男人四十先箍牙 (九十八)

[29.05.2015] – week 163 – (29 + 29 + 2/26)

轉眼又過左一個月, 上一篇仲話有野想同大家分享, 都已經耐到唔記得左想share啲乜野… 唔緊要啦, 呢篇都係share啲重新箍牙既趣事新鮮事咁啦… 真係一日未箍完都會繼續會有新鮮事…

話說上回應該講到我岩岩重新變番箍牙中年… 由於今次應該係我人生最後一套箍, 我今次既箍牙策略改變左… 想嘗試下每日盡量足鐘數(包括食嘢), 所以我大部份時間都戴住… 開頭真係好唔慣… 但我諗應該試左4, 5日, 就開始習慣了… 真係試過戴箍食雞扒, 雞肶, 水果, 打埋邊爐都毫無難度, 原來副箍真係幾西利下… 咀嚼咬野冷熱都乜都得!

不過呢, 戴住箍雖然食到野, 但係有個問題, 就係咀嚼既時候, 其實牙箍同口腔會有磨損的(可能我未慣)… 唔夠幾日, 我個口腔就生左粒大飛滋了… 痛左我近一個星期, 日日狂搽吻百蜜都救唔番! 真係損到講野都劇痛!

另外, 新呢副箍… 由於在後排大牙太多attachment粒粒, 我用左3年既除牙箍方法竟然失效了… 最初既時候, 用成2, 3分鐘都除唔到副箍, 好似黐實左咁… 人係生既呢個道理無錯… 往往都能夠從錯誤中學習, 幾日之後, 已經掌握到除箍既方法… 不過呢種方法, 都算幾夾硬… 就係用姆指, 從最尾既牙內側輕輕挑起牙箍, 然後姆指食指大力向下一拉, 好似撕膠紙咁一嘢拉出黎… 呢個方法, 其實對門牙幾傷下… 因為開頭既時候啲牙岩岩箍鬆左, 感覺又好似夾硬拉隻門牙出黎咁囉… 不過, 過左一星期左右, 又無事了… 人既適應能力真係幾強下…

講番戴箍食嘢… 戴箍食嘢好處係… 唔駛邊食邊內疚, 又唔駛時時刻刻諗住幾時走去戴番個箍… 但另一個問題出現勒… 就係箍隙攝野…

teeth
(第一次攝菜攝到咁明顯, 直頭展覽館咁用玻璃鑲住! X_X)

食嘢既時候, 難免會咀嚼… 有啲食物, 趙到咁上下, 就會攝晒入牙與牙箍之間既空位, 越攝就越上… 根本避無可避… 就會出現攝嘢自已又唔知既狀況… 一個人食就話無所謂姐, 但一班朋友, 一班同事, 特別係一班其他公司既合作伙伴一齊食飯, 有講有笑… 咁就大家樂啦!

比人見到你笑晒咁攝住啲粒粒餸頭餸尾打包返屋企… 真係咩face都無晒…

我就正正試過幾次… 雖然有時食嘢係忘形到唔記得左自已戴住箍, 又忘形到同朋友笑晒傾計… 當食完野有機會清理牙箍既時候, 先發現… 已經太遲了…

以後, 呢啲情況我都要盡量小心… 我得閒就會用手機自拍mode, 偷偷地望下自已啲牙有冇攝野, 雖然無啦啦望住部手機依起棚牙, 比人睇到都有啲攪笑, 但始終係好過比人睇到你牙隙攝野既…

同埋, 戴箍食完野, 點都要盡快去廁所洗箍… 唔好處就係… 邊度有水潄口呢? 以前除定箍食, 就大可以慢慢坐係位用水潄乾淨個口, 先搵機會戴返個箍… 但而家次序掉轉左, 就只有盡快搵機會去廁所(一定要有地方洗箍, 因為食完嘢, 副箍好污糟), 但去廁所… 又無理由帶杯水, 帶個杯入去潄口掛, 所以… 戴箍食嘢, 都有佢既幣處囉…

最後一點… 就係, 一直戴箍食嘢, 副箍變黃變得好快… 雖然有網友教話用梳打粉勤啲洗, 副箍會乾淨啲… 但我呢種懶人, 用水沖, 用牙刷刷下已經好盡力啦, 仲話用梳打粉洗刷… 真係應該唔會有呢一日出現…

tone
(新舊箍比對, 舊箍明顯發黃)

