男人四十先箍牙 (八十七)

[26.08.2014] – week 124 – aligner (29 + 23/32)

如果呢度有人等我更新blog, 等到變化石, 我只能講萬分抱歉…

無錯, 近半年我真係懶寫blog… 除左返工, 空閒時間唔係去玩興趣, 就係去識女仔, 希望大家原諒我, 我依家成四十歲人都未有女友… 實在應該係先做正經事, 再寫blog的… 係咪?

眼見一日過一日, 個blog日日都keep住有固定page view, 我就感覺到, 真係有人默默咁支持緊我, 希望我分享多啲箍牙經驗…

不過老實講, 箍左都兩年幾… 真係已經無乜特別野可以寫, 有時甚至可以講, 箍到麻木晒… 牙箍變左我老朋友, 有時戴箍除箍, 自然到唔需要特別去記住…

由於我既食飯時間極度唔穩定… 同戴箍時間唔夠22小時一日… 我通常會箍2星期零3日… 即係一共17日… 枉費左診所姑娘親手幫我編好晒既換箍日期(14日)… 我會用筆重新編排一次… 寫返落個箍袋, 然後在手機上set好換箍日期提示… 咁就唔驚過期唔記得換箍…

今個星期換左新箍(23號)… 竟然箍左兩日仲覺得好緊… 好鬼酸軟… 攪到連切開既蘋果都趙唔係好到… 我已經連續幾日食蘋果做晚餐… 換箍前後分別真係好大… 之前仲可以shock shock聲咁趙蘋果, 換左箍後… 就只有吞蘋果… 好似蛇咁…

至於點解食蘋果做晚餐… 都係為左清下腸胃, 皆因成日返大陸同啲同事大吃大喝, 多鹽多油, 真係肥左好多, 個肚… 趁夜晚, 有心情, 有少少毅力就自己斷下肉… 食下蔬果… 留返啲quota去大陸食

另外, 踩左兩年既小單車… 終於換左部大單車… 又有新屎坑令自己個個星期六都去踩下車, 運動下… keep下fit…

上星期同朋友去踩單車, 朋友幫我影左啲相, 後尾放在facebook tag返返俾我睇… 原來我踩車途中經常都開心笑, 露出牙齒, 睇返相我自己都覺得靚…

以前… 朋友幫我影既相, 如果見牙既… 我通常都會覺得難睇, 好想快d delete左佢, 特別係在facebook上tag我名… 我會好快咁untag左佢, 驚死俾人見到棚亂七八糟既哨牙 >_<

bike invisalign

好啦, 時間都唔早, 又打住咁多先… 聽日又要返大陸工作了!

真心希望下篇唔駛再等一個月… 否則我好驚箍完都寫唔夠100篇 xddddd…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (八十七) 有 “ 28 則評論 ”

  1. 你好!, 我都剛開始invisalign, 依家2/52, 一口氣睇左你既post 兩次, 得到好多寶貴經驗. 我係兩隻門牙」V」 字飛出o黎 , 都係細細個想箍牙, 不過屋企人怕我痛,(當時話要脫牙), 所以一直都反對… 今次牙醫話可以唔駛脫牙, 只不過要由大牙開始慢慢」tun」, 小弟都三十有五了,牙醫話要大概兩年.. 下星期就上attachment, 有O的緊張同埋怕好難除….

    p.s.今次踩單車張相真係型喎!

    1. 2/52,,, 真係一條漫漫長路… 不過其實去到十零廿個箍, 就會好習慣, 習慣到人箍合一… 到時, 啲時間就過得好快架啦 xddd

      上完attachment後, 心理上係怕好難除的, 但當你知道啲attachment咁鬼堅固既時候, 你就好放心暴力去除了! xddd 我而家經常單手在街上除箍, 兩秒都唔駛就上下除晒… 對於唔方便去廁所除箍, 又要趕同朋友食飯, 就好好用…

      最後, 多謝你既讚賞, 飄飄然中… XP

  2. Hi, 你好, 一路都很想箍牙, 但怕會嚴重影響日常生活及工作, 看過你既BLOG後, 對invisalign箍牙了解加深咗好多, 可否send牙醫既details給我, thanks so much.

  3. Hi, 我今日係第三日帶」cool」, 好多謝你的分享呀! 我睇到一半就忍唔住跳咗去最update 呢個post
    仲以為你已經cool完添! 加油呀! 應該好快完成喇!
    你張近照的牙齒已經好整齊喇, 有好明顯的改善, 讚!!
    超級多謝你的分享呀!!!!

      1. 期待你的回覆好耐了! 而家情況OK
        第三日變成咗第三個」cool」 喇! 哈~而家習慣咗好多
        有朋友見到我cool得幾好, 問我意見, 我直接介紹咗你個blog畀佢呀!
        再次多謝你!

        同埋呢, 我覺得我地係同一個牙醫 =]]

  4. hi! 我n世之前留言俾你問你睇邊個醫生架
    我仲話睇晒你所有post! (算啦你應該唔記得因為我都唔記得我當時留咩名lol)
    anyway我最後都揀左傳統方法上箍因為我想快d箍完!
    我都開左個blog記錄雖然好懶update.. hahaha

    1. 雖然你唔記得當時留乜名, 但唔緊要啦, 我follow你個名都去左你個blog都參觀左, 啲相都好傳神下喎, 睇完真係醒晒, 哈哈! 你仲有幾耐先箍完?

