醫生, 又講中一眾中年男人既死穴… 我心諗… 死? 唔係佢見我後尾枕好稀薄下嘛?! 雖然, 我仍覺得自己算係同年齡之中頭髮濃度同髮線適中…

我連忙: 「下?… 咩呀? 唔好嚇我喎…」

好彩, 最後醫生講左話: 「你多左好多白頭髮喎!」

我即刻個心舒暢晒… 証明, 白頭髮對中年男人唔係咩致命傷… 有時, 多左白頭髮, 倍添幾分滄桑感… 可能對中年男人黎講, 仲添多幾分魅力…

好… 自high說話唔好多講… 講返正題…

醫生例牌同我傾下啲牙既狀況, 例如咬食有冇問題, 換箍有冇痛之類… 基本上, 我每次答案都雷同及巧合, 都係答相同…

講到橡筋問題, 我話俾醫生聽, 我已經好多次冇用橡筋… 正當有千言萬語既怨言湧上心頭, 準備講之際… (想話俾醫生聽近期根本戴唔到橡筋, 及不斷被橡筋彈親牙肉)

醫生就同我講, 都唔駛再戴橡筋了, 啲牙都好齊下了… (個心團火即刻淋熄左)

聽到醫生咁講, 當然有無形既開心… 一來聽到以後唔戴加橡筋, 又唔駛煩, 二來聽到醫生都話啲牙齊… 唔開心就假…

之後, 醫生再檢查牙石… 話我再有改善了, 上兩三次, 真係啲牙石多到俾佢奚落… 上一次, 已經話我改善左… 今次, 連我自己都覺得好少好少… 最後, 醫生都好心再幫我洗埋呢三個月, 僅僅積左既少少牙石… 洗左約半分鐘… ok啦!

洗完牙之後, 醫生再同我講左句… 「咦? 你啲頭髮少左咁多既…?」

=_______=」 大佬, 呢句好致命喎…

原來, 佢係望到個電視上面, 兩年前既我… 當年, 我個髮型仲係斯文教師西裝分界look, 的確… 係幾厚下…

如今, 我原來已經同醫生剷到一樣高既青… 呢啲就係醫生講既」少頭髮」… 嚇得我丫…

醫生今次再俾多六套新箍我… 我再下次黎, 將會係10月幾既事了…

醫生話, 箍完牙就要做retainer了…

我心諗, 其實… 都仲有一大段日字喎… 連埋21號, 一共有12個… 攪得黎, 我都41歲生日了! 呵… 真係前後渡過4個生日…

最後, 姑娘好好心機咁俾左6套新箍俾我…

仲幫我順序將啲膠袋釘埋一齊, 仲叮囑我小心被啲釘吉親… 哇… 咁好態度, 又細心, 真係有少少鍾意左佢…

唔知係唔係時日無多… 我臨離開診所, 竟然有少少唔捨得… 覺得間診所好溫暖, 醫生好風趣, 啲姑娘好親切, 啲病友好靚…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (八十六) 有 “ 41 則評論 ”

  1. 這篇好長!年紀大,有白頭髮,都係對女人既致命傷。講左出來分分中即刻無左半條人命。
    恭喜你進入直路,牙齒變齊之後要好好珍惜呀!我想問一下,打麻醉針的時候痛嗎?
    最後,預祝你之後有又白又齊的牙齒,我地一齊鼓掌,開香檳~(撒花

    1. 女人染髮都ok啦, 染左就唔多覺白髮, 不過我比較鍾意黑髮, 又唔想用美源髮采立即變黑… 唯有默默啞忍啲白髮…

      我印像中無打過麻醉針喎, 我無剥過牙, 鉏牙隙下下洗牙都係硬食… 有時痛到標眼水…

  2. 今個星期開始箍牙,箍咗兩日,用舊鉄線方法,覺得好辛苦!今曰先至開始留意Invisalign! 未讀晒你個blog, 想知辛唔辛苦?要4年?我都係成四十歳先嚟箍牙,箍完就可能啱啱四十!

