男人四十先箍牙 (九十六)

 

[16.03.2015] – week 153 – retainer

今日終於夠期見醫生… 等左好耐既今日, 可以盡情咁傾訴大牙隙既問題…

首先見我既, 係姑娘… 佢幫我影牙既最新狀態相… 影得好仔細, 係用晒啲擴你個咀唇既器材, 清清楚楚咁影晒你既牙齒, 包括口腔內既相, 一覽無遺… 另外, 除左露齒相, 仲會影埋你正面, 兩個側面既咀部狀況添! 例如合埋咀, 啲牙仲有幾凸咁…

原本影呢啲相, 我都無乜野… 但姑娘一路影, 一路氹細路咁… 「拿… 合埋你個咀咀先」, 「好… 比啲牙牙我睇啦」, 「拿… 放鬆啲牙仔…」 成四十幾歲既我… 真係額頭上充滿左冷汗…

姑娘問我啲牙點, 我都忍唔住講比佢知… 有牙隙, 同埋, 啲牙好似唔太齊了… (包括下面果排牙, 已經有少少排得唔夠圓了!)

無聊地等左醫生約五分鐘… 佢真係忙, 客多到呢…

見到醫生後, 再訴相同既苦… 醫生問: 「你緊係戴唔夠時間啦!!!?」

我就理直氣壯咁回: 「梗係有戴足啦, 每日8個鐘一定有!!!」

醫生就話: 「咩呀! 要戴最少12個鐘喎!」

呢刻, 我靜左… 咦? 我真係完全無印像佢講過要每日戴最少12個鐘喎… 如果係臨訓戴, 點都無可能戴到12個鐘啦… 我每日訓到8個鐘已經係神蹟, 我日日都係迫自己每晚11點戴穩定器, 先叫7點零起身夠8個鐘…

如果要12個鐘, 我真係晚飯都未食完就要戴retainer了… 陰公… 點計都計唔掂條數… (同埋戴左又講唔到野, 點見人啊?!)

醫先又話, 都預左我啲牙會歪架啦, 不過估唔到佢地咁活躍姐…

我都唔知好事, 定唔好事黎… 啲牙活躍… 咁… 我估都好過死屍咁掛 >_<

醫生仲未發揮完… 又再話: 「咁, 你一定仲未有女朋友啦?! 啲牙咁活躍…」

其實我真係唔太明佢呢句既意思… 不過算啦… 我地呢啲地球人, 有時好難明白火星人既說話了… 我都係讀多兩年書先同佢傾計…

重點係… 要再倒模加箍啦… @_@ 雖然, 我其實真係唔介意繼續箍牙, 講真… 無箍牙呢個半月… 我真係有少少唔捨得戴箍既感覺…

醫生一邊準備個牙模, 一邊話, 第日倒模唔再需要咁煩啦… 用部機scan就得啦… (高科技)

不過佢地未上training, 所以暫時仲係要用舊方法倒… 醫生話下次再倒模, 就可以用機啦…

我問… 「下? 乜我仲會有下次咩?」 (鴉… …)

今次, 倒模真係倒左幾次都失敗… 醫生話有窿喎, 係我啲口水太汹湧… 不過, 呢個都係我既問題, 我一打開口(包括刷牙), 唔夠一陣啲口水就係咁湧出黎… 我都唔知點解…

最後, 我估我倒模都倒左20分鐘… 今次真係賺左… 好少留在手術椅上咁耐囉…

為左增添一啲箍牙既成功感… 護士load左我3年前既牙齒寫真比我睇… 其實… 我已經唔認識3年前既牙… 好陌生… 佢地陪伴左我30年… 但我用3年時間, 就將佢地忘記得一乾二淨…

睇返啲相… 我再一次諗到果句… 「我以前點忍到佢地咁耐既呢?」

由於太重口味… 有興趣, 有勇氣既網友先好碌落去睇… 否則, 就此停止, 下回再見啦, 係咁先…

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

開!

before_alignment
(有人問我點解啲牙相係都鍾意用黑白… 答: 因為多牙漬囉, 黃禁禁咁, 都係變左黑白順眼少少, 睇整齊度姐, 又唔係睇有幾白… 可? xdddd)

.

.

.

.

.

.

.

.

.

.

另外, 補充多句, 上次出左篇blog後, 有朋友反映話… 我出果張牙隙相, 我啲牙好似未箍牙咁, 幾唔齊下… 其實, 我自己都有覺啲牙唔整齊架, 所以有少少失落feel…

不過, 今次覆診完睇返3年前既真正未箍牙相, 又突然開心返了… 因為, 真係已經改善左好多好多好多好多囉… (拍手)

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十六) 有 “ 15 則評論 ”

    1. 醫生話之前哨得勁, 停左箍… 有機會反彈, 哈… 好似減肥咁… 我就係一個好例子… 反彈到啲牙隙出番晒黎… 我而家又開始由第一個箍開始過… >_<

  1. 無意中搭車睇見你嘅箍牙日記,好有心機呀你,寫左咁多篇,多到我仲未睇得晒XD
    我半年前分手後都的起心肝去箍牙!以前想箍又驚痛!依家為貪靚真係愈黎愈大膽XD
    不過我箍緊係傳統俏betty 嗰隻:P 下星期去剝牙再上埋下面箍!我都好想可以快啲戴retainer ah (其實有排XD)

  2. 我一直都有追你個blog咖, 恭喜你完成咗呢個壯舉!

    睇到你d牙變得咁齊我都心思思想再箍返好d牙(我細個箍過傳統果隻個懶冇keep住戴retainer…),請問可唔可以分享你個牙醫ge資料俾我呀? Thanks!

  3. 兄弟, 還記得我嗎? 內箍果位呀.
    冇睇你個blog一排, 原來你已經箍完, 而且又再加監.
    我內箍都就快完成了, 我估仲有大概半年到.
    我既徵狀同你一樣, 黑三角超勁, 應該係冇得醫了. (不過, 聽聞做瓷牙貼片, 可以填補埋啲空隙, 仲可以令牙既外觀變白, 我箍完可能會再諗諗)

    其實我都好驚除箍後啲牙又好快反彈…..
    我終於都明點解好多箍牙既過來人都話, 到最後既日子唔係好捨得除箍.
    帶住個箍雖然煩, 但有種莫名的安全感.

    加油呀! 你啲牙齊左好多好多了!!!!
    我有時睇返以前既相, 同你既感覺一樣, 我之前三十幾年到底係點樣忍受度架!?

發表回覆

你的電郵地址並不會被公開。 必要欄位標記為 *