男人四十先箍牙 (七十一)

[04.11.2013] – week 82 – aligner (29 + 6/32)

等左超長既三個箍x3星期… 終於黎到見醫生既日子…

返左新工後, 基本上只會有星期一一定在香港, 其他日子都係北上漂泊為主… 就係因為咁… 我特別為自己星期一安排左個節目…

就係上心理學課… 上課地點, 仲要在我公司隔一條街咁近… 所以晚7至晚9既課堂… 已經返左連續三個星期一… 都無走過堂…

因為星期一晚要上7-9堂, 所以特別預約左醫生夜晚10點…

一心以為夜媽媽10點先見醫生, 可以避過人潮, 點知… 夜晚9點9到診所, 一樣地人潮洶湧… 一樣地入唔到等候室, 一樣地要企出走廊… 唯一唔同既, 係今次有幾個男性陪我等…

等左5分鐘左右, 等候室有位, 我就坐左入去… 睇住等候室個電視, 播緊tvb」法外風雲」, 等下15分鐘, 等下又15分鐘… 等到10:30, 套劇都做完, 仲未輪到我! o\ _ /o

另外, 坐我旁邊既一位80/90後男仔… 唔知生痔瘡定乜, 全程45分鐘都係半個屎忽離座, 打側坐咁面向住我坐… 亦全程無停過舉起部手機對住我玩, 如果我唔係麻甩佬, 我會以為佢用手機」明拍」我… 呢位哥哥仔, 可能亦有過度活躍症… 佢唔單止面向住我, 亦都不時周身郁… 但最後又會還原, 繼續用半個屎忽坐住面向我… 如果我唔係攰到成個呆晒, 我真係寧願行返出走廊企下…

差唔多等左一粒鐘, 終於輪到我見醫生…

醫生幫我檢查下啲牙(戴住牙箍的)… 話個箍好貼服… 我急不及待, 話醫生聽我戴左3個星期… 仲以為佢會讚下我乖, 點知… 佢都費事理我…

因為個牙箍真係好貼下… 醫生都花左成分鐘先幫我除得晒上下箍…

醫生今次繼續話我啲牙漬問題仍然嚴重… 好彩, 仍不忘送我免費洗牙… 不過可能佢想俾啲小懲大戒我… 今次洗牙, 真係下下到肉… 痛到我緊握雙拳, 差啲尖叫出黎… 幸好我都算係忍得下痛既人… 全程最多忍唔住痛震左幾下咁多…

醫生亦在我每個牙隙中用鉏, 鉏左幾下… 十足拉牙線咁… 而家我啲牙隙又疏返晒了… 啲牙又有位可以走了…

檢查完畢, 最後竟然係廣告時間… 醫生建議我用水牙線, 話佢有代售, 仲有優惠添! 其實… 我一早知啦, 不過唔捨得買之嘛… 見醫生介紹, 順勢問多兩句關於水牙線既功效同用法…

philips_sonicare_airfloss

點知, 醫生又鬼咁有心機… 唔單止俾件實物我試, 仲開個youtube示範俾我睇… 本來已經心郁郁, 正想點頭say yes之際… 醫生仲話而家有半價… 只係四百幾蚊就有交易…!

嘩… 真係即時醒一醒… 証明」早買早享受, 遲買慳兩舊」呢句係硬道理… 只要唔心急, 呢件野由百老匯既九百蚊, 跌到特價六百幾… 都唔捨得買… 而家就再平多兩舊… 所以話, 買野真係唔好太心急…

滿載而歸… 護士俾左4套新箍我, 仲有好豪爽咁塞左七八包橡筋俾我 (成千條橡筋, 真係可以用到下世紀…)

約左下次覆診時間… 已經係下年一月中…

聽朝晨早又要趕船上大陸, 只係太耐冇寫blog… 不得不捱住眼訓打埋篇新blog, 覆埋啲留言先訓… 各位, 早抖了! 下次返來再傾!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七十一) 有 “ 12 則評論 ”

  1. 終於等到你的新日記了!期待你下次講水牙線的功效!

    原來醫生真係可以咁忙,我有時whatsapp佢問佢問題仲好快答我添!

    我都磨左牙,吃野好唔方便,成日sip野,希望磨一次就得…..

    1. 見你寫」終於等到」, 真係令我有少少受竉若驚… 多謝多謝! :P

      磨牙既唯一即時好處… 我覺得係用牙線唔會再kick住kick住… 真係如履平地! 哈哈, 講笑…

      我從來都冇問過醫生野, 好奇一問… 你會問醫生乜野架?

      1. 之前因為有兩次無帶夠時間,要問佢extend幾多日(但奇怪既係一次要extend,一次又唔使)

        仲有一次加左粒粒,佢教左我除,但無教我戴,自己又一直戴唔上(唔敢大力㩒落去),又問佢lor

        你呢度應該有好多粉絲,得閒寫多dee啦(≧∇≦)

      1. 我每次都係用指甲剉, 而家大約知道咩位會刮, 每次換箍前都會自己剉返平..
        我一開始都係係咁刮利,而家已經好少刮了。

    1. 您好, 刮損條脷係必經階段… 正如學行路都一定會跌… 跌跌下就識行了…

      再講, 唔止刮損條脷… 仲會刮損口腔內任何地方, 特別係口腔內唇… 有時除箍失敗反彈就會成忽肉夾住… 不過都係果句, 夾夾下就慣…

      你既invisalign, 係唔係用隻新物料Smart Track? 我覺得呢隻物料柔軟啲, 已經冇之前果隻咁刮了…

  2. 買埋電動牙刷啦,電視賣緊廣告果隻diamond clean 啦,我用左呢支牙刷刷牙,只能用一個字形容」爽」,又係診所買平好多,但診所版就無玻璃杯跟,$910咋,百老匯好似成16xx….
    忘了介紹自己,同你一樣cool緊隱適美,戴到 26/36 喇,剝四隻牙,而家個窿得返好細咋,一齊努力啦!

    1. 我有電動牙刷呀, 不過就唔係超聲波牙刷, 係舊式啲既轉轉轉果啲… Oral-B黎… 在屈臣氏買, 都唔平, 好似都五六百蚊架, 不過而家就變左廁所既裝飾, 好日都唔用一次… 我都係比較鍾意向上刷向下刷既感覺…

      你只剩十個箍咋… 真係超快就可以脫離箍牙生涯… 恭喜晒!

發表回覆

你的電郵地址並不會被公開。 必要欄位標記為 *