男人四十先箍牙 (二十)

[05.08.2012] – week 17 – aligner (9/46)

自從轉左做公司新project後, 時間過得超快… 兩個星期轉眼又過, 又到換箍日期…

剛過去兩星期, 非常乖, 每日都差唔多戴足22個鐘, 有時甚至覺得超過22個半鐘添… 全因為有時在office叫外賣, 除箍戴箍既時間就可以掌握得更好, 食個飯盒, 15分鐘內攪掂, 連埋早餐, 晚飯加刷牙, 可能真係個半鐘內可以完成晒…

所以, 上一個箍在尾幾日已經非常鬆, 完全無晒束縛感覺…

今晚換上第9個箍, 又係如常既金剛圈感覺… 望一望個包裝, 今次又係有IPR, Attachment同Precision Cuts… 不過仍然唔知係乜意思, 亦唔知有乜用…

其實我上網search過有關名詞, 大約都知道係箍牙既輔助設備黎… 所以正確黎講, 我係唔知醫生點解唔幫我用…

每次換新牙箍, 我都會特別檢查下啲牙齒… 但老實講, 憑感覺, 我真係一啲都唔覺得我啲牙有乜改變過… 唯一可以講既, 係啲牙紋深色左, 唔知係自己心理作用定點… 總係覺得啲牙污糟過之前…

箍牙都箍左三個半月, 為左去證實啲牙真係有移動過… 我拿返第1套箍同第8套箍對比一下… 結果係… 好似有好輕微既分別, 但真係好少好少… 嚴格黎講, 可以講睇到有幾隻牙好似好輕微咁移左0.1-0.2mm咁上下… 除時仲可能係自己幻覺黎添!

上網睇, 啲人好似可以擁有自己invisalign既animation video, 但我連睇都未睇過… 唔知係唔係人人都有既呢? 定係個醫生太hea, 費事俾我睇, 用啲時間睇多個症仲好!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (二十) 有 “ 2 則評論 ”

  1. 嘩!你寫得好好呀 好詳細呀!勁!
    我剛剛才帶第一副 帶左唔夠一星期 係有覺得d牙有d酸軟 不過無痛
    但係條利就大件事喇! 第一日就刮損左 變左非滋 非常痛 個位在利根底側邊 應該是被牙套個邊位界損的 隔左一日 仲流緊血 好痛!而且我的工作是要不停講野 … 所以我一帶住 條利就係咁比下面個套d邊界住界住咁 上面內外都無野 但下面的裡面就大件事 帶左之後條利唔知放係邊好?一郁就界到 真係好辛苦!我都唔知係我本身口腔有d發炎先會咁 定係純粹因為個套! 不過 當我除左個套又真係唔痛 所以應該都係同個套有關!有時當我講得多野 我都會將下面個套除去 只帶上面 因為上面完全無問題嘛!隔幾個字先帶番 我都驚帶唔夠鐘會有好大影響 但是… 我太怕痛了!我無打比醫生問呀 因為我覺得佢都無計!不過 我事前係以為唔個界損 所以先好肯定的做invisalign 所以 而家 好失望同痛苦!!我己經每餐之後都擦牙 早晚更用專for口腔發炎的漱口水 不過都係咁 唉… 以後的日子都唔知點過?因為我的工作要字正腔圓 所以痴利筋己經好麻煩 仲要受刮損利的皮肉之苦 真係… 大獲呀!
    醫生仲話幾日就會無痴利筋 但見你的經驗 好似呢個係不斷循環的問題 好失望呀!
    唯一興幸的是 我大概一年多就完成吧!
    大家一起加油!鬼叫自已貪靚咩!

    1. 多謝你睇我既blog…

      我覺得其實invisalign好容易刮損口腔, 啲邊有時造得唔好, 幾利下, 好易刮損牙肉或者條脷… 我初頭都以為係剛剛戴唔慣先會刮損; 我而家已經戴到第10套牙箍, 仍然有時會刮損口腔…

      一刮損口腔就好麻煩, 因為講野時接觸到破損既位置, 就會痛, 一痛就會就住黎講野, 自不然就會黐脷根… 我份工經常要對客, 真係幾尷尬下… 又無理由咁唐突主動話人知自己正在箍牙呢…

      我而家個箍, 都有你所講既問題, 內側既邊幾利下, 所以條脷經常都要警覺地」就住就住」… 你話你經常因為要講野而除左下面個個套, 咁下面咪會效力降低囉? 除非你下排牙齒較整齊否則真係唔咁建議呀, 下套箍啲位可能會爭好遠…

      用新箍頭3日啲牙一定好酸軟, 差唔多可以講一定會黐脷根… 等酸軟感散去後, 講野又會正常返… 我而家先箍左四個幾月… 全個過程只係過左1/5咋… 仲有排捱!

      你遲開始過我, 但又早完成過我… 真係令人羡慕!

      加油!

發表回覆

你的電郵地址並不會被公開。 必要欄位標記為 *