男人四十先箍牙 (一O四)

[01.07.2017] – week 272 – (29 + 29 + 23)

各位仲有睇呢個blog既網友好, 距離上一篇文都快一年了, 到底呢一年點過呢? 箍牙生活又發展成點呢? 如果有興趣知, 不妨睇埋落去啦…

自從上年打完最後一篇blog後, 我做左另一個人生大決定, 就係移民了…

生小朋友之前, 完全無諗過自己人生會行呢一步, 不過生左小朋友後, 的確係多左好多野要諗, 例如佢將來既居住環境, 生活, 教育… 等, 真係唔係窮有窮養咁簡單… 眼見屋企附近既所謂名校, 一到啲乜乜收生季節, 就幾千人在校外排隊, benz, 寶馬, 七人車, 各爸媽爺嫲仲有工人齊齊黎霸頭位, 無論有錢無錢一樣黎跨區同你爭一個本來好方便你小朋友返學既學位…

仲有本人住小單位, 生小朋友後都要諗下佢將來既住屋問題, 有得揀都唔想佢繼續要訓廳, 可惜香港住屋問題都係無可救藥, 想換多個房既細單位比小朋友, 我兩公婆都要捱多廿年先再換到一間多幾十呎既屋仔…

今日七一, 香港已經回歸左廿年, 結果係點, 我諗大家都睇得好清楚… 政治野我唔識, 只係小市民一個, 我感覺到既就係市民越捱越辛苦, 連基本生活都要好辛苦先捱到… 我在今年年頭已經移民左外地了… 但我一樣日日睇香港新聞…

好啦, 呻多無謂… 講番我棚牙啦, 其實上一篇文打完無耐, 我就不經不覺地箍完左牙, 開始戴retainer, 而呢款retainer, 應該唔係invisalign原廠出既, 我估係醫生自己搵工廠做的, 所以咁平… (印像中係$200一個, 上下即係$400, 記錯請原諒!), 同埋由倒模至拎retainer都係一個星期, 好快!

就咁睇, 個retainer同透明牙箍差唔多樣, 但拎上手就覺得好薄, 好輕… 戴上去之後, 感覺幾舒服, 因為無左箍得好緊既感覺…

retainers

醫生話retainer只要每日訓覺戴就可以, 不過想戴多啲都無問題… 我戴左四年箍, 咩都慣晒啦, 為左棚牙好, 我決定在可能既情況下, 我都盡量keep住戴個箍…

我揀左每日lunch先除箍, 到食完晚飯後先戴番, 咁樣係最方便我… 因為lunch後好多時公司會有tea或小食, 跟住好快又晚飯, 又戴又除的確係好唔方便…

呢個模式, 我就一直keep住到現在了…

不過, 戴左大約個半月左右, 呢個透明retainer就開始有啲破損… 唔知係唔係有時合埋口時用力得滯, retainer在犬齒咀嚼位附近開始穿窿… 去到兩個半月時, retainer其中一邊就裂開左了, 我估佢都唔會太襟用…

holes

crack

返去牙醫診所例行檢時, 姑娘話可以繼續戴住先, 直至做過新既先換都ok…

我同診所講左我會移民, 無機會成日覆診啦… 我問可唔可以第日爛左時, 叫診所寄過副新既比我… 點知, 原來診所話再次拎retainer都要重新倒模, 舊既模用完就唔會keep架啦 (我仲以為啲野入晒電腦, 一想要就可以打印番出黎添… ORZ)

既然如此, 咁我就要求一共做兩副retainer啦 (即係$400×2=$800)

由於我飛左就無得番轉頭, 所以姑娘好努力地幫我倒模, 目標係要倒到一個好完美既模去造retainer… 卒之, 我印像中好似上下夾埋倒左十幾次, 倒到成枱都係模先滿意, 其實我心裡面超感激佢地既專業, 不過只係天性怕醜無當面開口讚下佢地…

mould

2016年年尾, 我就拎左將會陪住我外地生活既兩副retainer… 姑娘話雖然我打算戴爛一副先換另一副retainer, 但建議我久唔久要換黎戴下, 以免有一副太耐唔用, 啲膠會硬化…

聽落又有道理, 副新retainer我就大約戴左一個月, 我就換上另一副新既retainer…

唔戴由自可, 一戴… 咦?!?! 咁緊既…? 原來… 兩副retainer雖然係同一個模啤出黎, 但肯定已經唔係完全相同了… 以我既推斷, 應該係戴左一個月既retainer, 已經變左型… 所以我既牙隨住retainer既變型, 已經同無用過既果副越差越遠, 所以一換副新既, 就覺得好緊囉…

換句話說, 得閒換下呢一招, 應該就係唔work架啦… 我都唔想我棚牙成日都retain唔到個型… 寧願爛到無可再爛先換另一副了 (到時戴唔戴到, 到時先算!)

