男人四十先箍牙 (九十)

[12.11.2014] – week 135 – aligner (29 + 26/32)

今日大陸回來, 唔知點解, 竟然的起心肝寫blog… 終於脫離月記, 唔駛等到月尾先update…

星期一去左見醫生, 檢查牙齒同拎新箍… 屈指一算, 原來上一次黎診所, 都快將4個月前了… 臨近尾聲, 我每個牙箍時間越黎越長了… 因為有時真係大半日都戴唔返個箍, 有時食野又唔除箍, 啲時間好亂, 所以索性個個箍戴足3星期或以上了, 戴到自己都feel到完成先換…

正如我上一篇講, 我開始試戴住個箍食野, 因為有時出外工作, 未必下下方便喱埋換箍, 就好似上星期公司seminar, 突如奇來既buffet lunch, 我唔係咁方便去廁所除箍, 就戴住牙箍食飯了… 呢次算係戴住箍食得最多唔同食物既一次了… 亦都係令我深深體會戴箍食野有啲野要特別注意…

其實已經沖破左戴箍咀嚼既限制, 無論魚肉菜飯湯都照放入口… 本來順利食完都好地地, 但當及後去廁所時, 先發現牙箍內攝左一小塊既菜葉!!! 笑起上黎在牙齒中央, 異常醜陋… 我在進食時, 已經多番飲水, 怕啲牙物殘留在牙箍, 點知… 原來呢類殘渣真係沖唔走, 用脷都舔唔走的…

急忙除低牙箍沖洗, 原來積埋積埋在牙箍裡面既殘渣, 多到加埋都夠今晚宵夜… 唔可以輕視牙箍既收納能力…

要記得以後, 就算被迫戴箍食飯, 食完飯(或途中)都要特別注意有冇殘渣攝在牙箍之中… 同人傾計就要份外小心啦! 不時最好用電話個自拍鏡頭(男人), 或鏡(女人)照下有冇野攝住最好…

除左難睇, 其實諗下食物殘渣長期貼住牙齒, 衛生問題都不容忽視, 有酸性或染色既食物, 都好影響牙齒健康啦, 我話…

拉開了話題拉左半個宇宙咁遠, 本來講開星期一見醫生既…

如常地在等候室呆等左半個鐘… 輪到我見醫生了…

今次唔知點解, 有成五分鐘都係個女助護招呼我, 望聞問切, 檢查牙箍, 直至叫我試除牙箍, 都係個女助護做晒… 我仲以為診所轉左模式, 由助護幫我做例行檢查添…

五分鐘後, 醫生入黎… 我先知原來世界係無變過…

醫生第一句就講中左我近期心事… 就係… 「你肥左喎…」

無錯, 我認近幾個月係好食好住, 心境舒暢, 心廣體胖左, 又少運動… 無論肚腩, 塊臉都增左唔少磅… 所以對於醫生既」問候」, 一啲都無hurt… 醫生再問, 「咁其實係好事定壞事?」…

兩睇啦, 肥就即係發福, 福氣黎既… 但係我比較鍾意瘦既自己… 感覺精神啲, 同埋著衫真心覺得好睇左…

醫生檢查完牙齒後, 話我又無牙石喎… 咁似乎我開始識刷牙了… 另外, 醫生亦在我既門口幾隻牙隙分別鉏左幾下…

再同我講… 仲有3個箍就箍完啦!…

咦? 咪住… 咪當我小學雞喎… 我今個箍先係26/32… 就算+3都係29咋… 點會係箍完呢?

醫生話… 最後3套牙箍係因應情況先要戴的, 如果係唔係都戴晒, 就可能會令啲牙泊得太緊… 其實我唔係好聽得明, 不過聽到醫生講早三個箍就可以完成, 都係一件值得興奮既事黎… 計下數, 就算我以後每個箍都戴足3星期, 我都肯定可以在下年生日前完成箍牙, 做返個飲食正常既人啦! (如果真係戴到29/32就收工)

今次檢查時間唔算長, 但吹水時間反而長左…

除左傾」養生之道」外, 另一個我比較意外既話題… 就係醫生話旺角診所, 因佔中關係將會結業了… 呢件事我真係完全關連唔到, 但醫生解釋… 話佔中令到送貨車都泊唔到去附近, 送貨都送唔到…

小弟政治冷感, 對佔中無立場… 但我都係佔中既受影響者之一, 我住深水埗, 本來好多巴士都可以經我樓下… 但佔中後, 由於我家住得近彌敦道口, 所以啲車全部改晒道, 繞過左我屋企先回到正常路線, 所以無論邊一方向回家, 啲車都唔再經我樓下… 我都好耐無搭巴士回家了…

我無去細想旺角診所既結業原因是否合理, 反正唔係我既專業, 我唔理解都係正常… 旺角診所結業, 對我亦係零影響(當然可能以後我診所排既隊更長)… 不過我都快過終點了, 呵呵!

