男人四十先箍牙 (二十六)

[04.10.2012] – week 25 – aligner (13/46)

牙漬一直係我箍牙後既煩惱… 眼見啲牙漬一日比一日深, 實在係無計可施…

我覺得原因一定係出街食飯後唔可以刷牙, 就要戴番個牙箍, 雖然戴箍前我一定會徹底潄口, 但一定唔會夠刷牙乾淨, 啲殘留既食物顏色在牙齒上越積越深… 特別係牙隙…

今晚刷牙既時候, 照鏡時突然覺得下排牙齒隙同牙肉之間既幾個三角位好闊(唔知點形容, 就係牙根與牙根之間牙肉位), 睇落好怪, 好唔順眼… 總之就覺得個三角形窿好大…

急忙搵相機影低佢, 放大張相慢慢研究… 擔心, 到底會唔會係平時用牙線時界得太深, 攪到啲牙肉蝕晒呢?

醒起剛開始箍牙時影過一堆牙齒close up相, 即刻拎返出黎比較下…

對比之下, 發覺原來呢幾個月, 啲牙齒都移動左幾多下… 本來半藏在下排門牙後面左右既兩隻牙都移左出黎, 所以… 睇落就好唔慣, 因為以前門牙旁邊兩隻牙同門牙貼得好埋, 埋到可以講係三分一藏左在背後… 所以而家移返出黎, 三角位啲牙肉可能未生得切出黎… 形成幾個好明顯既黑洞…

箍牙都近半年, 真正第一次感受到啲牙」整齊左」…

好開心!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (二十六) 有 “ 15 則評論 ”

  1. 兄弟, 我醫生同我講過, 佢話我地咁既年紀先箍, 箍好後有一個最大既不能保證問題, 就係牙同牙之間的三角位, 牙肉可能唔會生返出黎….佢話因為牙綘之間既牙肉係好難講的, 尤其係過左青春期, 佢唔肯生, 就唔會生的…..我都驚弟時會咁…不過, 加油呀….tomorrow never knows!

    1. 聽完你咁講, 心情即時沉左一沉, 因為我都有個朋友箍完牙之後啲牙隙好疏, 就算齊左, 都唔係好好睇…

      我仲以為佢係個別事件, 而家聽左你咁講, 似乎呢個」危機」都唔細喎… 不過… 都無辦法, 已經上左船, 將來點, 都真係要睇個天造化…

      努力… 積極面對!

  2. 加油呀!我都係箍梗牙,睇你咁講我都開始擔心我嘅牙肉生唔生得返出嚟,我啲牙縫都好深,又容易攝食物於是食完嘢就一定要用牙縫刷去刷…久而久之都真係幾難搞。但我相信要俾啲時間啲牙肉生返出嚟嘅!
    積極面對嚟梗更加靚仔靚女嘅幾廿年啦!

      1. 我而家先箍咗半年,用梗傳統嘅箍,上排用白色,下排銀色~因為哨得太勁,用唔到透明,下排啲牙又太細,用唔到白色,個樣搞到勁搞笑 :)

  3. 而家先發現原來我之前用手機POST個COMMENT PUBLISH唔到 ><

    我想講~加油呀!如果牙漬好勁可以問下醫生完左TREATMENT之後可唔可以幫你美白D牙。我D FRIEND係趙XX醫生到睇~佢肯幫佢地免費漂白。

    至於牙肉~唔好咁擔心啦,COOL完之後應該OK GE~俾D時間就OK啦。我而家去到最尾的STAGE!前所未有咁痛….你要加油呀!

    1. 咁快去到尾聲拿? 仲有幾耐完成呀? 恭喜晒!

      我都有諗過洗牙洗密啲, 不過唔知箍牙途中洗牙好唔好, 因為感覺啲牙都郁郁地, 洗牙會唔會影響到架? 下次見醫生時問下先…

      1. 我今天才是第一副的第一天, 已經攪到排牙軟哂個人又無哂心機, 忍唔住睇哂你整個blog想知道遲些有什麼問題會發生…有點depressing…但多謝分享!

      2. 洗牙應該無問題~~~~~ 我下個月頭覆診。而家下面個排整齊晒啦~係上面2隻門牙我想再整下…如果唔駛EXTEND個月應該OK了~好緊張

  4. 恭喜! 第一副既第一天, 就係你新生命既第一日… 啲人話頭三副箍只係俾你熱下身, 啲箍會慢慢越黎越緊的, 效果就會越黎越明顯! 努力呀, 為一副靚靚既牙努力!