  3. 你就好啦, 入直路啦, 我箍了一年零兩個月, 上次覆診, 醫生話我進度緩慢, 聽了好傷心, 鳴…你個醫生咁好, 幫你清牙石, 我個矯齒醫生分得好清楚, 唔會幫我清牙石, 少少都唔會; PS 靚果啲唔係病友, 係箍牙友, haha

    1. 可能飲食習慣問題? 或者係牙齒整齊程度? 我近半年, 啲牙石問題小左好多… 有時啲野, 做多少少, 就會好影響客戶對醫生印像… 隨時一個傳一個, 介紹朋友比醫生… 如果乜都斤斤計較, 隨時因小失大囉…
      P.S. 嗯, 咁你都應該係靚果啲箍牙友 :P

  4. 你的醫生真係好,我的醫生就不同了,話就話包洗牙,但都是她決定幫不幫你洗的,箍了一年了,都只是印模前幫我洗過一次吧,其實我不求大洗但都應好像你咁偶然洗分鐘都好吧,而且每次覆診都趕頭趕命,只用幾分鐘就話走得,其實我本來是想看你的牙醫,但咁啱那段時間他暫停收新症T.T。
    PS: 樓上講得對,是箍牙友吧。

      1. 可能是那段時間吧,上年初我打去約時間做諮詢,但姑娘話醫生這兩個月都暫不收新症,叫我兩個月後再打來問吧,因我轉看了另一個醫生,後來還收不收新症我不知了。

    1. 暫停收新症… 嗯, 都係一個保持質素既方法, 我相信, 錢係搵唔晒既, 況且我相信醫生都賺到駛唔晒了… 最重要, 都係serve好每一個箍牙友啦!

    1. 我都係戴住食,同朋友出街食飯都會事先講定俾佢地估知個牙套會攝好多食物,叫佢地見到唔好驚!^_^但笑時都會用手遮口費事咁肉酸囉(~_~;)
      通常踏入每個箍的第四五日就會什麼都食到唔痛唔牙軟的,不過有啲嘢就唔太食到,例如炒年糕,怕甩牙套,仲有雞全翼又唔會食,因為對於戴住牙套嘅我來說有點複雜啊!

    2. 我都戴左箍兩年半, 真係極少極少戴住箍食野, 因為真係感覺太奇怪了… 有時迫不得已戴住箍食, 除箍既時候, 發覺攝埋左大量食物殘渣… 掃埋當宵夜都OK呀… (嘔) xddd

      1. 我下排門牙好疏,依家糾正緊,由第3個箍開始門牙就搖搖地,問過醫生話正常,移動中,不過除帶箍時小心,如果唔係有機會整鬆,叫我最好帶箍食野,依家已經第6個箍

        第一次帶箍食飯感覺好核突,冇咀嚼過就吞左落肚,開頭覺得已經冇左食野嘅樂趣,依家兩個月已經習慣左,同埋唔驚整到d牙

  5. 恭喜進入直路,渡過4個生日-真係唔簡單呀!我日望夜望都想快啲箍完,今個箍出了問題攪到遲咗幾日先換箍,個心已經好介意即係成個療程要delay幾日!唔知到時牙醫話我要加箍我會有幾灰呢⋯(雖然都有心理準備)
    唔知呢個問題普唔普遍,我呢個箍其中一個attachment凹位細咗一半,攪到根本戴唔到,試戴時仲超痛!但之後的箍又正常番,好煩!攪到要去牙醫度磨細粒attachment先戴到,但到要換下一個箍時又要去多次整番粒大嘅attachment!超無奈的!
    我而家仲有十幾個箍先完成,一起努力啦!(但我估我加箍機會都大)

    1. 加箍無乜所謂啦… 反正都箍左咁長日子, 有時候我反而諗, 無左個箍會唔會唔慣呢… 聽有朋友講, 療程過後只用retainer, 但每晚戴retainer都越黎越緊, 即係話, 一唔戴箍啲牙就亂咁走… 諗起都驚驚地

  6. 你好! 我是博雅公關(Burson-Marsteller)的Tiffany。希望與你聯絡有關你正接受的隱適美矯齒療程, 如果方便的話,希望你能留下電郵, 以便詳細解釋。你亦可致電2963 5682直接與我聯絡。專此候覆。
    Best, Tiffany 2963 5682 tiffanybmhk.chan@bm.com

發表回覆

你的電郵地址並不會被公開。 必要欄位標記為 *