男人四十先箍牙 (七十)

[19.10.2013] – week 79 – aligner (29 + 5/32)

尋晚訓到半夢半醒, 被牙箍既壓力整醒左… 感覺到啲牙(大牙)好酸軟, 呢種感覺, 已經有啲陌生; 因為… 自從換左套新箍… 一直都好」輕鬆」…

尋晚趁訓前換第#5箍… 仲加左橡筋… 點知訓到半夜就」出事」… 其實, 我一直都無介意過呢種感覺… 無他既, 越大感覺, 就覺得越有效囉!

講返尋晚換箍… 對照過新同舊箍… 雖然#4箍只係戴左三個星期, 但同新簇簇既#5對比… 啲顏色真係差好遠… 雪白既#5箍… 同已經淡黃色既#4… 併埋一齊, 真係感覺不寒而栗…

牙箍用2, 3個星期可以換, 但我啲牙… 仲有半世人用喎… 咁發黃法, 都唔係辦法…

我啲牙除左唔整齊, 仲幾黃下… 自問都係一個早晚刷牙既人, 真係唔明點解有啲同事啲牙可以白到反光! (已証實係真牙, 唔係牙套) 我就越刷越黃… (其實係偏灰)

唔通牙齒都有」天生麗質」呢回事?

我以前好少留意人地牙齒, 甚至連自己既哨牙都好少理… 可能箍左牙, 而家成日都會留意下人地既牙, 同時都會特別關注自己既牙… 雖然已經比以前齊左好多, 但反而自己不斷發掘出對棚牙更多不滿既地方… 真係犯賤…

尋日經過百老匯電器… 竟然發現上星期見到賣$8xx既電動水牙線, 大減價至$6xx… 嘩… 大型連鎖店既海鮮價, 真係恐怖… 不過, 就算$6xx我都唔會買… 因為, 我在網上商店, 已發現只賣$5xx, 可惜… 只接受郵寄… 大佬呀, 我成日唔係香港, 點收貨呢?… 所以, 最後都冇買到…

不過呢團火我仲未熄, $5xx我接受到… 可以買黎一試, 不過… 留意下幾時有實體店, 或者見面交收既網購先入貨吧…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七十) 有 “ 11 則評論 ”

  1. 有網友介紹,間中用“可食用的梳打粉”(各大超市有售)代替牙膏刷牙,可以溫和地去除琺瑯質表面嘅污漬,兼且有美白功效,用嚟清潔牙箍同樣可以去漬去異味添,可以試吓~~

  2. 我箍牙後, 都患了留意別人牙齒強迫症, 特別對明星啲牙齒更加嚴格, 一定要整整齊齊, 啲韓星個個棚牙都好齊好白, 相信有好多係假牙或牙套, 最近睇果套偷去的五年, 女主角棚牙不齊整, 仲要好多時候, 大特寫睇到佢棚牙, 令我不堪入目, 我證實我患了留意別人牙齒強迫症.

  3. 係咁架, 我問過身邊成年後箍過牙的朋友,
    絕大部份, 開始箍牙後都會很留意身邊人、明星、主播等等啲牙齊唔齊!
    所以, 「留意別人牙齒強迫症」 係箍牙人既通病留架.

    另外, 牙黃的問題, 我啲牙都好黃, 因為, 我地咁既年紀, 細過可能食過啲含」四環素」 的藥,
    這藥自八十年代開始禁用, 因其後遺症頗大, 包括讓病人牙齒永久性變黃.
    你可以問吓你醫生你啲牙黃係咪咁既原因, 如果係, 我可以話你知,
    四環素係冇得醫的, 除非貼瓷牙貼片. 用藍光洗牙, 都只可以維持一年左右.

    最後, 水牙線我都有買黎用, 因為我內箍, 水牙線很有幫助的.

    唔知點解, 箍牙後我對牙齒護理既資訊認識多左好多, 我相信大部份成年箍年人士都有咁既情況.

    1. 咁我極有可能係」四環素」受害者啦… 不過都冇辦法, 而家啲牙齊左就算… 儘量唔好得一想二了… 我今日都買左水牙線, 聽朝試下咩感覺先!

      你啲牙點呀? 係咪已經齊左好多?

發表回覆

你的電郵地址並不會被公開。 必要欄位標記為 *