男人四十先箍牙 (五十一)

[16.04.2013] – week 53 – aligner (25/46)

2013-04-17_004532

今日login wordpress, 見到大大條happy anniversary banner彈出黎, 提我今日係用wordpress寫blog既一週年紀念…

對我黎講, 今日更加係我期待左成年既日子…

箍牙剛好一年了! 時間真係快… 不經不覺就箍左一年, 兩年既療程… 其實真係無想像中咁長… 唔駛好耐, 又會再過一年…

一年前, 上箍前… 我專登去做左一件事…

呢件事, 我諗一般人可能唔會留意… 一眾哨牙既人, 先有機會去留意… 唔知你地會唔會有共嗚…

由細到大, 食麵包, 食三文治之類既食物… 我咬一口留下既牙印, 係同人地既唔同… 人地咬出黎都係一個半圓形, 而我… 留低既係一個爛溶溶既三角形… 其實我一直都好介意的…

所以我箍牙前一刻, 好直覺就走去麥記買個漢堡包, 狠狠咁咬落去… 留低今世人最後一個三角形既牙印做紀念… 果然, 呢一咬完全做得返個核突牙印出黎… 參差不齊既牙齒, 咬出黎既邊位亂七八糟… 特別係下排既牙印, 真係切得好尖…

一年前既今日, 我決定一年後一定要買返同一款包, 再咬一口睇下有無改善…

IMG_0224r

結果同預期差唔多… 因為啲牙大致上已經泊齊返(只係未收返圓), 所以咬出黎既邊位都算好整齊, 唔會再亂七八糟… 上排既大牙已經無飛得咁出了, 咬出黎都唔會好似一年前相差咁離普… 同埋下排既牙印都已經圓返啲…

如果順利, 其實我既療程應該唔駛去到下年四月… 應該大概下年二月就可以完成…

到時候, 我一定會再食麥記的 ^_^!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十一) 有 “ 17 則評論 ”

  1. 我約咗2號去長沙灣,今次未必見到你了,hehe~~
    好想睇吓你第一個箍同而家個箍有幾大差別,係咪好明顯呀?

    1. 好多人都話箍牙會令臉型瘦啲, 我暫時未係好感受得到… 因為其實我箍牙期間, 同時做運動減肥, 而家塊臉的確瘦返好多, 同啲耐冇見既舊朋友同事食飯, 佢地都不約而同話我真係瘦左」好」多… 唔知係箍牙關係, 定係運動既關係了! 我諗, 兩方面都有貢獻吧!

      其實我最想改善既, 反而係」尖咀」問題, 因為有時影相, 從側面影, 我個咀係尖出黎的… 可惜我個鼻唔高, 襯出黎就變左怪怪的… 希望箍完牙個上唇位可以扁返落黎, 顯得個鼻高啲…

  2. 哈哈,好好笑啊!我真係無留意過食飽個牙印係咩樣。。。你真係好搞笑。放心,下年同一日,個飽一定俾你咬到係留有圓的牙印!

    睇Polly嘅留言,至知我地應該係同一個牙醫,不過我係長沙灣睇,但點解我完全感受唔到你講你個牙醫嘅風趣?每次見佢都好趕,有時佢都無咩講嘢咁。。。我又無問嘢。。。哈!

    1. 其實每次見醫生都係好趕架, 因為太多客了… 可能我係屬於箍牙既」小眾」, 所以醫生會俾多小小關注我, 再者, 我個牙弓型又實在生得怪左啲, 所以醫生可能覺得係一個case study黎, 佢都想成功挽救到我既V型牙弓, 變返做U型掛, 哈哈!

    1. 咬蘋果咁激烈? 我自從箍左牙後, 大門牙已經廢左武功咁… 唔太捨得用佢, 蘋果, 粟米嗰啲直接用門牙既食物, 都已經改為刀叉享用了! 我怕直接用門牙, 唔多唔少都會影響到, 再者, 有時feel到啲牙痺痺地, 我估佢都唔係好穩陣呢!

      1. 其實我覺得門牙可以再好D GA!!!!不過醫生話盡左啦…咁我都OK GE~因為而家可以合埋個口黎訓~無咁口乾!我而家等緊漂牙呀,,,如無意外..你睇個個醫生都會送漂牙GA!記得問佢呀~~~~~~我而家D牙係咁LOR: http://wp.me/p3n7Xu-xc 我覺得都OK GE

  3. 兄弟, 恭喜恭喜!!!!
    我不經不覺都睇左你個blog成年了. 我上左個內箍都已經半年有多了,
    睇住啲牙好緩慢咁郁, 真係好特別.
    你真係講出左我既心聲, 我每次覺得啲牙齊整返, 我都好悔恨點解之前唔早D的起心肝去做.

    箍牙最痛苦的日子係頭三個月,我依家十分適應了!
    借你個blog留一留言: 各位同樣想箍牙既朋友,只要肯踏出去,收獲係一定可以見到的!
    各位箍緊牙既朋友,特別係我地呢種中年男性朋友,大家加油呀!!!!

    1. macyau兄,我都恭喜你,從前聽你計畫去箍牙,至到而家已經箍左半年… 真係鄧你高興!其實永遠都係行出第一步最難,當行左出去,成個世界都唔同晒!
      啲牙慢慢一日一日咁移返正,日日照鏡好唔覺邊度唔同左,係要搵啲相片對下先會感受到啲變化,我以前門牙旁邊左、右兩隻牙一半收埋左在大牙後面,而家已經出返晒黎,雖然仲係哨牙仔,我諗半年一年後就應該可以慢慢退返入去,好期待。

AUTUMN 發表回覆 取消回覆

你的電郵地址並不會被公開。 必要欄位標記為 *