男人四十先箍牙 (八十五)

[29.06.2014] – week 116 – aligner (29 + 19/32)

本blog又休息左6星期無寫… 真係唔好意思… 戴箍已經無乜特別事好寫… 事實呢6星期真係忙, 忙工事, 亦忙認識女仔… 其他時間, 主要都係新興趣射箭(真架), 同釣魚(手機遊戲)

上兩星期, 發生左件事… 其實應該寫blog, 不過真係無時間, 所以… 一直延遲到今日放假, 兼夜晚無街去… 先乖乖坐定定寫下blog…

件事, 源於我老細同我一齊有個新興趣, 就係射箭… 有一晚, 我地一齊去睇射箭用品… 之後一齊去食飯…

食飯例牌動作, 我就係偷偷地去廁所除箍… 到而家, 我一直都無對任何同事講我箍牙既事… 除左有一次在廁所被一個同事撞破外, 其他時間, 我箍牙一直都係一個在公司既小秘密…

當我除完牙箍, 出返黎坐低既時候… 我老細突然問左我一個問題… 就係…

「你箍左幾耐?」

我老細呢一問… 其實都令我有啲突然…

我老細都留意到我臉色噩然, 所以佢補左一句… 佢以前都箍過invisalign, 所以好耐之前已經留意到我有戴箍架啦… 只係無特別出聲…

當呢個小秘密被識穿, 我地交換左好多箍牙既趣事… 同埋, 我老到而家都繼續有戴retainer, 佢係戴膠既, 都爛過兩次, 又要再換… (我雖然未到戴retainer時間, 但我都已經諗好左戴金屬版喎, 訓覺戴, 唔駛透明啦 :P)

原來我老細以前門牙有條隙, 影相笑都特別尷尬… 佢都係三十頭先箍… 箍完牙, 而家已經被喻為公司數一數二最靚仔既同事, 真係幸福, 你話啲牙靚幾大影響呢…

其實, 我地亦都傾左唔少追女仔心得… 估唔到, 講箍牙… 兜兜轉轉都係去呢個話題, 哈哈!

最後, 分享一樣奇怪既問題… 我唔肯定關唔關箍牙事… 就係… 我發覺我將口盡打開(最大最大)既時候, 感覺好緊, 同好攰… 唔知係唔係牙弓型狀改變左既關係? 定係我咀嚼既方式, 呢兩年改變太大? 引致某部份肌肉退化左呢?! Orz…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (八十五) 有 “ 11 則評論 ”

  1. 終於都更新啦!射箭我淨係射過幾次,恭喜同老細有共同興趣,可能工作上都有幫助?比老細發現個一刻個樣肯定好好笑,多謝你覆我既e-mail,正考慮去資詢一下自鎖式的,雖然會有啲醜,但係我仲有的是青春!

    1. 對工作上有幫助… ummm, 我個case就未必啦, 因為本來同事間已經無乜隔膜… 反而好處係返工都可以傾下射箭既趣事/器材, 有利於keep住呢個興趣…

      自鎖式? 係點架? 不妨向大家介紹下…

      有青春當然無敵啦… 箍完仲有大把時間靚!

  2. 係啊, 我都有咁的問題, 不過係過埋定位器兩年後,而家只要睡眠唔夠, 就會覺牙肉等別緊…
    同埋好不幸的係,兩年後,冇再需要帶定位器後,牙齒慢慢移位,昔日俾磨過的表面外露出來,成日積牙石….真係好慘…感覺好似仲差過未箍前,至少未箍前, 我冇一隻牙的表面係磨過…而家隻隻都磨到表面唔光滑, 積牙石….
    然後,牙醫先同我講話想保持, 個定位器要帶一世…唉…當初又話兩年就得…最慘係兩年帶同一個定位器己發臭變黃…換個個要加錢…咁帶一世…要幾多錢….如果要係咁keep 住換…..

    1. 聽你講完, 定位器要戴一世… 真係好驚… 無野驚得過」一世」呢兩個字… 不過我其實都有諗, 有時唔戴箍3-4個鐘, 再戴返箍, 都已經感覺好緊… 証明一唔戴箍, 啲牙仔就會唔聽話亂咁走!
      錢唔係最重要, 最重要係… 「無自由, 失自由」… 我諗, 如果唔戴定位器一頭半個月, 可能… 真係」一世」都戴唔返, 除非重新倒過模…

  3. hi 我五月時用傳統牙箍的, 因牙醫話我不太適合 Invisible, 上星期覆診,我主動問他是否真的不可用 Invisible. 牙醫話而家的進度, 我也可於九月開始用 Invisible. (其實我平時說話不太露牙肉的, 連同事也不知我用傳統牙箍), 您會點睇呢?

    1. 哦?! 如果你連平時講野都唔太露牙肉… 戴傳統箍都竟然無人發覺… 其實你既考慮就只係… 用傳統牙箍有冇影響你生活, 例如食咖喱怕唔怕漬住啲位刷唔到, 用唔到牙線, 又甚至想唔想依起棚牙影相時都見唔到箍囉… 如果都唔係考慮因素, 其實用鐵線會比invisalign快好多, 又平!

  4. 定位器要戴一世真的沒有誇張. 我個DR 也有對我這樣說. 我十幾年前第一次箍牙, 之後, 無帯定位器, 走了位,現在又箍過

發表回覆

你的電郵地址並不會被公開。 必要欄位標記為 *