  5. Hello guy nice to meet you here :)
    用咗三日睇晒你啲blogs
    我叫Kelly…17歲,因為兩隻犬齒突咗出嚟所以要箍牙…但treatment仲未開始,因為要剝咗四隻小臼齒…
    好多謝你咁忙都分享箍牙嘅療程啊,起碼我有心理準備知道我會遇到啲咩事
    不過你有冇試過戴separators(唔知中文係咩-.-forgive me)? 戴完第二日爆痛><
    希望你快啲識到女仔,工作愉快啦
    Cheers!

    1. 我箍牙前都戴過separators, 當時都覺得痛, 又因為頂住啲大牙, 食唔到野, 覺得難頂, 但原來係少事, 剛上箍時, 原來仲難頂, 不過都過去了, 原來好快會適應, 我現在已箍了一年零三個月, 有時會唔記得左自己箍緊牙, 無晒感覺.

    2. 多謝kelly小妹妹(真係好命個女都有你咁大=_=」), 咁有心機睇晒我既blog…
      separators我未戴過喎, 照字面解, 係咪用黎分開啲牙, 整大條牙隙的?
      有機會都分享下你箍牙經驗…

      1. Wow, 咁咪姐係97?一齊考DSE喇喎xdddd
        唔講呢樣住,separators係jang大啲牙la方便上箍(I guess),個牙醫而家已經同我拔走咗,但到10月中就要剝牙,11月上箍…好驚(其實驚唔知點樣痛法)…我聽人講過箍牙會箍到發燒-.-不過等我考完DSE都開番個blog講講箍牙嘅經驗xdddddd
        睇晒你啲blog係因為想派定心丸比自己姐lol anyway祝大家箍牙路上好運:D

  6. 好耐無留言,都因時間過得真係好快,我第二set嘅套都去到尾幾個。先幾日滿懷著愉快嘅心情見牙醫,點知。。。牙醫話要剝智慧齒。。。。Omg,一路都無話要,我仲好慶幸咁同我想箍牙啲朋友講,未必一定要剝智慧齒,唉,簡直晴天霹靂!聽講剝智慧齒好痛。。。慘!你唔洗剝牙,真係超級好!恭喜你就完成啦!我就又踏入驚青期中!

    1. 遲左成個月先回覆, 我估你都已經成功變成無智慧… 齒既人… 我仲有起碼半年先會完成呀… 希望順順利利完成啦… 希望亦可以寫夠100篇 xdddd

    2. 我係未箍牙前,已經剝唒4隻智慧齒,最麻煩個隻要開刀,其實剝智慧齒後唔舒服既時間最長只係1星期,都係傷口有D痛,比起出智慧齒時既頭痛+牙痛,真係小兒科,出智慧齒時最worse case 係我個口張不開,食野只能用鐵匙勉強塞入去。

  7. 雖然我還沒有看完你的BLOG,但已經好感受你既成功!
    我都係30 歲先學人COOL牙,要脫4隻牙先可以COOL⋯⋯
    因為我除牙套時不小心拉爛左第2個牙套,所以我差2日都痛左第3個牙套。
    慢慢長路,仲有40個等住我。但吾知點解,總覺得個牙套吾FIT甘⋯⋯
    同埋,無牙果4個位,要拉返埋,有D愚公移山FEEL ><
    希望我都可以好似你甘成功就好。加油!

    1. 30歲箍牙, 都比我早成十年… 有我墊底, 大家都變晒唔算遲…
      我無脫過牙, 所以唔知如果牙與牙中間有個窿, 會係咩感覺, 我估, 都會幾有空虛感!
      其實差兩日換箍, 應該唔會有乜大問題, 假如你之前唔係爭得太多時間… 呢個… 我話既 :P

  8. 好開心啊見到你甘開心! 牙齊左甘多但記得都要同我地分享你既心情啊!! 我都箍緊invisalign, 八十幾個箍簡直令人沮喪! 但現在已經39。。。希望好快可以好似你甘..唔驚比人tag!!!

  9. Hi hi
    你好,好多謝你嘅分享呀,寫得好好,我都係岩岩開始50箍嘅漫長世界一星期,好唔習慣,食少咗,飲小左!!(haha 順便減肥)但對我最辛苦既係留囗同牙肉損痛,因我係Telesale,我成日要講嘢,有時真係講到自己都忍唔住笑!!唔知幾時先會冇咁痛苦!!

    你張相我以為賣緊廣告,真係好靚^^

    1. 多謝, 50箍話長唔長… 因為唔需要到50箍, 你既牙已經會睇黎好齊整的了…
      如果你份工要成日講野, 就真係好攪笑的, 其實我都要成日講野, 所以成日都會有咬字不清, 同刮損情況出現, 不過慢慢就會習慣的… 放心!
      多謝你讚我張相, 充滿正能量了!

發表回覆

你的電郵地址並不會被公開。 必要欄位標記為 *