男人四十先箍牙 (七十九)

[08.03.2014] – week 99 – aligner (29 + 13/32)

今日換新箍時, 相比左一下新箍同舊箍既色澤… 真係嚇左一跳… 舊箍#12號, 用左只係約兩個半星期… 拼埋雪白既新箍上! 竟然黃到有點恐怖…

只怪我近呢兩個星期, 間中都會偷下懶, 唔除箍就飲奶茶或有色飲品… 雖然我飲完之後都會飲大量清水, 期望會將啲殘留既飲品顏色, 特別係糖份沖走, 以免染色或引致蛀牙…

不過, 事實証明… 係冇用既! 以往換箍, 雖然個箍都係好明顯黃左, 但今次真係黃得太恐怖… 我影左相, 不過以免影響各位網友食慾, 都係係留返俾自己睇, 不時警剔下自己唔好再咁貪飲貪食… 一來對牙齒唔好, 二來… 事實, 我近期真係圓潤左, 個肚腩! Orz

今日翻看facebook舊照片, 我以前影相, 有時都會微微E起棚牙… 我以前, 真心覺得無乜問題… 但而家睇返, 真係四個字… 「有冇攪錯」, 唔明點解舊時可以覺得冇問題…

old_photo_2012
(2012年箍牙前既相片, 當年塊臉仲有啲包添)

某程度, 睇返舊時facebook既相, 除左對後生既自己有啲陌生, 亦都不時有後悔感… 諗如果早幾年, 早十年箍齊棚牙, 我既2012, 2013, 2014會有啲咩唔同呢?

不過, 人當然唔應該成日回頭看…

現在, 我已經唔再吝嗇笑容, 笑多啲, 個人親切啲… 人緣亦都好啲… 我開始認識多左異性朋友, 唔知… 有冇機會今年…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七十九) 有 “ 18 則評論 ”

  1. 睇完你個BLOG覺得好正~
    雖然未睇曬, 但都Thanks for your sharing!
    我之前都有箍牙, 但係就唔係好明你指既」換新箍」 係點@@
    箍箍下點解可以」除箍」既?

    1. 可以」換新箍」, 係因為 invisalign / 隱適美 呢種牙箍, 係可以自助除出黎的, 每兩個星期要換一次新箍, 好似即棄隱形眼鏡咁… 一個療程會有好多副

      同傳統牙箍唔到的, 希望答到你既問題 ^_^

  2. 因為之前諗住箍牙所以睇晒你所有post哈哈
    本身覺得我20歲先箍已經遲…但係睇完你個blog,覺得好安慰haha
    我而家都箍左差唔多一個月啦……
    我同學都話箍完牙異性緣係會好啲XD
    加油呀!

    1. 20歲, 仲有大把青春呀! 讀完書, 箍靚晒去搵工都容易好多! 我都感覺異性緣好左, 我信相, 好大部份都係來自增加左既自信… 笑都唔會再尷尷尬尬… 俾人感覺自然會良好啲 ^_^

  3. 我已箍了牙九個半月, 前面啲牙已大致箍整齊了, 同你一樣, 睇番以前啲牙, 又哨又免仔門牙, 又有四隻彊屍牙, 啲牙又前又後, 唔明以前點解覺得無問題, 仲以為彊屍牙好kawaii, OMG

    1. 係喎, 我以前都」自以為」係兔仔牙, 唔係全排哨出黎無乜問題, 但其實忽略左牙齒前後不整, 牙隙疏, 牙弓尖等等因素… 其實, 前面睇, 自己照鏡尚唔太覺眼, 但旁邊睇, 真係好難睇… 啲牙向外飛, 嗚… 我唔敢睇以前啲相, 唔認得自己側面!

  4. 加油啊,我要成80幾個cool, 依家先去到18, 睇你既blog係樂事,因為我身邊無幾個可以令我暢談cool牙苦與樂 ( 因為人地唔會明要擺舊膠入口幾年既感覺..)
    你出黎既效果好好啊!!我都想cool完之後可以唔再尷尬笑, 我有爆牙, 逼到d牙凹入去…依家努力中…希望你繼續寫啊…你棚牙齊曬都要繼續寫啊哈哈哈哈哈哈….

    1. 80幾個cool!!!… 你羸, 我加埋晒都暫時未夠你多…! 其實呢… 你唔駛cool完之後, 都唔駛再尷尬笑… 因為廿零個箍後, 啲牙已經泊得幾齊了… 你而家都18, 快啦快啦! 進展如何?

發表回覆

你的電郵地址並不會被公開。 必要欄位標記為 *