男人四十先箍牙 (二十五)

[16.09.2012] – week 23 – aligner (12/46)

相信近期都無乜邊個唔識韓國PSY既GANGNAM STYLE… 獨特既舞步, 加上輕快既節奏, 好難唔令人想跟住唱, 跟住跳…

可惜, 戴住invisalign加橡筋既我, 一時忘形, 口嗡嗡跟住RAP, 就出事… 下牙箍條橡筋都頂我唔順, 移左位… 甩左出黎兼向上彈, 彈到啲牙肉好痛!

更麻煩既事, 仲係要拆晒啲牙箍, 洗過, 再駁過橡筋, 戴返上去…

今日先剛換新牙箍, 戴同除都十分痛苦… 好緊… 戴既時候仲要小心唔好拉斷或整甩條橡筋…

真係好麻煩呀!

不過戴返好牙箍之後, 忍唔住又繼續睇GANGNAM STYLE… 不過, 只係唔得太盡情… 唔可以跟住RAP, 未能盡興…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (二十五) 有 “ 3 則評論 ”

  1. 兄弟,

    係報告我內箍既情況之前, 我必須讚一讚你in咁貼潮流, 因為上述那位GANGNAM STYLE, 小弟寡聞, 第一次聽其大名見其舞姿矣!

    講返我個內箍, 我已上箍近兩星期了, 本想早小小上黎報告的, 但上星期出左差, 而剛上完箍果幾日, 真係痛到想死! 難聽啲講, 真係乜慾都無晒! 我頭兩晚係要食止痛餅先瞓得著覺.

    經過兩星期既適應, 依家已經好左好多, 只不過, 因為係內箍, 條wire在內, 令口腔既空間小左,
    條脷好容易會界到條wire, 我基本上條脷一直都係損損地, 尤其係脷既兩側, 因為經常同個箍及條wire摩擦, 都仲係會唔舒服. 而且, 最最最大問題係, 有小小痴脷根(頭三日講嘢最辛苦), 而且發s音好難發得好, 亦間唔中會噴口水.

    我有同部份同事講(由於同事其實係一個人最容易、最長久接觸既社群, 單身尤甚), 我keep住問佢地, 關於我講說話既進度, 佢地都話痴脷根既情況持續改善, 我啲朋友直情都無問我, 我開始覺得, 呢個世界上, 其實大部份人都唔會好留意一個人講嘢聲音同發音, 最在意的只有自己!

    食嘢方面, 頭兩日真係乜都咬唔到, 只能食粥, 豆腐及魚肉之類, 第三日我已經頂唔順, 我開始食正常嘢(太硬、大黏牙的牙醫建議不要食), 只係用既時間要多啲. 所以, 基本上食嘢已經ok.

    清潔方面, 真係有啲煩, 同你一樣, 要餐食餐清, 而且, 因為內箍有一條wire, 好容易攝住啲食物, 清潔要一點時間. 但習慣問題, 只係需要時間適應.

    進度-時間尚短, 所以無甚進度, 但呢兩日開始覺得牙開始郁, 因為個感覺係唔同左. 希望快啲見效啦!
    另外, 我唔知係我錯覺還是怎的, 我總覺得晚上瞓覺時, 個箍特別緊,

    我十月中會返牙醫度覆診同拔牙(先脫兩隻, 再下次覆診要再脫多兩隻), 到時再同你分享吓!

    大家都加油呀! 祝您身體健康, 工作順利!

    1. 多謝你既詳細箍牙報告… 箍牙開頭真係好唔慣的, 好似你咁講, 訓覺時特別覺得緊… 係好正常, 因為訓左係度, 頭向後拗, 所以啲牙會特別拉得緊, 我頭一兩日成日都紮醒添, 不過衰懶訓, 好快就適應左…

      至於講s音同噴口水, 新箍頭三日總會時常發生, 我而家已經開始習慣, 比較識用力發音, 不過有時要大聲講野既時候, 難免會噴口水花… 所以要留意環境囉… 例如同客開會, 或者同枱食飯, 就小心說話可免則免… 講電話, 就可以噴個他媽的痛快!

      我相信你用內箍, 食野問題真係好大… 有條鐵線在裡面, 真係唔食野都界損脷, 食野又一定會攝到食物, 就算攝唔到, 都一定會痴到條線, 清潔都肯定勁麻煩, 反而我用牙箍就可以戴同除, 我相信清潔會比內箍方便… 不過, 透明牙箍既幣處就係… 一日笠足廿二小時, 無乜得俾啲牙透氣, 亦都唔可以靠口水清潔殺菌, 我啲牙漬開始越黎越深色… 好樣衰… 唉! 真係好驚箍齊棚牙但變左註牙精…

      努力! 兩年好易過!

venusdc 發表回覆 取消回覆

你的電郵地址並不會被公開。 必要欄位標記為 *