男人四十先箍牙 (一O三)

[04.08.2016] – week 225– (29 + 29 + 23/26)

好耐冇寫文了, 不經不覺, 原來已經八個月無寫, 我估好多人都覺得我從此收筆…

不過當然唔係啦, 我團火仍在, 只係人生到左另一個階段, 係比較多野要兼顧, 唔似得舊時單身寡仔, 成日對住部電腦, 咪好多時間寫文囉…

趁今日個女訓左, 心血來潮即刻寫啦… 費事機會錯過左, 又唔知等到幾時有下次…

人生另一個階段, 我唔係指結婚喎, 結婚已經係我上年既里程碑, 我今年已經做左老豆了! ^_^

無錯, 係戴住牙箍咁做埋老豆, 呢個療程真係多姿多采…

所以點解我咁少時間寫文, 其實從我老婆大肚, 個女出世, 直到今日, 我真係身心俱疲, 有時間都會休息下, 或者享受下家庭樂… 雖然成日想寫, 不過最後都係無寫…

另外, 今年經濟唔好, 公司裁員… 好多人又離職, 真係好混亂呀! 正所謂, 要走既好容易, 留係度既人先係最鞎難…

好啦! 報告左好多近況, 係要講下我棚牙箍成點了!

本來呢, 過去左既星期一就換retainer, 點知打八號風球, 就臨時改左聽日…

本來仲剩番3個箍未戴, 不過上星期覆診既時候, 醫生話已經可以開始戴retainer了… 經過上次既鐵線retainer教訓, 今次我第一時間舉手話要做透明retainer, 比醫生出聲還要早… 見佢本來諗住比個slide我揀架…

我就好堅決咁話, 上次戴鐵線, 我真係連講野都有困難, 所以我都係覺得用番透明箍最方便… 醫生話retainer每日要戴10-12個鐘, 其實我就無所謂, 做左透明箍, 就算返工戴都好ok…

今次比較驚喜既係, 做透明retainer, 只係一個星期咋… 咁快既? 舊時我記得要3-4個星期… 唔通科技已經進步左咁多? 畢竟我都箍左4年牙… 可能而家做箍真係快左好多!

近幾次同醫生既無聊對話, 變左湊仔經, 原來醫生既」小朋友」已經好大了… 去左外國讀書, 而我呢… 岩岩先出世, 唉… 真係仲有排捱… 醫生傳授左小小湊仔貼士比我, 試過都(有時)ok架…

唔知, 仲有冇幾年前既網友仲間中睇下我個blog有冇update, 隔左8個月無update, 仲會失驚無神黎睇下… 而又岩岩睇到update呢? 打個招呼丫… 我都好有興趣知道大家既進度… 應該, 正常都箍完左啦?

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O三) 有 “ 20 則評論 ”

  1. Hello~(揮手中)我仲有睇架!你的人生進度好快喔!😊😊
    我都箍完啦,帶緊retainer,可惜左門牙還有輕微唔齊,醫生話一係再磨牙,重新帶箍,一係就接受…..爭扎中🤔

  2. wow, 你箍牙呢幾年真係變化好大, 我箍牙呢三年, 除左啲牙有move on, 其他野都原地踏步, 我今個月尾拆箍lu, 希望帶住果個retainer, 講野無困難啦.

  3. 你好,我cool牙都係用隱適美,年頭轉月retainer, 點知上個月唔見左,無晒cool喺身, 醫生用紀錄幫我再印,但幾個星期後去攞,已經帶唔到, d牙走左位。 醫生幫我印模做retainer要等成個月,如果想調番位帶膠cool佢又要我再加錢。 我見你個牙醫幾好,又肯幫你再印cool 效率又高,你可以介紹你的牙醫俾我查詢下嗎? 謝謝

  4. 你好~我剛剛開始 WEAR INVISALIGN AH, 不過我有樣野做得唔對, 就係我TRAY 1 覺得 LOOSE, 我自己提早左2 日 TRAY 2…其實我curious tray 2 既感覺會係點, 試下, 又 fit 到wo…之後點之我在另一度見咁樣係唔得既, 可以有serious impact…咁我打返去 clinic 啦, 問下 nurse 點好…佢話宜家 tray 1 tray 2 beginning 就算啦 (可以點?!) 當然之後一定唔可以再咁啦…but i was worried…so stupid i was….

