男人四十先箍牙 (一O七)

[24.12.2017] – week 296

轉眼又到聖誕節,係呢個普天同慶既節日,大家都忙住搵好既美食,買自己同至愛既禮物,又或者被迫公式地在公司交換一啲在限額內好難買到心儀既禮物?

今年,我既聖誕過得好平靜,最少無左在公司熱熱鬧鬧既聖誕氣氛,以前,每年差唔多時候都會被問及,你今年送咩比女朋友呀?送咩比老婆呀?唔訂間好啲既餐廳食飯,唔送禮物,送啲無心意既禮物,咁唔得架喎!好似無安排乜野驚天地既事件係一種罪咁…

今年,再無人問我呢啲問題,因為我已經無同事,無得」被參與」同事之間既佳節討論… 反而,近日在facebook上睇到篇share文,令我突然有些感概,我想在今個聖誕開始,為世上有需要既小孩出一分綿力…

http://news.now.com/home/international/player?newsId=247578

我記得我在幾日前facebook見到呢篇share,我係無click入去睇的… 因為黑色一堆野,我無細心留意標題或相片,好快就skip走左,但呢幾日黎間唔中都有唔同既朋友share張類似既相,咁我就click左入去睇…

原來篇文描述阿根廷有好多被迫行乞既小朋友,其中一位小女孩在炎熱既天氣中,跪在路上㖭地下既污水解渴,事件再令人反思到,社會貧窮問題很嚴重,世界上有非常多小童仍在惡劣環境下中成長…

我們在香港長大,開水喉就有源源不絕既乾淨食水,無乜人會意識到佢既價值,但世界上一直都有好多人,連一口乾淨既食水都無機會飲… 當然,莫再講到其他既資源…

可能有左小朋友,希望小朋友從小就可以得到愉快既童年,得到教育,亦會學懂幫助別人…

真係唔知點解,今朝一醒來,就好想去試下助養兒童… 認真講,我以前都間中有捐下錢比天災籌款,乜乜歡樂滿東華,歡樂傳萬家,或賣旗… 甚至會比下街邊既乞兒,不過近年太多乜乜大陸職業乞兒湧港,慈善基構行政費過高等,都好令到我卻步…

好多年前,已經有朋友/同事每月捐助助養兒童,我都不以為意… 今次,我唔知從邊度黎既堅決,想由今年開始,嘗試下呢種方法助人…

用左啲時間網上爬下文,發覺比較多人從宣明會助養出發,因為佢個結構好成熟,每年都有報告比番你知道受助兒童既情況,對於我呢種IT人,或新手助養者,report其實真係幾重要,可能係職業病,投放左資源,都想知道下佢既狀況…

在宣明會既網頁爬左一陣,見到有每月助養計劃,而佢都隨機比左一位小朋友資料我,小朋友係來自柬埔寨既3歲小女孩,我好多年前都去吳哥窟旅遊,每個景點都有好多兒童圍住前來既遊客,伸手行乞,團友們有些會給零錢,零食,甚至早預備好既文具,的確係印像深刻…

在決定助養這個小朋友後,填上簡單的個人資料,給捐款賬號,就完成整個手續了,在IT普及既年代,真係如多年前既一句,多繁複既程序,做乜都係㩒幾個掣就攪掂左…

呢篇文,其實同我平時寫既blog文有啲唔同,不過我都想趁在呢個普天同慶既日子,分享下我今年既喜悅…

在此祝各位聖誕快樂,新年進步… ^_^

(待續…)

 

 

 

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O六)

[09.12.2017] – week 293

有緣之下,我在12月返左香港,返得香港,其中一個指定節目,就一定係去探訪下牙醫,同埋交保護費… 點解咁講呢?就係我第3套retainer又開始爛啦!穿晒窿,下箍已經斷斷地,難聽啲講,真係吊吊fing,得番個樣,都唔知仲有冇retainer既能力…

到港後,拿拿聲打電話去book時間約見醫生,再造兩套新retainer,打電話約時間果陳,姑娘竟然出口問:」咦?你番左黎呀?」

其實我唔係好認得姑娘把聲,次次都係草草約好個時間就收線,我對聲音無乜概念,可能見過,可能未見過都話唔定,因為醫生唔止一間診所,所以我連個電話係打去邊個診所都唔知,總之約到時間在診所見醫生就ok,我個人就係咁,唔太想理過程,只理結果!哈!