好勒, 又夠鐘休息啦… 自從公司多左一間大陸分公司後, 去大陸既時間又再多左… 攪到放工越黎越少精神時間了… 莫講話打blog, 就算拍拖時間都少啦…

拍拖? 無錯… (係咪個宣佈位set得幾好? xddd) 我拍緊拖啦, 已經係2個月既事… 上次無機會同大家講下… 不過, 我都想趁打呢篇blog, 同大家share下呢件開心事…

好啦, 岩岩從大陸回來, 飯都未食就趕住打呢篇blog… 有時間再同大家share下…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十八) 有 “ 14 則評論 ”

  1. 哈哈!!恭喜哂~~我由第一個箍開始已經帶住黎食野,所以多數食完野都會可以唔講野就唔講野!!因為真係會好樣衰

  2. 恭喜你呀 !!!! 一切會更好更順利呀 !!!!
    我個女23歲 , 剛開始箍牙 , 早前找尋箍牙資料無意中睇到你的文章 , 不過佢唔用得隠形牙箍 , D牙較哨及亂 , 所以只能用傳統鋼箍 , 其實早一些做會好些 , 但那時我們無能力幫佢 , 而家佢有收入 , 自己攪掂 , 但都係搵普通科牙醫做 , 希望不會太差啦……..

  3. 我都係4張嘢,廿年前已經好想箍牙,可惜當時無錢!睇完你的箍牙日記,發覺依家都未遲,於是叫老公睇埋你的日記,佢都覺得你好掂,所以我哋諗住箍靚副牙,個人有自信d,同仔女影相笑容都靚d啦!

    請send你牙醫的資料和價錢比我作參考,謝謝!

  4. 好感謝你咁有心機分享你既經歷,睇左你個blog, 激發起我一直想箍牙既願望,之前好驚一路箍一路比人笑,而家見到你全程都可以用隱形牙箍,覺得唔駛再驚喇
    我主要係唔齊加兩隻門牙哨,希望佢唔會唔比我用隱形牙箍啦
    可以send你間牙醫診所既資料比我嗎?謝謝

  5. 你好,我上網search箍牙資料,無意中發現你個blog. 我都係而家三十幾歲先想去箍牙,改善儀容。因為覺得笑果陣有D哨牙所以成日唔敢笑,又冇自信。所以想箍牙,但我本身上下門牙做左牙套,唔知可唔可以用隱形牙箍。你個牙醫好似唔錯咁,可唔可以比你牙醫D資料我?

    1. 我上門牙都做有隻牙套嫁!!而且我都箍緊隱形牙箍,,兩者冇衝突!!我個牙醫話如果箍傳統果隻要刮花隻牙套先可以箍嫁

  6. 今日我換左第二個箍!! 我都係咁岩上網搵點樣令個箍唔會變黃, 又咁岩SEARCH到你篇文!
    多謝師吧咁有心機寫BLOG!!! 會KEEP住追睇的.

  7. 你的箍牙BLOG超好睇,好仔細詳述每次換箍的經驗,其實我上年已經去趙醫生診所詢問過,當時仲15,20.心大心細…而我的朋友見完趙醫生即時決定箍牙,直到最近我睇住朋友d牙齊左好多呀!!! 再燃點我要箍牙的決心!!!我朋友睇開你呢個blog分享比我睇呢~~~我而家有哂心理準備啦,期待9月開始帶箍了,yeah! 我同你一樣哨牙啊~~~睇到你的牙越黎越齊,我的信心大增,恭喜你有整齊的牙+蜜運中(^_^)

  8. 無意中看到你的文章。好高興見到你的改變。我幾年(三十五歲)
    也箍過但近一兩年左右門牙有一点反彈。想用invasglin 去整返好。可否PM我你的牙醫嗎?謝謝。

  9. 在搜尋關於箍牙的資料時找到你的文章,寫的十分生動啊!請問可以把你牙醫的資料私傳給我嗎?先謝謝!加油!

發表回覆

你的電郵地址並不會被公開。 必要欄位標記為 *