男人四十先箍牙 (三十六)

[14.12.2012] – week 35 – aligner (18/46)

工作越接近last day, 反而越忙… 唔知老細諗乜, 竟然在我last day安排左一個大presentation, 仲要我見客… 真係令我R爆頭… 呢個任務, 足以令我日日都疲於奔命… 今日頂唔順, 六點放工就即刻返屋企, 想撻落床, 先醒起今日約左覆診… 原本放鬆晒既心情, 又要暫別… 急急忙忙又換衫出返街…

遲左10分鐘到診所, 今日… 竟然好少人… 少人到有位坐添! 全診所清一色女性, 真係令到本人有啲啲尷尬…

大約等左15分鐘, 就可以見醫生… 在短短呢15分鐘, 除左得閒偷望下每一個在等候既女性之外… 心裡其實在諗, 醫生既第一句說話我應該點回應…

有睇開我blog既人應該會知, 呢位醫生永遠都出奇不意咁問你一個問題… 令你唔知俾乜反應好… 有興趣可以參考下我之前覆診既文章…

自我對答左好多次, 應該總離不開… 「點呀啲牙?」, 「個箍緊唔緊呀?」, 「有無痛呀?」 之類問題… 而我都準備好晒啲答案… 要確保唔會俾醫生問到口啞啞…

點知… 一見醫生, 佢既第一句係話: 「咦? 今日你好迷彩下喎…」

呢句, 我真係無預過佢會咁講, 我亦諗唔到邊句回應好… 我只好吞吞吐吐咁吐出幾個字… 「Err… 係囉, 都幾迷下既…」

之後, 醫生一直都冇問關於箍牙既事… 反而對我件迷彩風褸好有興趣… 價錢, 牌子, 在邊度買都問晒… 可惜, 衣著呢啲野我唔係好在意… 幾錢, 咩牌子黎, 我都唔記得晒了… 我只可以答中一條問題, 就係在IT買的…

醫生… 我甘敗下風… 我會再努力練習下啲即時應對, 免得下次再俾你問到口啞啞…

講番箍牙… 醫生叫我打開口, 又問… 「你條像筋呢? 吞左呀?」

=____=」

呢句我又好理直氣壯咁第一時間回應到喎… 我話: 「戴左橡筋我講唔到野喎!」

醫生話, 最好成日用橡筋啦, 如果返工要講野, 放工就好即刻要戴返… 不過諗諗下, 其實我都算係的… 我放工+食完飯就會戴返條橡筋… 唔會臨訓先戴…

醫生幫我檢查完一輪牙齒, 又再一次將焦點放在我既V型牙弓上…

佢話, 我既V型牙弓需要箍到變番個U型… 佢話一般年輕人就好容易, 好似扭鑼絲咁扭扭下就闊番… 但係…

醫生突然好重語氣咁講: 「但… 你年紀都有返咁上下啦…」

本來我合埋左既眼, 即時打開望住醫生… 又再望下佢身邊既助手… 兩個都眼碌碌咁望住我…

我知, 當時我雙眉彎左落黎… 配合我擘大左既口… 個樣正正就變左以下呢個字:

-> 囧 <-

身體是最誠實的… 醫生知道搫中我弱點, 即時改左口… 「… 用透明牙箍都可以慢慢修正到既, 而家睇你啲牙都有進展啦…」

其實, 我上網都睇左唔少website, 都講年紀大箍牙, 效果總比後生箍無咁好既… 其實我都明白既… 不過心裡面始終希望唔好相差太遠啦…

醫生話我啲牙漬少左… 我懶叻咁話: 「係呀, 我無再用潄口水了…」 但諗諗下… 我對上一次洗牙只有個半月, 啲牙漬都無咁快生返出黎啦…

雖然牙漬少左, 醫生都幫我洗多次牙, 正呀, 又有錢袋落袋啦!

今次臨走同醫生傾左一陣, 主要討論一下箍牙既進度… 睇下需唔需要延長療程… 不過, 我都總算順順利利, 暫時唔須要考慮住…

見左醫生10分鐘左右啦… 出門口前, 醫生竟然又提我有問題可以whatsapp問佢… 其實上一次佢已經咁講過一次, 我當佢順口up啦, 但今次又再講多次, 我諗, 我真係要考慮下add佢whatsapp, 雖然我冇乜野想問佢…

最後, 拎左3套新牙箍就走人…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十六) 有 “ 7 則評論 ”

  1. 我上排牙齒改善得唔係太明顯, 可能療程先處理我下排牙齒掛? 我下排牙齒本來又出又入好唔齊, 而家已經開始箍返齊, 成為一個窄窄地既U型啦… 我諗, 慢慢箍會變返闊啲, 好睇啲… 至於牙弓, 我仲未感覺到佢有改變喎…

    如果唔係太嚴重, 有少少假哨牙都唔係大問題既… 當然, 箍返齊就笑得更有自信… ^_^

  2. 點解頭先打左篇嘢post唔到?我今日加左粒粒,但除唔到出黎嘅。。。好實,碌到手指甲痛都除唔到,係咪夾硬向下拉或上拉就可以?慘。。。整左好耐,希望你今晚會睇到呢篇嘢救到我啦。。。。。唔知點除,助護只話要大力。。。

    1. 初頭加左attachment粒粒後, 係好難除的, 特別係新箍頭幾日, 真係好貼…

      我除箍既心得就係… 先用手指撩鬆一邊, 等個凹位離開粒粒, 此時應該會夾得牙更實, 因為粒粒既厚度會令牙箍夾得更緊… 如果係新箍頭兩日, 此時真係痛不欲生!

      然後就再撩第二邊, 撩到凹位又離開粒粒, 跟住就左右左右咁慢慢退個牙箍出黎…

      如果頭幾日啲牙仲鬆鬆地, 咁退出黎真係超酸超痛苦, 做定心理準備好呀…

      助護某程度都講得岩架, 個牙箍彈性都幾好, 唔易爛, 我好多時都係暴力拉出黎: 左右扣鬆左後, 都費時慢慢退出黎, 一野暴力就拉佢出黎(有時要忍唔住低聲Arrrraahh一聲)… 因為在公司廁所, 儘量唔想太多人見我除牙箍, 爭取最短時間攪掂走人…

      1. 謝謝你回覆,我上排個箍俾我夾硬址到裂咗少少。原來加咗粒粒,帶箍唔係最痛,反而係除箍攪到手指,牙都痛,好慘呀!帶返上去時啪上去又彈到啲牙好痛!唔鐘意加粒粒。。。你係公司都除到真係好勁,我盡量係屋企除,未適應,除箍時間耐左好多,每次走去除都好似行刑咁,好抗拒!

發表回覆

你的電郵地址並不會被公開。 必要欄位標記為 *