男人四十先箍牙 (九十二)

[24.01.2015] – week 145 – aligner (29 + 29/32)

踏入2015年第四個星期了, 我仍然係用緊#29號箍…

今日係約左牙醫覆診既大日子, 所以一早訓醒就換衫見醫生…

印像中, 今次應該係第一次在週末見醫生, 以前一般係在weekdays… 可能因為旺角診所結左業, 所以星期六都開埋掛? 都要既, 咁好生意… 唔開多幾日疏導下人潮點得?

一如所料, 少左一間診所換來既結果, 就係大爆棚, 睇牙既朋友堆到診所水泄不通, 候症室同reception都塞爆左, 我唯有被安排至另一個舖位等候…

一等又45分鐘, 好在近期愛上左一隻手機遊戲SimCity Buildit, 一玩可以玩個幾鐘, 所以排隊對我黎講係無乜難度…

留意到既係… 今日全部都係女顧客, 另外… 全診都係女護士, 真係陰氣極重呀…

輪到我既時候, 係一位女護士先招呼我… 一輪問候(當然係我既箍牙情況)之後, 佢話我知… 今日會拆attachment了, 我疑問… 唔係仲有3個箍咩?

護士話, 果3個箍, 係鞏固用的, 而且好大力, 話亞洲人唔太適合, 用左會有反效果喎… 我今日真係學到好多野, 原來外國人既牙力係強啲既…

護士亦比左30, 31, 32號箍我睇… 牙箍袋上面明顯寫住30+, 31+, 32+… 比平時既牙箍號碼多左個加號, 係特別啲…

醫生入黎之後, 竟然話我肥左… 話… 我塊臉圓到成個波咁喎… 雖然我自己都感覺自己肥左, 但不致於成個波咁掛… 睇黎, 我真係要認真注意飲食運動了…

醫生二話不說, 拎左去牙石啲工具(好似係)幫我整走口內十幾粒attachment… 整走晒啲attachment後, 仲幫我去埋牙石(牙石又出現了 >_<)

成個過程都好快, 我其實有啲好奇… 究竟啲attachment係點黐上去既呢? 黐得咁實, 三年都未甩過… 但整走佢又咁容易… (仲要無痕跡)

之後呢… 醫生話係時候整retainer囉… 就幫我倒模… 今次倒模, 真係比兩三年前快… 可能啲牙整齊左啦, 牙模易倒左… 1 take過就掂左… 不過呢… 倒模過程就真係幾嘔心下… 要咬落一pat軟膠度, 仲要hold住2分鐘等佢乾, 唔知點解, 有少少作嘔感覺… 間唔中仲聞到陣吹波膠味…

醫生話… 過一兩個星期就可以拎retainer了… 護士竟然約正我生日正日去覆診, 咁我改左生日後既星期一放工去… 無理由生日正日去診所興祝啦掛… >_<

醫生再補一句, 話隔幾個月之後要覆診, 檢查下仲需唔需要加療程… 我心諗… 下? 咁著數? 仲有得加?! 不過… 其實我已經唔知仲可以點再箍了… 而家個形, 都已經好好… 當然… 我相信牙弓可以再圓啲闊啲既… 但就唔算太緊要…

最後, 離開診所前找清左條尾數… 以後真係對牙醫不拖不欠了… 無債一身鬆晒… 護士仲送左啲野比我, 就係牙齒漂白軟膏, 雖然唔知效果如何, 但係睇個包裝… 係幾精美下既… (對比起兩年幾前送果支) xdddd

whitening

包裝係一套4支jel狀既物體, 謢士話係配合我#29號牙箍用的… 每日用, 上下排牙齒前排各6隻, 每次約1小時… 每用完一支就隔一星期再用另一支…

我十幾年前, 公司牙醫保健時都做過一次牙齒漂白, 除左當年特別做左牙模之外, 其餘既野都同呢set jel好似… 當年, 我記得價錢係$2400… x_x

不過當然, 今時唔同往日… 漂白套裝係各藥房都可以隨便買到, 都係百幾二百蚊就攪掂…

拆左attachment, 啲核突粒粒無晒… 可以放心每日用漂白, 亦可以開心笑了…

仲有樣野唔記得講大家知… 醫生話… 我日頭唔駛再戴箍了, 係夜晚戴就得啦… 不過, 我其實仍然會繼續戴的… 已經習慣左, 同埋… at least我會日頭戴箍戴到拎retainer…