  5. 其實我呢個情況…係咪等如 wear 唔夠一曰 22 個鐘數 就換 tray? 如果真係唔夠22 小時, 你地會自己 extend 定係都會照 wear new tray ? thank you.

  6. Hello~恭喜你呀!做左人爸爸一定好多嘢忙, 你加油呀。我有時有咁忙都會上黎睇下架。
    你記住要UPDATE AR., COOL完都可以講下你嘅日常~
    我黎緊9月10號先開始箍, (其實應該話先去剝牙…)
    我會用傳統嗰種+白色粒粒, 希望成果可以好好LA ><

  7. Hi, 恭喜你的各樣,仲箍完牙添

    我下個月就已經箍左兩年了,初時仲預計一年零九個月攪掂😔
    希望年底可以完成啦, 醫生建議最後再"磨牙"箍多陣,我諗我唔會啦, 就咁啦,仲有少少哨姐,算了

  8. why not finish the little extra and then have a perfect teeth wo?再"磨牙"箍多陣 not good?
    my expecting period is 45 trays…now only on tray 4

  9. 第一次睇你個blog應該是2,3年前?個時你已經箍左一段時間,記得你說過當時經常往返內地工作,想不到今日已經升職為人父!恭喜恭喜 (哈哈哈)
    但是關於我的箍牙問題這2,3年間仍未開始,我case系門牙有少少哨
    (因為個陣剛剛讀U,心大心細,又無錢箍。。。想多了反而說服自己其實都唔系好樣衰姐?呵呵)
    就咁過左2,3年,我又想箍牙,因為唔齊既牙令我好容易蛀牙
    而且貪靚左,哨牙真系好影響first impression。。。
    但呢一刻我好後悔,因為箍牙又貴左少少啦(當時就應該借loan整牙T_T)

    PS:在此十分建議有牙齒問題,想箍牙既朋友一定要在心血來潮的時候做好research同評估
    因為之後只有箍左牙好開心,或者無箍牙好後悔,呢兩個情況。。。唯有相信有心唔怕遲!

  10. 你好樓主,我想問問,你是不是選擇拔牙?拔了多少隻牙,我也就快見醫生選擇拔4隻牙還是不拔牙(也要拔2隻智慧齒)。

  11. 你好阿
    一口氣睇曬你咁多篇
    我呢排都周圍搵緊牙醫
    想請問你係係邊個牙齒到cool?
    可以email我嗎
    謝謝!!

  12. 樓主,恭喜你結婚做左爸爸呀^_^,我同你一樣在波哥度箍牙,不經不覺一年零九個月呀,由勁哨門牙,剝牙加骨釘拉橡根等過程…..過左之後,睇住門牙越黎越平,好開心! 好鐘意你呢個BLOG描述箍牙過程生動有趣,深有同感呢~

    我第一批牙套帶到30箍唔啱位,要再加箍,重新計算55箍,而家先12箍…..相信同你一樣要四年時間左右先箍完呢~ 請你有時間再寫BLOG, 大家好鐘意睇, 祝你一家人身體健康,開開心心~

  13. 前几日search整牙D野無啦啦見到你篇文,觉得几好睇就一口氣睇哂況入你咁耐以黎既牙經(當然有飛黎睇),一睇就知你去趙波波度cool,因為你描述得太好喇(我都係佢度cool)。每次覆診都等到發霉😑
    唔知你近況如何呢?最後一篇己經係上年8月了。

  14. hello, 還記得我嗎?我估係你呢個blog度,我都算係最早既網友了。我係用內箍o個位呀。
    時間真係好快,的記得第一次發現貴blog 係5年前,當時我正都36歲,我覺得同你好親切,大家都係臨近40先箍牙。但我呀,今日仲箍緊,因為仲差少少少少,醫生話要埋晒先幫我拆箍,不過,我都冇所謂了,因為帶左近5年箍,有時覺得佢地箍住,有一種安全感,我好怕一拆箍啲牙走返原位呀。
    剛剛睇你近況,原來呢幾年我同你都變左好多,我年底都結婚了,希望都可以快啲學你咁生個小朋友玩下(或被玩下)啦。我有時間會再黎呢度的,祝你一切順利、家庭幸福。

發表回覆

你的電郵地址並不會被公開。 必要欄位標記為 *