男人四十先箍牙 (三十九)

[11.01.2013] – week 39 – aligner (20/46)

我覺得我真係好適合退休生活; 離職後開始左悠長假期… 唔駛返工既呢兩個禮拜… 為自己安排左好多節目…

比返工更早出門走去踩單車, 踩到lunch約舊同事食飯… 下晝去同強國人迫商場… 甚至去書局, Cafe睇書… 比營營役役返工更有意義… 唯一缺點係, 返工有錢收, 退休… 只有不斷駛錢…

夜晚約左醫生檢查牙齒, 同強國人迫完旺角後先回家刷牙梳洗一下, 就返回恐怖既旺角… 我細個既時候, 只有農曆新年行花市先有呢種咁恐怖既人流… 但而家, 盲流每日都會在旺角銅鑼灣出現… 人大了, 免得過都唔想出街…

今晚約左七點半, 我七點三就已經去到診所… 出奇地少人… 少人到有位揀添… 第一次坐診所既梳化, 好舒服啊!

只係等左十五分鐘, 準時七點半就見醫生了…

入到醫生房, 隨手放低左新買既ipad套… 醫生望到, 就話… 「咦! 好靚喎!」… 我心諗: 「識貨喎!」 不過, 好可能佢根本唔知係乜黎, 只係隨便up下… >_<

醫生見我冇乜反應… 第二句就問: 「有咩幫到你?」

高手即係高手… 呢句只會在shopping齋睇唔買既時候, 舖入面既sales總會走黎問你呢句… 意思差唔多等如叫你 「唔係幫襯就唔該過主!」… 我心裡面總想回敬一句: 「你彈開就係幫到我囉!」

但今次出自醫生既口… 真係令我齋諗都要監生吞返入去…

我支吾以對, 求其回左幾粒字… 「我黎拎新箍既…」 講完我自己都覺得答得好差… 如果答 「我黎睇牙既…」 我自己都會覺得ok啲…

講返正題…

醫生檢查完我啲牙後… 大致上評語都係唔錯… 同牙漬少左喎… 唔… 上次已經聽過晒… 今次覺得冇乜特別…

但醫生再細心檢查一下之後… 叫護士俾塊鏡我… 叫我自己睇下… 原來下排門牙其中一隻啲位移得唔太靚… 同個牙箍有好明顯既虛位… 好明顯門牙一隻就貼到個牙箍tup tup冚… 另一隻好明顯有大約半mm既虛位… 真係醫生唔講, 我自己都無留意呀!

醫生同我講左一大篇理論, 話呢啲情況好常見, 因為電腦計出黎既位, 去到咁上下時間總會開始同實際情況唔夾架啦… 佢地一早會預左呢種情況云云… 所以呢, 醫生話, 我大約去到第28個箍, 就要重新倒模一次, 做埋餘下既18個箍喎…

既然同醫生傾開牙箍, 我就順便同醫生講… 我想今個箍(20)既時間延長至一個月多啲… 即係本來戴14日, 變成戴35日!

醫生問我點解… 我就答我打算去台灣踩單車環島大半個月… 所以呢… 嗰段時間唔打算換新箍了… 台灣美食多… 我相信我會不斷食野, 又除又戴… 一定無22個鐘一日啦… 所以, 全個台灣旅程當只戴得一半時間啦… 延長至35日應該唔會錯了…

好彩醫生都同意我既主意… 佢補充話, 如果我同一個牙箍要戴咁長日子… 每日就千其唔好戴足22個鐘, 否則同一副牙箍戴得太耐… 會degrade, 會變型… 反而對啲牙唔係咁好…

仲贈左兩個字俾我: 「Hea戴!」

有時潮語真係有佢既好處… 簡單兩個字, 我就已經收到晒! 講得Hea戴… 咁我真係可以喪食台灣美食了! 終於有短暫既解脫!

(離開左診所之後, 諗諗下醫生講左句話令我幾費解…) 佢話, 重新倒模後就放棄本來嗰set箍… 咦? 咁即係咩意思呢? 係唔係46套箍一早已經做好晒, 因為牙箍唔再夾, 所以要掉晒佢再造過呢? 最重要既係… 係唔係要再收過另一個療程錢架?! (T_T)rz

下次再問下醫生先…

又叉返開少少… 就係… 我上一篇講既計劃… 就係決定左農曆新年前去台灣單車環島一圈, 大約大半個月吧… 下星期就出發了! 旅程中我要暫別一下寫blog了… 返黎之後, 會同大家分享下旅途中箍牙遇到既趣事… ^_^

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十九) 有 “ 7 則評論 ”

  1. 今日心情好緊張呀,因為個箍到左喇,一陣就上去醫生度攞,我諗我真係要去食餐勁嘅晚餐,哈哈,跟住嘅日子已從你嘅經歷有所準備喇,努力呀

  2. 上左箍第4日喇,諗起第一晚戴住瞓覺•••••原來係瞓唔到嘅 ,戴左牙套唔知點解會頭痛 ,哈哈又成日都流口水,我真係諗:點算好呢,宜家先至第一日•••我能唔能夠堅持落去呢•••諗下諗下,就同自己講:」你都比晒錢啦,而且過多一個月又要去剝牙喇噃,唔堅持都唔得啦,最重要係箍左牙應該會靚啲丫嘛!!」
    果然呢兩日感覺好左,真係要時間適應,對於我㴝講,箍牙只係起步,所以好多謝你寫的blog,從中可以更加明白箍牙的經歷,亦係一種鼓勵 thanks

發表回覆

你的電郵地址並不會被公開。 必要欄位標記為 *