既然啲牙已經定左型… 我當然要去做每年一次既實驗…

就係…

漢堡包測試…

2015_mcdonalds_test

結果, 牙印同2014年已經唔太大分別… 細心睇, 當然括度係比較圓(上下都圓左)

唔知點解… 突然間, 有少少寂寞感… 好似無端端就完成個3年箍牙療程… 以後唔會再有新牙箍要換, 又唔需要再定期去見醫生…

感覺有啲奇怪囉…

今次寫住咁多先, 下次拎retainer再報告…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十二) 有 “ 20 則評論 ”

  1. 嘩 睇左你個blog成年都係做cdrom 第1次留comment haha

    見到你貌似已經搞掂成個療程真係好登你開心
    睇住你由之前好唔齊變到而家咁靚

    本身以為箍隱形好似舒服好多
    唔會點刮牙肉 (事關我勁易生飛滋
    但係原來都會刮 不過點都好過傳統dd掛…

    其實我一路以黎好想箍牙
    但係學生仔一個 屋企又無額外錢俾我箍
    而家終於番下part time搵到少少銀兩
    唔知你可唔可能sd診所醫生同價錢資料俾我呢?
    睇見你個醫生好風趣咁
    同埋最主要係睇下價錢問題(學生仔無咩錢:(
    麻煩你了!

    1. 多謝你睇左我個blog成年…

      無錯, 不經不覺, 原來我已經箍完牙… 真係好似發左場夢咁, 不過… 唔係夢黎… 啲牙真係齊左… 如果訓醒, 啲牙原來仲係哨, 我會覺得好攪笑囉…

      至於刮牙肉, 我估因人而異既… 不過無啦啦塞啲野入口, 點都會有唔慣既…

      已覆email, 請查收…

  2. 完成箍牙真開心呀!
    我都好期待呢一日呢!
    想問問你那些磨過的牙縫是否都已泊返埋晒呢?食嘢時會唔會好易攝食物?
    我仲有五個箍就完成(當然可能要加箍),但發覺那些磨過的牙縫好似仲未泊埋晒咁,好易攝食物,所以好擔心箍完係咪都仲會係咁⋯

    1. 磨過牙既牙縫, 我相信已經泊返埋… 不過本來都唔係好覺架咋… 不過果啲黑三角位就… 正如你所講, 成日攝食物囉… 真係了返出黎都夠食一餐 (嘔)

  3. 咁Q, 我都係果日同一地點 時間覆診。你就好啦, 就快箍完, 真心替你開心。我仲有成8個牙COOL, 希望唔駛再加COOL啦~ 因我前前後後已COOL左好耐, 成3年幾, 希望COOL完呢8個, 唔駛再調整!

    1. 原來你都箍左3年幾… 咁其實我都算快喎… 哈哈! 不過講真, 我而家覺得其實時間過得好快… 可能因為我成日寫blog, 又同網友交換下心得, 所以轉眼就三年了…

  4. 我未剝牙之前都有做倒模架,係好似牙肉咁嘅色水又有啲核突咁架嘛,但好快就乾,不過我覺得個倒模嗰舊嘢好有香口膠味&個texture好正我好中意hahahahaha
    今日我都去咗牙醫度,佢同我加咗條彈弓落我個牙箍度…好新奇嘅體驗hahaha

    1. 加左條彈弓? 用黎做乜架? 其實箍左牙三年來… 我不知不覺咁戒左食香口膠… 以前, 真係食airwave食唔停架… 奇怪, 而家我突然唔鍾意食了…

  5. 你好,踏入2015年,我終於 “的起心肝” 去做 invisalign。在網上亂 search,找到你的箍牙日記,實在太感動了。我也是40歲啊。由於今天晚上才發現你的 blog,未能一次過把92篇看完,暫時我是跳來看的。有兩個問題想請教一下,不知道你可介意回答:
    (1)請問你找哪位醫生?
    (2)當年的費用多少?

    這個年紀才來箍牙,真的要更大的勇氣。幸好找到你的個案,實在太有鼓勵性,謝謝你 ^-^

    1. 好高興從我既blog會激發到你箍牙既動力… 都係果句, 早一日箍牙, 就靚早一日, 都係好事黎… 費用因人而異啦, 但約1000-1200一個箍左右啦… 醫生資料已email

發表回覆

你的電郵地址並不會被公開。 必要欄位標記為 *