而我保存副retainer既方法係…. 得閒就濕下水, 等佢唔會乾到裂囉, 希望呢招work啦! So far到依一刻, 副retainer好似仲好好…

不過, 戴開果副retainer, 就真係五勞七傷了, retainer犬齒位已經穿左窿, 近智慧齒位置, 仲斷成兩節, 不過由於我仲想捱多陣先, 所以仍然堅持唔換… 睇下仲可以捱幾耐囉, 其實… 都算襟捱, 年頭戴到而家, 都戴左足足半年了…

好啦, 呢篇文係襯個女午睡時寫的… 個女起左身, 又要停筆了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O四) 有 “ 21 則評論 ”

  1. 時間真係過得好快,唔經唔覺我都箍完牙戴緊retainer了…唔知你記唔記得之前我都有寫blog講箍牙,但係一換咗電話唔見咗密碼就再冇update過了…你介唔介意講吓你移咗民去邊?同埋鐵嘅retainers真係好麻煩又成日都有送氣聲噴出嚟><

  2. 你個retainer好平呀! 我第一個retainer的下排都仲用緊 (大概已3年多了), 不過上排因為除左個手勢唔好, 中間裂開,近來也捱不住了…..我去個醫生同影相差唔多的都1000 (個個係我第一個裂左後再整, 不過我覺得D膠無咁厚無咁抵捱…2年前了, 但因為覺得沒第一個retainer那麼緊所以一直沒用).

    原來倒模係咁緊要… 我個時都倒左2次模, 我個時諗點解要整多次…>< 係咪我掙紥得太勁….我新個個上排retainer感覺好怪, 咬合唔係太好, 雖然我都係訓覺先戴所以唔太影響生活~

    如果你唔介意可唔可以PM我醫生資料? thanks~

  3. 嘩, 你呢幾年的變化, 唔單止可以寫blog, 簡直可以寫長篇小說. 我個retainer帶左兩個月就帶爛左, 但都仲可以繼續帶, 係傳統retainer, 醫生話買個新要5千幾蚊, WTF

    1. 傳統retainer即係邊款?即係我兩年前副」假牙」?不過我都叫戴得好小心了,無帶住黎食野,除左就一定會沖水或者刷乾淨放入盒度,如果一副retainer要五千幾蚊,帶兩個月就爛,咁就真係好唔抵!

  4. e….乜個retainer要另外俾錢既咩? 唔係包埋架?

    BTW, 你既變化都好大. 哈哈. 要一次過恭喜你結婚, 生仔兼成功移民
    All the best!

    1. 係呀,變化真係好多好大,其實,某程度上都係拜箍牙所賜,個人無左信心,真係做乜都唔敢

      retainer,應該咁諗,第一副係包既,不過我經驗係都算幾易爛,所以,長朋難顧,醫生同你幾friend都好,要換新都要收你錢呀,哈!

    1. 有時間我都想寫架,人生去到另一階段,啲時間好多都花左小朋友上,有時靜落黎,都好多自己既興趣夢想去追,當然打blog都係興趣,不過真係要好靜心咁先會落手坐定定咁打
      我都唔係咩社會評論人,我只係小市民,但我眼見既生活越黎越差,我只係想付出同收入有個平衡咋,我住深水埗窮區,牛腩麵呢十年由十蚊碗每年加兩次加到廿二蚊碗了(當然遠比x記四五十一碗平子多),香港收入中位數都無升一倍啦呢十年…

    1. 等我諗下點樣可以轉型為移民日記先,哈,我個女就快兩歲,佢啲牙都有啲唔齊了,外國箍牙好普遍,唔知捱唔捱到佢換恒齒箍牙繼續寫呢?哈… 到時我應該都唔再戴retainer啦呱,不過,世事係難料既…

  5. 我第一次想箍牙大概係13年,當年岩岩出黎做野,驚影響儀容,拖一拖就去到15年。
    當時睇到你嘅sharing,令我再有衝動, 可惜當時諗住同男朋友結婚、覺得不急於一時。
    到上年回復單身,終於忍唔住去左consult,內心糾結掙扎一輪係呢兩日上左箍啦。
    多謝你呢過百篇嘅分享、如果唔係我都唔知要拖到幾時=]
    祝你移民一切順利,生活安康

    當然希望你可以抽到時間 間唔中都updates下個blog啦

      1. Hey Tracy, 我地一齊變靚啲啦哈哈😁

        而家大概一個星期左右,有啲啲刮肉有啲啲哈慣 不過係頭兩日無咩胃口 希望之後一切順利哈洗箍足2年半啦😉

    1. 嗯,有心唔怕遲架,恭喜你終於上左箍了!你13年先出黎做野,而家先17年,正所謂大把青春呀!講真我都做左成十六七年野先上箍…
      我而家要忙既事都開始settle down,我都希望多啲寫下blog,同個大家分享多啲呀

      1. 今日岩岩剝左兩隻牙就收到你回覆,好鼓舞士氣呀=]
        原來無自己想像中咁多不便,還好都可以係30歲之前下定決心去做左呢件事,感覺唔錯!
        多謝同期待你往後嘅分享

發表回覆

你的電郵地址並不會被公開。 必要欄位標記為 *