好,叉遠左… 講番醫生診所既CRM又似乎做得幾好喎,真心比顧客覺得被關注… 個心真係暖左一下既認真講…

咁我就話,我任何時候都方便,最好無乜人既時候啦,唔想排大隊… 咁姑娘最後,幫我約左… 下星期五既21:45… 當時我心諗… 下… 黃金時間黎喎… 不過算啦,佢話幾時我都真係無所謂的…

跟住,姑娘話我知,retainer加左價,要$300一隻,即係一對要$600,兩對要$1200… 哇what the…!一年姐… 加左50%!姑娘急忙話,係工場加價喎… 當然我都比唔到乜反應,唔通唔造咩,咁$1200都要比架,除非我唔再用retainer,或在英國搵到新牙醫囉…

不過講真,我對在英國搵到又平又好既牙醫都好睇淡,因為歐洲乜都貴,$1200即係£110左右,其實算係好少錢黎咋,屋企係咁易壞一壞暖爐,搵人黎check下,tune左兩野攪掂,無換零件都要£100… 你話去睇orthodontist唔比佢殺到一頸血我就唔太相信…

好,轉眼又到左下星期五,守時既我21:30就到達牙醫診所,事實上真係比預期中少人,起碼個等候室仲有一兩個單人位可以攝入去,眼見,竟然都有啲單身漢等緊… 佢中中地年,原來越黎越多男人四十先箍牙,等多一陣,仲有對阿公阿婆入埋黎添… 今次真係無左以前果種年齡層被孤獨既感覺…

等下15分鐘,等下又15分鐘… 我真係好眼訓,手機facebook朋友圏既update都已經睇完晒,連佢地既朋友名背熟埋都未輪到我… 又話幫我排個無乜人既時候既… 呃我…

諗諗下,原來上次黎已經係一年前… 時間真係過得好快,咁就一年,人生真係有幾多個一年… 再諗下… 原來我箍牙已經係2012年既事… 今年已經係2017年尾,即係我已經箍左5年半牙…

諗下諗下… 我個女都就黎兩歲,我由未識我老婆之前好耐已經開始箍牙…

無聊既時間,真係會令人在唔同既時空穿梭,諗下呢樣,諗下果樣… 終於諗到差唔多22:45,姑娘就嗌我個名了… 哇!遲左1個鐘… 醫生,你都真係好好生意喎… 另一方面,我亦都心中暗罵,你地既時間控制咁多年一啲都無改善到囉…

入到去坐」手術椅」,同以前一樣,都唔係牙醫招呼我,好似都係上年位姑娘,雖然戴住口罩,我都有印像係同一個人黎… 姑娘好快再提多我一次,retainer加左價,$300一隻… 問我想整上箍定下箍…

我話想整兩套牙箍… 即係上下各兩隻,即係合共$1200… 咁姑娘就話,咁要做四隻模… 我就話,上年我黎都係做一對模就可以印兩套箍啦… 姑娘話,原來我係錯架!工場每一隻箍要用一隻模,印完個模就唔可以再用架啦!

電光火石之際,一切迷團仿似都解開左,點解我上一次同時間印果兩套箍竟然唔同拉力,我終於明啦,因為做retainer倒模呢件事,根本就係一件好鬼low tech既事…

真係用啲黏土倒模,再印個膠箍出黎,就係咁… 完全係幾十年前既play-doh技術,唔係invisalign果種科技,data入左電腦,佢就可以印印印印印無限個完全一樣出黎果種…

咁當然,invisalign果啲生產機器成本投資又高好多姐… 工廠印啲牙模,可能成本低,回報高呢…

今次印模都好順利,話咁快就印左四個模,姑娘話有一個印得小小唔係幾好,問我介唔介意印多一次,我反而話比佢聽,我上一次印左十幾隻呀,今次每隻都一take過成功,我反而好顎然!

印好晒要既牙模之後,都等左幾耐,牙醫終於出場,佢都真係夠忙… 我仲以為今次印模係唔會見到佢添…

牙醫走黎望下印好既模… 好似QC咁囉,佢決定用唔用得,結果係OK既,可以拎去造箍…

牙醫問我,你而家係邊呀?咁當然我懶係幽默咁,話我而家梗係係香港啦!當然,呢個gag連我自己都覺得爛出宇宙,當時大家都無聲出(話題終結者模式)…

跟住下一句醫生問我,會唔會走架?咁我話… 我移左民架啦,會聖誕前走啦…

咁佢念念有詞,話OK啦,夠晒時間做好啲箍比我… 之後就寒暄下… 話我記得你做智能卡果個丫嘛… (其實佢次次見我都係咁講) 跟住問我小朋友幾大,而家做緊乜,住係邊之類…

