男人四十先箍牙 (九十一)

[20.12.2014] – week 140 – aligner (29 + 28/32)

近期接近放縱, 自從上次見完牙醫, 表示經常每三個星期換箍, 護士姐姐竟然幫我在mark左每個箍戴3個星期… 咁令到我肆無忌憚咁大減每日戴箍時間…

有時早餐除左, 等到食埋lunch先戴返, 有時lunch除左, 又等到食埋晚飯先戴番… 簡直係我自己都接受唔到自己變成咁!

無箍既日子, 我更加主動去參與同事間既零食活動, 有時甚至自己去買糖, 朱古力, 薯片果啲在office大吃…

我而家已經無乜計戴箍時間… 心諗, 都已經到尾聲(如果#29箍係人生最後一個箍既話)… 實質上箍牙成果, 大約已經係咁… 對箍牙完成後既樣貌, 已經無乜期待…

放縱飲食, 另一個大問題, 就係會心廣體胖…

我屬於高果類, 肥對我黎講… 就主要係肥肚腩, 同塊臉… 2年前辛辛苦苦減番黎既小肚腩, 已漸漸變回中肚腩… 箍牙加節食回來既v臉, 又開始變番包包臉… 照鏡都開始接受唔到!

公司返大陸頻密, 放工做運動… 已經變成歷史, 食完就訓變番做習慣…

眼見身體一日比一日累… 應該都係呢幾個問題引致…

接近年尾, 又係訂立下年目標既時間… 我希望, 新一年, 可以回復昔日毅力… 戒得住口, keep得到經常運動, 變番一個健康有活力既人…

同時, 要的起心肝, 搵日去脫墨… (唔記得有冇同大家講過, 但近幾個月, 忽然想過脫左臉上既三粒大墨囉)

凍冰冰既星期六, 我乜都唔理, 大覺訓到下晝一點… 寫埋篇blog後, 都要好好做下正經事了 (例如買聖誕禮物, 仲想買返啲新衫過節)

好啦, 唔知下次會幾時寫blog, 預祝大家聖誕快樂, 新年進步呀!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十一) 有 “ 9 則評論 ”

  1. 好好笑,睇完你呢篇覺得好好笑,因為上個星期我脱咗面上幾粒小墨!不過要做幾次先得,宜家淡色咗啲,都好痛。係咪箍牙中嘅人都開始想追求完美啲?一步一步整走啲唔好嘅嘢!你係要整就快啦!一樣道理,早啲整早啲靚仔啲!哈哈!
    我宜家呢兩個月夜晚要帶住穩定器先,醫生話我仲要整多set套,但又要一月先可以覆診,宜家唔洗帶住牙套笑都笑得開心啲,爽!但遲啲唔知幾時先箍完?等了又等。。。。
    祝聖誕快樂,身體健康!

    1. 終於, 在我生日前一日, 我去做左laser脫癦啦… 一共脫左三粒, 近4千銀… 真係有啲吉大脾… 因為三粒癦個根都幾深下… 而家塊臉仲留有大洞… 兩粒就淡左色, 另一粒, 似乎好頑固, 可能要去再」焦焦」佢先掂… 而家諗起要再打麻醉針落塊臉, 真係起雞皮…

      1. 嘩,你要打針?睇嚟你嗰粒幾勁!我就只搽麻醉藥膏,但都係會痛到標眼水。我都去咗第二次,醫生話通常要去幾次先會根清,不過俾一次錢,包一年。你繼續加油!我有成兩三個月未返牙醫到check,唉,應該再要印模帶多set….但呢排只在夜晚帶穩定器,日頭間直係勁free食嘢講嘢,自由地笑,真係期待完成療程後的真正自由,唔知仲有幾耐?羨慕你!

  2. 你好, 其實我同你一樣, 都係細細個已經好想箍牙, 不過各種原因, 一直未能實踐。直至最近, 每幾年就出現一次的念頭又來了, 今次終於下定決心, 行出呢一步。忽然有咁大勇氣, 完全係因為睇到你個BLOG。

    上星期印左牙模, 等通知幾時脫牙。老實講, 而家有少少淆底 + 後悔, 因為過程真係非常漫長兼痛苦, 心裡面又再反問自己 「其實成三十幾年都係咁過啦, 冇人嫌棄過你D牙, 做乜無啦啦整撻啦??」

    唉~~~~~~~~~~~~~~~

    1. 其實, 我都有諗過… 三十幾年都已經過左, 哨牙一樣照樣生活, 不過… 當你箍好左牙之後, 你會發覺… 影相時, 唔需要再刻意收藏缺點, 可以盡情E起棚牙… 社交生活, 係有改善既… 諗番轉頭, 我會覺得呢三年, 其實真係好快就過左… 我往後, 可能仲有幾十年靚… 後悔既, 反而只係, 點解我唔早多20年做呢件事…

      1. 聽到你咁講好開心! 其實係架, 我有時都好怕同陌生人講野講太耐, 或者我一直都唔敢E大個口笑.. 更枉論影相時會E起棚牙啦…..>_<

        我而家都未敢同屋企人講住, 怕佢地講D令我灰心0既說話, 我諗住到剝牙時先講…..

        "點解我唔早多20年做呢件事…" <—-聽講話太早箍牙, 大大下會移位的!

  3. Hi,我也想箍牙,尋找牙醫中/見了两家,覺得醫生好趕時間,問多半句都唔多正面答你'可給你的牙醫資料我嗎?你加套要再加錢嗎?

發表回覆

你的電郵地址並不會被公開。 必要欄位標記為 *