男人四十先箍牙 (五十八)

[23.06.2013] – week 63 – aligner (29/46)

對上次寫blog, 原來已經成兩個星期前既事… 對我黎講… 就好似幾日前咁…

返左新工後… 忙到完全無晒私人時間… 每星期返2-3日大陸… 舟車勞頓, 對時間無晒感覺, 人都癲左…

我既」箍牙」身份在公司仍然未曝光… 可能因為第#29箍每日只需斷斷續續戴12個鐘… 我食飯前就除左佢, 食返後又唔駛即時戴返… 有時去到(人地)放工後先戴返… 完全冇人知…

點解話人地放工後? 基本上… 我在香港office既辦公時間係朝九晚九… 從第一日返工開始已經係咁… 反而上大陸就好啲… 六點鐘啲大陸同事準時閃晒… 連燈都熄埋, 變相趕埋你走… 幾好丫… 食完飯咪返酒店再做過… 都總好過香港做到九點, 十點, 十一點都未食飯…

第#29箍戴左成3個星期… 戴到輕鬆晒… 有時除左5-6個鐘… 戴返又會有啲緊既感覺… 証明啲牙一唔戴箍, 就會偷偷地咁郁… 諗落都幾恐怖…

有晚發夢, 以為訓前唔記得戴箍… 訓醒之後, 啲牙亂晒籠… 惡夢真係無奇不有… 不過呢種夢, 我估都係箍invisalign既人先會發到…

今晚, 原本都無諗住打blog, 因為… 心情真係幾低落下… 不過有啲野又不吐不快…

返左新工後, 我已經無乜休息過了… 包括星期六日及公眾假期, 我每日都係做公司野… 唔係老細迫… 只係自己覺得好難上手, 想爭取時間惡補下, 希望返工有啲功課交下…

新工唔習慣, 一來可能真係年紀大左, 學新野無咁快… 另外一個大問題… 真係同英文有關…

新公司, 好多英文人同事… 客戶全部都係外國客… 雖然我既職位唔係主力傾野, 但工作上少不免都要聽同講英文… 近幾次, 真係成個啞巴咁… 特別係tele-conference, 都聽唔切人地講乜, 自己講英文更加講到一舊舊… 唉… 真係好醜… 做左咁耐野… 估唔到去到呢個年紀先悔恨」少壯不努力」…

今日, 自己走左去」english灘」… 睇下啲英語課程… 嘩, 都幾貴… 二萬幾蚊, 兩年既會藉, 會包括左一啲網上真人對話課程… 同埋另一啲上班房既小組課程, 仲會有一啲課外既興趣活動俾你join… 聲稱絕對令你學英文學得輕鬆…

就好似箍牙咁… 我比人遲左廿幾三十年去箍… 學英文… 都係比人遲努力廿幾三十年… 雖然係咁, 我都係要趁早惡補下英文了!

我英文能力咁差, 我都唔知呢份工捱唔捱得過probation, 不過… 學好英文… 點都會有用既, 話晒… 如果唔中六合彩頭獎, 我起碼仲要做多廿幾三十年野掛?!

又忍唔住講左好多自己野… 多謝收看!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十八) 有 “ 4 則評論 ”

  1. 我之前讀咗3年,進步不大,我覺得攞嗰筆錢請人單對單教你,迫住你講同聽重實際,2萬幾可以請私人教授英語40~50個鐘,保證你進步更大~~(純粹私人經歷分享)

    1. 我今日上網睇左啲一對一教英文會話既補習老師廣告… 大約都係200-400一個鐘, 嘩… 真係貴… 不過如果有效, 都值得既… 謹慎考慮中… 多謝介紹!

  2. 我都夢過自己啲牙出事,係全排連鐵線甩晒,好恐怖!我諗係啲牙郁–>隱隱痛先會發呢啲惡夢。btw我去曼谷玩,發現曼谷原來好多成人箍牙架!仲要係銀色粒粒嗰隻,令我好開心!好多同伴呀!

    1. 成人用銀色粒粒, 可能佢地覺得潮…個個都咁戴, 就唔會有問題啦, 唔戴仲怪添, 哈哈! 但香港就似乎唔多興成人箍牙… 自從箍左牙後, 我都多留意左啲同既牙… 特別係成人… 其實, 好多人都唔理啲牙的… 到左咁上下年紀, 又結晒婚生晒仔… 都由得佢了… 有錢都留返俾個仔供書教學!

發表回覆

你的電郵地址並不會被公開。 必要欄位標記為 *