  5. 今早係隱適美專頁見到你個blog,一口氣睇曬,你寫得好生鬼,有啲又好有同感,笑爆咀!好似話第一,二日除箍,真係以為成粒牙會拔出!而第一次去牙醫到影相要笑到依起排牙,我都勁耐無笑到咁,有哨牙仲要依成咁,有D難為情。仲有話去洗手間除箍會俾個清潔伯伯監視,我睇到呢句簡直笑唔停!因我前2日就係俾個清潔姐姐望晒成個個程,同你一樣,我都估佢以為我做咩要用假牙!
    其實我都成三十幾歲,上去牙醫到見到多係青春少艾,頭兩次都覺得唔太好意思,但後來都見到有男人係到等,宜家再見到你呢個case,即刻唔覺得有咩問題了,所以你都唔需要太介懷,反而人哋可能會欣賞你勇敢,有毅力,真㗎,我同我朋友講左我箍牙後,佢地好鼓勵我,話我講同諗左咁耐終於做,好事喎。
    慘啦,真係要用脹筋?見你話唱唱下歌成個箍彈左出黎,雖然笑爆咀,但真係擔心之後要加粒粒同脹筋啦。因我宜家只係帶第三個咋,嚴格講,可能係第一個,因我要拔四粒牙,拔牙前帶了兩個。上星期三就帶拔牙後有窿的第一個箍,你已經好幸運,我不知幾唔想拔牙,你起碼有得好似佢嘅廣告咁講,箍牙都可以開心笑,我就慘,怕俾人見到四個窿,宜家講同笑都就住,好唔自然,好怪,幾時至到第41個呢?!
    一齊加油啦,我會繼續睇你呢個Blog,好難得咁忙都抽到時間寫得咁詳細,等我地呢啲天涯淪落人有得笑下,分享下,感謝!
    p.s.如果怕有漬又唔方便刷牙,用手指捽下門牙先再涮口,可能會有啲幫助。我聽有啲人講,醫生叫佢食嘢唔除箍,我就唔會試,不過如果仲有一兩日就換箍,都會帶住食小食,我見你話食雞蛋仔嗰次咁麻煩,其實如果距離食正餐刷牙時間唔太耐的話可以試下,食完飲水沖下個口,都ok,不過當然唔好經常,只係勁口痕時一次半次囉。

    1. 多謝你咁有心機睇晒我寫啲文… 唔經唔覺, 原來都寫左半年… 諗諗下, 兩年都唔係咁難過姐!

      我阿妹箍牙嗰陣都經常唔除箍食野, 但我就唔得了… 一來接受唔到戴住箍」趙」野既感覺, 二來覺得戴住箍食野, 會有好多碎藏晒入箍邊… 最後反正都係要拆… 不如除左佢, 食得開心暢快啲, 寧願食完快啲戴返…

      我聽朋友講, 拔牙箍既效果好顯注, 半年左右四個窿就會被牙填補晒… 不過佢係用鋼箍, invisalign就唔知會耐幾多了!

      加油! 你41個箍, 即係同我差唔多時間完成噃…

  6. 嘩, 兄弟, 我冇黎一排啫, 突然熱鬧左咁多既! 證明你真係寫得好!
    至少, 原來咁先發現原來都有一班我地呢種唔後生既人走去箍牙.

    我早兩日都脫左兩隻牙了, 後日會再剝多兩隻, 我想講, 剝牙真係好鬼痛!!!!
    但醫生同我講, 剝完牙開始, 我的箍牙生涯才剛起步, 因為剝完牙多返啲位,
    個箍先會更有力去拉啲牙, 唉, 我都好鬼驚.

    點都好, 頭已濕, 希望大家都一齊努力, 兩年其實好快過的, 只要堅持同有信心!
    我阿妹同我講, 佢話箍完果一刻, 果種開心真係呢一世都未試過.
    所以, 要努力呀!

    1. 你係脱犬齒側邊的牙嗎?點解會痛嘅?我第一次連打針都唔係好痛。不過第二次脫左面,可能醫生唔就手,打針時就標眼水!你可以搵暖鹽水漱口消毒,脫左牙第一星期護理最緊要,唔好食勁熱同生冷及太硬嘅嘢呀。加油!但我估最唔慣係唔知點笑,一笑D窿就現晒形…希望你也快D慣啦!

    2. 我一直都聽人講剥牙好痛, 箍牙仲要剥夠四隻, 聽落都堅驚… 不過好彩我唔駛剥… 執番身彩!

      不過呢, 剥牙都有佢既好處既… 一次過釋放咁多空間, 啲牙就可以郁快啲啦! 唔似我而家咁, 要先推開啲牙, 跟住先再拉其他牙出黎, 最後又再將佢地箍返埋一齊, 真係十足推積木遊戲咁…

      努力! 記住得閒影啲相對比下… 見到有進步, 個人會開心啲!

發表回覆

你的電郵地址並不會被公開。 必要欄位標記為 *