男人四十先箍牙 (七十六)

[19.01.2014] – week 93 – aligner (29 + 10/32)

約左上星期五到旺角醫務所見醫生… 放工急急趕到診所, 診所依然係座無虛席… 依然係一個充滿女性既環境…

唔知點解, 冬天既女仔特別靚… 可能冬天衣物配搭方式更多, 厚衣短裙長boot… 加上室內溫度焗得美女們既臉蛋泛紅, 好漂亮… 其實… 等睇醫生有時都係一種樂趣… 只要你開懷…

可惜開心既時間過得快, 等左只係15分鐘左右, 就可以見醫生… Orz…

呢個禮拜工作勁忙, 勁攰… 剛戰鬥完整天, 今日我自己唔多想講說話, 見醫生過程顯得特別多dead air… 醫生保持一貫風趣, 可惜我真係少啲集中力, 都回唔到佢既gag…

我自己都留意到, 自從上次見完醫生後… 啲牙石一路積聚, 積聚到非到明顯… 醫生亦都留意到… 咁佢就話快到年廿八, 幫我洗邋遢, 就幫我大掃除一下啲牙石…

唔攪由自可, 一攪就攪左10分鐘… 痛到我眼淚不斷在心裡流… 雙拳緊握, 成程郁都冇郁過半下… 強裝冷靜… 喂! 有冇咁多牙石先?!

醫生一直都問我食野有冇問題… 我又真係冇咩問題喎… 唔通其他人箍牙時食野好有問題? 同埋我一向唔會戴箍食野… 所以, 問題應該更少, 只係每日戴箍時間就越黎越短囉…

每次我拎箍後, 姑娘都會好好心機在個箍包裝上寫上換箍日期… 不過, 我返到屋企後, 就會自己重新計算一次… 寫返落個包裝度; 大約每個箍戴多3至4日… 以補返我每套箍戴少左既時間…

今次臨走, 姑娘俾左4套新箍我… 屈指一算, 咁我又可以戴10星期了… 下次再見醫生, 可能都要到愚人節了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七十六) 有 “ 12 則評論 ”

  1. 你千祈唔好覺得自己古怪呀! 可能佢個個人都係咁問呢!
    我真係想問下佢洗牙咁乾淨, 想去下洗, 唔知幾錢呢?
    我度度洗都求其…一係就貴到好離譜, 都唔敢去洗, 容乜易又係好求其,
    所以想請教請教!

  2. 睇到你個blog,我都心思思想箍,但我都33歲,想問你,係唔係真係咁痛,同搵邊個醫生,大概幾錢到,可以pm我嗎?
    想改變的人上

    1. 其實主要唔係痛, 係剛用新箍就有壓力, 及後有酸軟感… 不過隨著日子過去, 我而家就算換新箍都冇乜感覺了! 你33歲, 趁早都應該去箍… 你預2-4年完成啦, 假如唔係好嚴重, 都唔會太耐的

  3. 我都戴到第33個cool了,原本係36個cool完事,但e生話而家未達到理想,下次返去要再印模,佢叫我預加多廿零個cool =o=」……..同埋話新cool 後要加像根添,唉,真係有晴天霹靂既感覺。

    1. 哇, 你去到咁尾先話加箍… 咁真係灰灰地, 不過你都應該留意到未夠完美啦… 而家”免費”再做好啲, 咪幾好… 原來你一直都冇用橡筋, 咁應該唔係太嚴重?

  4. 你好呀!!我都打算年尾箍牙…尋日上網搵資料個陣見到你呢個BLOG
    呢兩日爬晒你D文~你寫得好好呀!!令我知多左好多箍牙既DETAILS野!!
    雖然我應該唔會用aligner(因為我個人比較大頭蝦,應該會用最傳統鋼粒同鋼箍)
    我會繼續睇你個BLOG架!!新年祝你D牙馬上又齊又靚~~
    BTW,請問你知唔知你個牙醫除左隠適美做有無做晒傳統箍牙架??

    1. hi pinky, 多晒你咁有心機睇晒我個blog… 我醫生有做傳統箍架, 不過佢個診所就比較多人做invisalign!

      你年尾先開始呀? 仲有近成年等喎, 你唔心急咩? 嘻嘻…

      新年流流, 我都祝你快啲有美麗既牙齒, 仲要馬上實現… ^_^

發表回覆

你的電郵地址並不會被公開。 必要欄位標記為 *