男人四十先箍牙 (五十三)

[04.05.2013] – week 55 – aligner (26/46)

望下日曆, 原來不經不覺已經踏入左五月…

即係話… 我已經整整四個月無做野啦! 自己真係唔覺時間過得咁快… 因為呢四個月, 真係做左唔少大事… anyway, 呢四個月身邊既朋友不斷替我擔心… 話… 「你仲未搵到野做呀?!」

佢地語氣好似世界末日咁… 緊係啦, 佢地個個都要養老婆仔女, 點會明一個單身男既自由暢快感覺?

其實, 真正開始寄第一封信出去… 係四月一日(愚人節 xddd), 到今日, 大約都只係寄左十零封左右啦… 相比起我以前啲同事, 每日迫自己寄五封出去, 漁翁撒網式, 有殺錯無放過既搵工方式, 我自己就唔係太認同…

自從上年份工既不愉快經驗, 我真係想花多少少時間黎搵一份合適既工…

其實寄完信(email)出去之後, 都有啲電話response既… 都係clarify下啲資料(同expected salary Orz), 跟住… 當然潛晒水…

在四月尾, 竟然一連收到兩個電話安排五月2, 3號見工… 大大話話都成年冇見工, 心裡面難免有啲緊張…

而個牙箍, 亦都係一個心理障礙…

一來, 戴住個牙箍… 無論我幾習慣都好, 始終都有啲音發得唔係咁清楚… 特別係英文 -_-」

所以, 諗左都一陣子, 我決定interview時除左佢…

同埋呢… 唔知戴牙箍既您們有冇呢種同感… 就係戴住個牙箍, 成日感覺好口乾, 成日都不斷要吞口水咁… 所以呢, 攪到好似好多口水咁… 成日都感覺到個口有味… 唔係咁想開口講野… XO

所以最好既做法都係interview之前就除左佢; 我直頭係出發前就已經除定… 費事到時臨急臨忙兼顧咁多野…

終於, 尋日見埋第二份工, 暫時都未有其他工見住… 又可以收拾返心情, 應付仲未考完既試…

見兩份工都叫順利, 表現… 中規中矩啦, 不過個市場競爭咁大, 大把勁人做住份工都同你爭… 所以, 唔敢諗得太樂觀…

聽日就會換新箍了… 其中一隻門牙同牙箍既gap似乎越黎越大, 咬埋chewies都冇乜幫助… 我諗, 都好快應驗醫生講既… 到28個箍咁上下就要重新倒模了… 唉! 我真係唔想呀…

倒模, 其實咪即係又要等返兩個月先會有新箍戴囉… 咁即係我既療程又會再延長了…

要keep住兩個月無進展(仲要戴住同一副箍)… 有少少唔開心喎! T_T

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十三) 有 “ 7 則評論 ”

  1. 加油呀!
    搵工同識女仔一樣,要順其自然,適合最重要。(我係咁同自己講的)急、夾硬黎唔會有好結局。

    1. macyau兄, 如果搵工同識女仔一樣(咁慢), 咁我就大鑊了! 即係有排都搵唔到啦, 坐食山崩, 好快飯都冇錢開…

      講開又講, 諗返原來已經分左手一年有多… 好彩, 我只係記得慶祝箍牙一週年… 在”分手一週年紀念日”, 完全冇左件事… 真係算萬幸…

      我年紀都唔細, 無論搵工搵女友, 都唔可以再好似啲後生仔咁乜都試下… 而家, 最重要都係要搵可持續既關係先掂, 人生有幾多個十年丫, 第四個都黎緊… 仲要其中兩個黃金十年都虛渡左… 男人四十至五十, 呢個都真係最後一段黃金十年… 唔可以咁輕易錯過… 我已經盡力做晒最好既準備了! 最少自己唔會有遺憾先啦!

  2. 哈哈,我都覺帶住個箍會易口乾,特別瞓覺時!起身喉嚨會勁乾。
    唔緊要啦,若真的要再等一套新箍,都係為咗有更合適同好嘅效果!咁諗就好啲㗎。仲要記住,你無四個牙窿已經好過我哋好多了!兩個月好快過,到時就有新一套勁fit嘅牙箍了!
    另外,祝你早日找到合適的工作,好好享受現在的自由,畢竟一返工,就會好忙了!
    啊,順便講下,上星期轉第17個箍,出奇地,無𠝹損到,啲邊位完全貼服,真開心,如果每個箍都係咁就好了!

發表回覆

你的電郵地址並不會被公開。 必要欄位標記為 *