男人四十先箍牙 (三十一)

[09.11.2012] – week 30 – aligner (15/46)

不經不覺, 之前拎既6副牙箍已經用到尾聲… 今晚又到見醫生既日子…

放工後, 懷住戰戰兢兢既心情到達位於旺角既醫務所… 驚, 唔係驚牙醫… 係驚佢診所又爆棚, 迫到插針都插唔入, 多人過行年宵既虛冚場面…

上到診所, 今日人流都算適中… 不過仍然係無凳位兼成診所企滿人… 但今次起碼叫有個角位俾我攝下, 唔駛好似上次咁攝到出門口仲要有條隊…

今日約七點半, 準時七點半報到… 大約再等20分鐘就見醫生… 感覺良好…

見醫生, 例牌佢都會有句輕鬆既開場白…

今次, 佢問我… 「辛唔辛苦呀?」

我又俾佢突如其來既一句KO了… 本能地回彈左粒音, 就講… 「Uh?… 辛苦?!… 唔辛苦? 點解會辛苦既?」

可能我既回答太無厘頭, 醫生窒左一下… 佢話, 「個箍呀, 戴得辛唔辛苦呀?」, 「食飯有冇唔方便咁呀?」

其實佢問我辛唔辛苦, 我梗係知佢問我箍牙啦, 唔通問我返工辛唔辛苦咩? 不過」辛苦」係好籠統既詞語, 要形容我對箍牙既感覺, 絕對唔可以咁簡單兩字回答… 我都不知幾想即時whatsapp我個blog俾佢參考下, 我呢30個星期寫既心情…

不過, 基於自然反應, 我冇答佢頭一個問題, 直接答左佢第二個問題… 我話: 「食飯唔方便就梗架啦!」

醫生呆一呆… 旁邊既護士亦」必」聲咁笑左出黎… 之後醫生再冇同我講野了… ice breaking無聲無息咁完結左…

醫生檢查左我啲牙… 都係果幾句, 進度唔錯… 不過醫生話我個箍鬆鬆地… 用像筋好易直接扯甩… 今次要加attachment…

Attachment… 嘩… 終於出現… 我一直既終極惡夢終於出現了…

醫生話, 用attachment加像筋效果會好好多, 又唔怕甩… 不過就好難除囉… 佢仲安慰我… 話我只用四粒attachment, 算最少架啦… 人地仲多呀… (我除左」感激」兩個字, 真係諗唔到其他字回佢, 當然, 我只係心裡面講)

加Attachment前… 我點都諗唔到會出現超級痛苦既呢一幕… 痛到我握實兩拳, 兩腳不由自主咁撐到直一直, 雙眼緊閉… 一直含住兩泡眼淚… 為左男人既尊嚴, 我差唔多頂左五分鐘, 一粒聲都冇必過出黎, 默默忍受呢個突如其來既極刑!

極刑就係… 醫生話要幫我啲牙隙開啲位… 我初頭以為佢又用鐵鉏鉏我啲牙, 但今次, 佢話要用機… 我心知都不妙… 點知, 實際比我想像中更恐怖…

就係… 醫生用一塊有少少厚度既牙簽狀物體, 夾硬在每個牙隙都攝入去… 然後再用機器車薄我既牙齒, 令到我啲牙隙闊啲, 多些空間給牙齒移動…

試諗下… 16隻大牙唔計, 都要做16隻牙… 上下各8隻… 每兩隻牙中間都攝一次, 車一次… 種樹方程式計, 即係上下各攝7次, 合共14次…

老實講… 真係好難捱架… 感覺就好似夾硬在牙隙中間撐開佢, 推開啲牙… 所謂牙痛慘過大病, 隻隻牙都直痛歸心!

好唔容易忍到醫生整完… 到佢為我加attachment既時候, 我已經無晒感覺, 成身軟晒咁灘係凳度, 咬住佢俾既唔知海棉定軟膠物體, 整下整下就黐左四粒attachment入口…

其實牙齒上有attachment都冇乜大感覺, 就好似食完野黐左啲食物在牙齒上既感覺咁… 只不過, 呢四粒野係用條脷」了」唔走的…

醫生見我一臉茫然… 主動俾條invisalign既動畫俾我睇, 睇我牙齒在46個箍中既變化過程… 當係呵返我剛受強烈折磨既心靈… 其實佢呢種安排真係有效, 睇完條片, 我真係無晒痛既感覺… 因為… 真係好神奇, 如果46個箍之後真係如佢動畫效果一樣, 我啲牙不但整齊晒, 連尖既牙弓都變返正常, 變返一個好靚既弧形… 我即時問醫生, 係唔係連牙弓都真係咁神奇會變形架? 醫生話係喎…

如果真係咁, 我覺得真係好神奇喎… 啲牙肉會跟住牙齒走…

我順道問醫生… 加左attachment可唔可以洗牙, 因為我發覺箍牙後, 啲牙漬嚴重左… 其實, 我只係順口問下, 無諗過醫生即刻推返我落凳, 手起刀落… 即時幫我洗埋牙… 嘩! 等如硬塞$300入我袋, 真係全晚不斷有感動位…!

