男人四十先箍牙 (五十九)

[12.07.2013] – week 65 – aligner (29/46)

剛由大陸返到香港, 可以講… 終於捱到返來…

條脷前日唔知幾時, 唔知點解被牙箍界損左… 攪到一講野, 一食野就超痛… 變左食野又痛到食慾不振, 講野更加慘, 邊講邊痛… 仲要黐埋脷根…

直至現在, 都冇同事知我箍牙, 我亦唔想專登講俾人知… 最慘係我份工係由朝講野講到晚… 仲要講普通話, 真係講野講到一舊舊, 同啲同事又未熟… 極度樣衰…

好彩而家可以唔駛戴足廿二小時, 我成日都要偷偷地除低個箍休息下… 唔戴箍, 講野就舒服少少… 一戴左, 我條脷直頭感覺到牙箍邊既鋒利… 用條脷輕輕掂一掂, 都痛到飛起…

可能, 同一個牙箍真係戴得太耐了… 攪到啲邊位開始變變地型…

我已經唔記得左呢個箍戴左幾耐… 我估… 都起碼個半月了!

我諗, set新箍應該差唔多時間做好了… 真係希望診所快啲call我去拎, 我就快忍受唔到呢對箍了… 終於捱到星期六/日, 希望儘量講少啲, 食少啲… 叫」養返好」個傷口… 星期一返工唔想做漏口仔…

另外, 今日搭港鐵時… 在車門玻璃窗既倒影望到自己… 真係瘦晒, 仲係落晒型既瘦… 仲有, 個黑眼袋跌到落地… 睇落個樣好老, 好老… 點算呀?

箍牙箍靚左, 又到對眼… 仲係老態既黑眼圈…

網友們, 除左休息之外(儘量啦, 身不由己), 有冇啲補救方法呀?!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十九) 有 “ 6 則評論 ”

  1. 我有個朋友眼圈黑過熊貓,有人介紹佢呢個偏方,真係有效,你不妨試吓:
    去老萬/老屈買美國出嘅“白宮痔瘡軟膏”,用嚟塗响黑眼圈位置,然後用熱毛巾敷幾分鐘,連續做幾日,有明顯功效,因為痔瘡膏可以加速血液循環,所以有此功效。

    1. 多謝你既建議… 我上網search左一下, 真係有人都話用痔瘡膏係有效, 哈哈… 不過我又唔係好敢試… 好奇怪, 本來係茶xx既, 茶落塊臉… 哈哈!
      我朋友介紹左我茶一隻在屈神氏買既eyes cream, 都唔平, 百幾蚊細細支, 對於我呢啲連hand cream都唔茶既人… 都已經算幾大投資!
      不過, 我黑眼圈越黎越深了… 貴都要試下了!

發表回覆

你的電郵地址並不會被公開。 必要欄位標記為 *