下次再見醫生, 應該會係12月尾, 1月既事… 護士話我知, 我下次黎除左檢查牙齒外… 如順利, 應該會做retainer既倒模了… 否則, 就可能會用埋尾3個箍啦… 對我黎講, 其實要箍到32號箍, 我一啲都唔介意… 我真心唔急完成, 反而, 話少左3個箍療程, 仲有少少唔捨得… 就好似話去日本玩7日, 突然話改4日就番黎既感覺雷同…

最後, 提一提香港invisalign舉辦左個」隱適美箍牙分享贏巨獎」既活動… 勝出者可以獲得4日3夜雙人日本沖繩旅遊套票, 咦好吸引喎! 不過又係沖繩… 我岩岩先去完囉… 我心大心細想參加… 最後都放棄左, 因為要公開身份架… 正如放我既blog上invisalign smile club一樣, 我仍然想保持自己既神秘身份, 咁我先可以盡情咁講自己既野比大家知… 係咪?

好啦, 聽日又要走返上大陸… 今次寫住咁多先…

都好耐無回覆過各位網友既comment… 趁有精神… 回覆埋先休息… [因欠債太多, 如果覆漏, 切勿打臉, 再留言比我啦 ^^]

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十) 有 “ 9 則評論 ”

  1. hihi, 多謝你的分享, 我覺得好有共鳴~ 有我都係好大個先cool, 果時諗會唔會太遲, 但cool完都仲有幾十年人做, 所以走左去cool透明牙cool。但我已cool左3年有多, 仲有半年先cool完, e生話我d牙唔聽話, cool完透明後下排牙再cool鋼黎調較咬合既問題, 前後加埋要成4年有多才cool好, 真係有點洩氣, 不過洗濕左個頭, 都要go ahead bcoz no choice. 最後…..要讚下你d牙都cool 得幾好, 同之前差天共地, 現在有氣質了 「笑」!

  2. 多謝你真切的分享!我情況跟你有點像,已過了三十歳,現在準備箍牙。最近因性格不合,忍下心跟女朋友分手了,免得擔誤人家。。。但男生嘛,總要為將來準備一個更好的自己吧,也想襯此時間,實行箍牙。看你箍牙那醫生不錯(心中老實版:平),可否也告知我是那裡那位醫生?謝謝!預祝你完成箍牙,Cool到冇朋友!

    1. 支持你… 其實, 性格合得黎先好走落去… 否則, 其實都係辛苦… 講開又講… 原來我已經快分手三年了, 而呢三年… 我完成左箍牙… 感覺時間真係有啲快… 我亦同ex無聯絡左三年… 唔知佢近況如何呢, 真係想話佢知… 佢個哨牙ex已經變左一個無哨牙既ex… 而且, 生活都唔錯…

      已email你, 請查收

  3. 謝謝你的分享,寫得很有心機,
    我已箍完隱適美,而家正戴retainer,看到你的日記/月記好有共鳴。
    我見你經常被牙箍弄損口腔,你有跟牙醫反映過嗎?
    我剛開始也是,但告訴牙醫後會替我磨平,所有後來新的牙箍太介口,我也會用磨甲的工具去磨平,會戴的舒服些。
    希望可以幫到你^^

    1. 我就無乜點反映過… 可能我份人… 比較隨遇而安, 刮損左… 反而搽下西瓜霜吻百蜜黎解決… 哈哈! 我而家已經開始左戴副好核突既retainer, 每次戴, 除都好核突… 好似好夾硬套上去, 除落黎咁… 唔知你又有冇心得可以同大家share下呢?

  4. 睇咗好多好多篇,好大一個疑問,好想問點解醫生要鉏你的牙隙呢?
    即是磨牙?會損害牙齒的法朗質嗎?
    咪啲牙咪好易壞囉?

發表回覆

你的電郵地址並不會被公開。 必要欄位標記為 *