男人四十先箍牙 (七十二)

[07.11.2013] – week 82 – aligner (29 + 6/32)

上完大陸3日, 今晚返黎… 在船上有兩位師奶級姐姐… 傾傾下計, 突然討論到隱適美… 坐在佢地前排, 訓到半夢半醒既我都特別要豎起隻耳聽下佢地講乜…

大約就係其中一位姐姐話佢打算箍牙, 唔係為左靚, 係為左唔知乜乜乜蛀牙咁上下… 因為冇聽到上文… 所以只係從蛀牙開始聽… 不過都唔緊要… 佢說話中最令我有同感既就係…

佢話而家箍牙兩萬幾, 廿年前又係兩萬幾… 都無貴過… 另一位就話… 點止無貴過, 仲平左啦! 佢話, 廿年前… 兩萬幾係好多…

我就覺得一半半岩啦… 無錯, 廿年前既兩萬, 好駛過而家多多聲… 但係… 如果計返時間… 你廿年前開始箍… 就靚多廿年, 價值遠超兩萬啦! 廿年喎… 除開靚一年只係千零蚊… 比起啲女人每年買啲乜乜美容套票平幾十倍啦, 係咪?

從兩位姐姐既對話, 佢地既仔女都已經讀緊大學架啦… 我偷望左一下佢地, 我諗唔係大我好多… 估計多5, 6年咋… 兒女債都就黎」供完」… 諗諗下, 自己真係大落後… 唉… 又自怨自艾…

返到屋企後… 即刻刷牙, 終於又可以用懷念左3日既水牙線…

水牙線既噴射力度真係唔講得笑… 有時誤中條脷, 都真係有小小赤痛…

但, 不得不提… 水牙線暫時都只係」感覺良好」… 因為… 我今日用完水牙線後, 再用傳統牙線… 竟然俾我在大牙了到一粒晚飯既菜渣… Orz…

希望係我唔識用啦, 否則… 真係未見其效, 先見其幣…

再講, 水牙線既用法係… 在每個我最擔心既黑三角位噴射, 我真係好驚佢會令到我啲三角位牙肉唔再生出黎, 哈哈!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七十二) 有 “ 9 則評論 ”

  1. 你好

    我都有牙齒唔齊.而家考慮緊箍牙用隱適美或傳統鋼箍…係網上扒文.有人話箍完牙後要載穩定器一段時間令牙個位固定.又有人話個穩定器要一直載唔可以停.否則過一段時間後d牙會再走哂位..(咁咪即係要載一世…@@ )
    我身邊d朋友又係咁講..搞到我個心十五十六.想向閣下請教呢個傳言係咪真呢?謝謝.

    1. 當你做完療程後, 唔戴牙箍… 啲牙一下子由被牙箍鎖住, 變成自由移動, 唔多唔小都會走下位 (第日你開始左箍牙你就知, 試下唔戴箍半日, 戴返你會覺得好緊, 証明啲牙半日就會郁左好多)

      因為剛完成箍牙, 啲牙未被牙肉完全鎖緊, 所以完成療程後, 配個穩定器, 令啲牙長期保持在同一位置, 日子耐左, 就會比較固定… 當然鎖得夠唔夠緊, 好睇你生活習慣同年齡啦

      我朋友已經箍完牙幾年, 佢仲晚晚訓覺戴穩定器, 反正夜晚訓覺冇人見, 又唔駛講野, 更加唔駛食野, 戴左可以確保啲牙齒繼續整齊, 何樂而不為, 反正都戴左牙箍咁耐, 都已經慣晒!

      我雖然未箍完牙, 我都已經做好晒心理準備長期用固定器 ^_^

      1. 謝謝你的回應.^^
        其實我心大心細好耐.諗住知多d資料先實行.以前我睇牙醫時佢幫我用物料修補番牙腳刷蝕左既虛位.想請問如果咁樣d物料要起番哂出黎先可以箍嗎?謝謝.
        閣下可以sent你牙醫既資料給我嗎?thx you
        hks28@yahoo.com

    1. 傳統牙線有佢既好處, 我而家就兩樣一齊用, 先用水牙線, 後用傳統牙線; 正常黎既, 用完水牙線後用傳統牙線, 都已經冇乜殘渣發掘到… 但有時都會有的… 成條菜都試過撩到出黎…

  2. 你好,我最近都加入左箍牙一族既行列,我係70後,想做呢件事好耐,到今時今日終於有錢做!
    我想話我一直都好鐘意飲茶,所以有好多牙漬,後來睇某期介紹油拔法可以洗到啲牙無咁污糟,我試左近一個月,唔可以話完全無漬,但感覺上乾淨左,平日刷唔到既鬼鼠無咁臭,你可以一試,篇幅有限,大家都比心機箍牙,加油!

發表回覆

你的電郵地址並不會被公開。 必要欄位標記為 *