最後, 醫生又問左一個我接唔住既問題… 就係: 「你用咩牙膏?」

我真係諗左半秒… 呢條問題咁難答既? 到底佢想問我牙膏牌子丫? 定係牙膏既味道? 定係牙膏既特別成份呢?

最後, 我選擇左答牌子… 我話: 「黑人牙膏囉!」

唔知佢覺得我答成點, 佢再問: 「咁有冇用潄口水?」

我好自豪咁答: 「梗係有啦! 我次次刷完牙都會用, 仲用埋牙線添呀!」

我唔係搏掌聲, 我只係想話俾醫生聽我真係有好好保護啲牙齒, 但仍然都唔知點解有牙漬…

點知, 醫生話我知… 原來漱口水會令啲牙漬越黎越深的, 叫我唔好再用…

嘩! 我真係萬萬諗唔到… 乜原來漱口水會加深牙漬, 真係聞所未聞… 不過既然係牙醫親口講, 我都會信佢既… 雖然我已經用左廿幾三十年… 一於箍牙呢段時間, 唔會再用了…

臨走前, 醫生只俾左3個新箍我… 約定12月中再覆診, 可能佢想密啲觀察我用左attachment後既進度… 我覺得都岩既… 睇下有冇明顯既改善再跟進都係好事…

從今晚就開始有attachment, 唔知會唔會唔習慣… 有時間再同大家分享…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十一) 有 “ 6 則評論 ”

  1. 喂, 呢篇好詳細呀!
    你牙醫會問你問題同交流咪好囉, 我個醫生好少同我有交流,
    可能佢地實在太多客, 做到麻木晒, 次次都係叫我瞓低, 自己係到檢查, 跟住自言自語話幾好呀…唔錯呀…跟住就叫我約時間返去覆診.
    牙醫, 雖然好賺, 但其實份工都幾悶架, 我覺得.

    原來潄口水會加深牙漬架! 咁我都停用至得啦!
    我本來成日見你寫啲漬好深, 我都諗住叫你主動叫佢幫你洗牙, 因為我上網睇過, 箍牙既過程係會多好多牙漬, 一來因為箍既原因, 二來係, 我地之所以要箍牙, 係因為啲牙本來生得好鬼密, 咁佢箍既時候, 要拉返鬆啲位, 所以原來牙同牙之間, 唔覺眼既漬就會好突出. 所以要定期洗牙呀!

    1. 尋晚有時間, 就打詳細啲啦… 因為加左attachment, 改變都幾大… 同各網友分享下經驗囉…

      你用內箍, 其實要幾耐見一次醫生架? 我用透明箍, 真係好日都唔駛覆診一次… 最長紀錄成兩個半月先見醫生…

      你地每次見醫生, 係唔係都要攪好耐架? 我聽聞佢地每次都要收緊你個箍… 係咪會痛到標眼水?

  2. 潄口水原來會加深牙跡架?我都係第一次聽。
    原本我啲牙都好深咖啡跡,門牙同門牙之間因為拉開咗,又發現好大達跡…
    睇嚟,勤洗牙真係少不免的了…

    1. 我都唔明點解會加深牙跡架, 我用左廿幾三十年潄口水, 一直都普普通通啦啲牙漬, 一年洗一次牙! 不過係戴左牙箍之後明顯嚴重左! 可能因為個箍鎖住啲殘餘潄口水在牙面上形成掛? 都係估估下!

      自從冇再用潄口水後, 我密切留意啲牙漬發展呀! 同埋呢, 啲牙漬, 係洗牙都洗唔去的, 總會有啲剩在牙面上! 特別係大牙咀嚼面凹凸不平裡面藏既污跡, 擦牙擦唔走, 洗牙都洗唔走, 好慘, 好難睇!!! Orz

發表回覆

你的電郵地址並不會被公開。 必要欄位標記為 *