男人四十先箍牙 (九十四)

[22.02.2015] – week 150 – retainer

今日年初四, 要準備迎接四日假期既完結… 無出街, 留在同屋hea, 同抹單車… 尋日好健康, 聯同朋友同事去左踩成日單車, 成身散晒… 果然, 越少做運動, 越易攰… 肚腩又肥左!

首先同大家拜個年… 祝大家身體健康, 心想事成… 當然, 仲有棚靚牙, 未箍牙既… 就今年下定決心, 去醫生度檢查同落實箍牙計劃啦… 早一日靚都係好事黎! ^_^

不經不覺, 原來已經箍完牙兩星期… 過左一個唔需要戴箍既農曆年… 亦係好自由既農曆年, 因為唔再需要為左戴住牙箍而對食物敬而遠之… 乜野都食得… 但… 後遺症, 就當然係肚滿腸肥… 自己都覺得自己太過份…

另一個問題, 就係… retainer既問題了…

我而家, 只係會訓覺得先戴… 近期適逢假期, 大部份時間, 都可以戴足八個鐘(甚至超過好多添)… 但每次戴同除, 都有啲困難…

每次戴retainer, 其實啲牙都已經free左成日… 走晒位, 所以一戴落去果下… 真係恐怖呀… 以前用膠牙箍… 就算戴落去緊, 個心都無咁唔舒服… 但用retainer, 戴落去… 真係好似夾格頂返齊啲牙咁… 由於retainer係硬膠, 所以… 真係好似監生刮落啲牙度咁… 心裡面真係1000個唔舒服…

同時間, 攝個retainer入去既時候, 發出格格聲… 真係聽到都毛管楝… 暫時黎講, 兩星期都唔係好慣…

除既問題… 就係感覺啲牙有啲酸… 呢種感覺, 在三年前… 除膠箍既時候感受過… 就好似監生拔啲牙出黎果種感覺… 但今次因為有鐵線, 所以接觸到啲牙… 特別難受… 可能, 我有少少牙齒敏感掛?

在呢兩個星期間… 我其實唔係臨訓戴先戴retainer既… 而係我確定左我唔會再食野, 我就會戴上穩定器, 希望爭取更多時間用佢… 可惜, 一戴左retainer… 就會變左口齒不清… 我曾經試過戴住retainer傾電話, 傾唔到一分鐘… 對方已經問我, 係咪食緊野… 因為… 我真係好似黐脷根咁… 講野一舊舊… 攪到要即刻除左佢先可以再講…

我三月請左大假, 諗住渡下假… 而家諗起要帶埋個retainer去, 仲要晚晚戴住… 諗起都灰灰地… 唔知, 過安全關時, 會唔會響機要搜袋呢? 我試過放個金屬小腳架(手指咁大)… 都響機, 海關要反轉我成個袋先搜到個小腳架出黎, 仲問長問短… 今次, 比人搜到副」假牙」出黎, 唔知會點呢可? ummm… this is my… retainer… huh?! ummm… false teeth >_<

好啦… 上回講到, 臨離開診所以姑娘叫住我… (唔通…)

當然唔係問我拎facebook啦… 原來係話, 我已經完成左療程, 佢會送啲潔牙貼我用… 哇, 一送就成袋咁多… 真係感動呀… (其實上次比我果幾支都未用 >_<「)

另外, 仲比左支去漬膏我… 話煙漬/奶茶漬好有效喎… 唉… 唔通我啲牙漬真係咁難睇… 忍唔住要送我咁多美白產品… 呵…!

gift_bag

whitening_strips

cleaning_liquid

不過呢, 其實點解我仲未用啲漂牙產品呢… 係因為我多年前, 睇過報導… 話用得多呢類產品, 其實對牙既琺瑯質一啲都唔好… 因為美白既原因, 係呢類產品其實係腐蝕左表面果層, 所以露出黎既白色, 其實係內層既琺瑯質… 長期咁蝕落去, 其實會令到啲牙變薄… 更容易有牙齒敏感…

當然, 我會再搜集下資料… 先再決定用唔用啦…

又攰啦… 今次講住咁多先…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十四) 有 “ 8 則評論 ”

  1. 我想問你拎facebook哈哈[欠揍麼]
    之前去個牙醫度佢都話我超多牙菌膜,而且我都覺得啲牙有啲黃呢,你就好啦有美白products送,不過你投資咗咁多落去點都會有啲回報嘅😁
    然後星期五又有appointment喇,到時又要較緊個箍了

  2. 其實你諗真啲都不用太感動,羊毛出自羊身上,你的箍牙費包左的,好像我的箍牙費就不包這些贈品,連兩嚿咬牙的膠都另收$20,不過70個牙套連3個固定器都不用四萬,我比較喜歡我的醫生明碼實價,當然我只是講價錢,箍牙還要考慮很多事。

  3. 我同你同一個醫生箍牙, 無記錯醫生話retainer 初初要全日戴, 點解你只在晚上戴? 是否因為金屬retainer驚被人見到? 我都有想過呢個問題, 所以第日做retainer時, 除咗醫生送既金屬retainer, 打算加錢做多套invisalign retainer. 方便出街戴. 多套替換, 分分鍾要戴十年八年.

    我想你每日要戴耐D retainer, 若D牙走位太利害, 姑娘講過牙套同牙齒唔岩位, 而夾硬戴除, D牙有機會會死, 即立刻變黑. Take care.

發表回覆

你的電郵地址並不會被公開。 必要欄位標記為 *