男人四十先箍牙 (五十二)

[28.04.2013] – week 55 – aligner (26/46)

成四十歲人,其實我一直都唔識游水,因為全家人都唔識,細個屋企唔會帶我去海灘泳池,無機會去游,雖然有時同朋友都會去下海灘曬,但一掂水,自然就會驚… 一年又一年,已經同游水無緣…

近期有個較」後生」既朋友去學游水,話後生,其實都只係比我後生… 都三十幾歲人,既然佢都係」大齡」先黎學游水,咁佢搵個更大齡既我去壯胆,我當然唔會放過呢個學游水機會…

胆粗粗兩個麻甩佬走左去公眾泳池練習池同班小朋友爭lane用… 不過,其實班小朋友細細個,幾歲人已經游得唔錯,個個都請左教練教… 唯有我同朋友係睇youtube再自已落水實戰,慢慢摸索…

落水前,食左小小野醫肚… 因為幾廿年都無落過水,太緊張唔記得戴返個牙箍… 鎖左在locker內,心諗,都係游個零鐘,就算數… 無返去locker拎返黎戴…

唔知係驚定點,去游水嗰晚覺得天氣突然好涼,好似都有18度左右… 但係個身一直都震,落水震,上水後更加震… 震到啲牙一直格格聲咁震… 因為無左個牙箍,又唔敢咬得太緊,心裡面一直好驚啲牙咬得太緊會移位,但唔咬緊啲牙,牙關又一直打震… 唔知點好囉…

就係咁,第一次認真去學游水就留下左呢段牙震回憶…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十二) 有 “ 8 則評論 ”

  1. 康文署有泳班,$100八堂,抵玩,但十幾個上,不過上上下堂會冇左一大班。大部分係女,但我上都見過男,他們都冇乜嘢(畢竟大家都係大人,識諗架啦。。。)。就黎開季,可睇下,雖要抽籤,但唔太難中。可惜我資質差,學唔識,男仔身手靈活可能好些,他們好多到最尾個堂都學識。經歷幾次失敗,我諗我要請私人女教練囉。。。well, i am already over 30… hope miracle occurs
    我都發覺好些家庭係冇學游水這傳統,應該話細個乜鬼興趣班都冇,自己屋企都係,窮係一個原因,父母性格/識見都係一個主因,咁大個本來唔應該仲怨父母。但其實,父母性格,很影響子女的性格/家庭凝聚力,無奈ing

    1. 唔該晒, 你唔講我都唔知康文署有呢啲班, 今日岩岩去睇左, 五月有得報六月既班, 等我去碰下運氣先! 不過唔識咩叫胸泳同捷泳呀? 我初學應該報邊班先岩? 佢網頁又冇詳細解釋, 仲有, 竟然無網上報名, 真係後現代!

      另外, 我都好同意你既觀點, 父母性格好影響子女既性格(關乎日後命運同機會), 我最近同朋友都討論過呢個問題, 唔係話而家先黎怪父母啲乜, 只係事實歸事實, 有啲野從細細個建立左, 大個左唔係真係話改就可以改到! 就他朝有日改到, 都已經錯失左好多從前既寶貴機會…

      1. 胸泳即蛙式,捷泳咪自由式囉。初學者報第一階段,學邊種視乎個人興趣。你可以兩邊報晒,睇下邊樣中籤,中咗先俾錢。一次唔得,可繼續報,因由初夏到九月,它一直有班。但留意,通常係第一班開了,第二班就差唔多截止報名,即它們」互相踏住」。印象中有一份單張,它列出由初夏到九月各班的報名和上課日期,mark在月曆。個人覺得冇得網上報名冇乜問題丫,去屋企附近體育館(開到夜晚)拎+投擲報名表一樣好easy 咋。

  2. is that during the entire invisalign treatment, one can’t wear the aligner to swim? :
    *well, i hv consulted my dentist today and saw the animation of the entire treatment w/ 40 aligners~ at the v beginning, it’s estimated that i’d hv to remove one or two canine…but now it’s not necessary… instead needa trim other teeth (quite a number) a bit to allow spaces for moving them…so anxious now…for the long-waited and long process == and dos and don’ts recommended?!~

    1. 我覺得戴住箍游水應該無問題的, 只不過游完水最好除出黎洗下同潄口, 因為游水成日都吸到泳池水入口, 一定會攝左好多入去箍與牙之間, 你都唔想成日都帶住啲泳池水在口腔掛?

      聽到你話只係磨細啲牙, 唔駛剥, 都鄧你開心, 始終少幾隻牙都好似若有所失咁…

      至於你話箍牙有乜應該做定唔好做, 我諗… 儘量唔好食/飲咁多甜野啦, 除非你成日都帶住牙刷在身, 否則啲糖份長期漬在牙齒上, 又冇口水既洗刷, 好容易蛀牙… 同埋, 自從我箍左牙之後, 我都極小用門牙進食… 例如咬雞肶, 咬蘋果, 刨粟米之類高危動作… 費事影響到啦, 特別係剛開始新箍頭三日, 你想用都根本發唔到力!

      要做既, 就當然係盡量帶夠22個鐘啦, 其實我覺得如果要除箍進食, 一般人都好難戴得夠22個鐘… 一日最小都食三餐, 食前食後都要休息下掛… 2個鐘一定唔夠啦… 不過我諗醫生都係開大數既姐… 我估都有啲空間既… 不過都係, 盡力戴得幾多得幾多囉!

      同埋, 如果需要換新箍時, 仲係覺得舊箍緊, 咁好可能你真係戴得唔夠時間… 就自已就返時間延期啦…

      1. Thank you so much!!!我一直有追看你個blog, 真心覺得你share嘅user exp好到!!! 好期待the first aligner… Hope all is fine ^^ 到時可能真係要極速食3餐!!! 成40個」cool」,我都想按時達標(最好快d timmmm laaaa~~~)

  3. 今日見完Dr,佢話要剝2~4隻大牙,我好驚>.<,佢話有啲人剝牙做矯齒之後塊臉頰會凹咗入去,搞到我唔知點好,佢話有介紹人會有折扣,你可以做我介紹人嗎?

  4. 我都唔識游水ga~好開心牙見到呢篇覺得終於有同路人XD 早排有個frd話教我~佢要我隻手離開池邊我就驚到pk >< 結果上完一堂我都唔識…真係好鬼驚! 雖然個池唔深~
    我都好認同上面comment講, 真係好受父母影響~我父母就係果d冇乜見識既粗人, 所以我細個乜都冇學過, 佢地又唔會帶我去邊度玩同見識, 游水彈琴單車溜冰…我冇樣識, 打牌都唔識因為我阿媽係一個唔打牌既師奶lol 其實唔係要怪責佢地, 我地最多只可以怪自己揀左佢地黎投胎lol 但每個人都的確係受父母影響最深~唉有時都會覺得同身邊朋友相比~自己好似乜都唔識咁:(

發表回覆

你的電郵地址並不會被公開。 必要欄位標記為 *