跟住由我頭打量到我腳咁,好彩我唔係女,唔係我就肯定會#MeToo佢… 佢話,你又無乜肥到喎,佢話覺得啲人去左歐洲日日fish and chips一定會肥… 我就話,我過到去都係食住家飯,都好健康… 其實又真係既,自從過左去之後,食多左住家飯(感謝老婆),比香港少左好多出街食既機會,我體重不升反跌… 真係面都尖左…

每次做完牙模,唔知點解一定成臉成頸成身都係紫色既黏土碎,我找完數之後,姑娘追出黎話我頭先印模除左個retainer漏低左無拎,仲提我話仲有好多黐住塊面同頸,比濕紙巾我抹,但可能見我論論盡盡,就忍唔住好細心咁幫我抹走臉上啲黏土,哇… 好彩我已經結左婚,唔係我真係以為春天到左呀,鬼咁warm呢…

最後,同上次一樣,兩套retainer都係一個星期後可以去診所拎,真係好快… 岩晒我!可以好安心咁離開前拎到retainer…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O五)

[09.11.2017] – week 289 – (29 + 29 + 23)

終於比上一次更新快,上次等左成年,今次,只係等左三個多月,就更新了… 事源係有日想美化下個blog時,突然發現免費既wordpress blog已經封鎖左好多功能,綁手綁腳,要join paid membership先有可用啲功能,咁唯有睇下收費計費,哇!唔平喎,幾十蚊一個月既服務費呀要…

當然,作為it人,我從來都肯為用it服務比而錢,但比要比得值囉,cp值呀you know?都諗左一陣,我決定自己host個blog,計落成本差唔多,當然,有部份成本係要我自己建立一個網站同網名,我都用左成差唔多半個月,終於在10月中左右搬好晒呢幾年寫既blog文,去到http://braces40.com呢個網頁上:

靚唔靚呀?其實,都係好standard既網誌樣,不過起碼要點整點放都好自由,順手整左個facebook page,要圍埋傾計都反應快好多,方便好多,都算係發it痕,叫做乜都試過下咁啦… 以後再寫文,都會寫去新既地址了,有興趣既,請移到新地方繼續傾下計啦…

好了,講返我箍牙既進度…

其實已經唔記得左用retainer用左幾耐,大既係移民前一段時間,我其實都要睇返自己個blog文先搵得番我箍到幾時轉retainer,不過,我第一套retainer終於在九月尾左右爛左了,其實本身都好爛架啦,係我自己穿晒都唔捨得換

老婆都睇唔過眼,叫左我換副新既好多次,鬼咩,我除左箍之後放在廁所既洗手盤上面,一副爛溶溶既膠箍,又的確係幾樣衰下… 終於,九月尾我終於鼓起勇氣掉左佢,換左另一副了…

點解咁耐都唔捨得換,理由最大當然係,換一副少一副啦,又唔係啲可以re-order既產品,再要配,就要返香港了(假如搵番同一個牙醫),心諗,invisalign國際性喎,無理由英國無,咁一搵之下,原來invisalign自己出既retainer有名架,叫做vivera retainers,其實睇落同我用緊既差唔多樣,不過,一語中的,佢話」Vivera’s proprietary material is 30% stronger than other leading clear retainer materials, which helps to maintain your smile.」

我留意到屋企附近有invisalign既orthodontics,要搵日去問問價錢先,不過呢邊既物價好高,特別同service相關既,所以,心目中都諗,可能要成二三千蚊一副唔出奇… 希望冇計小到,但唔知」原裝」invisalign既retainer係唔係真係咁好呢?

當年,仲箍緊牙既時候,印像中有一副箍用左成半年,真係好襟用喎,都無穿無爛,係污糟啲,不過起碼唔會好似而家副retainer咁,一個個洞,又有破裂,當然,價錢又相差好遠,而家retainer係4百港幣一對,如果效果相同,真係1對抵5對價錢,值唔值就見人見智了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O四)

[01.07.2017] – week 272 – (29 + 29 + 23)

各位仲有睇呢個blog既網友好, 距離上一篇文都快一年了, 到底呢一年點過呢? 箍牙生活又發展成點呢? 如果有興趣知, 不妨睇埋落去啦…

自從上年打完最後一篇blog後, 我做左另一個人生大決定, 就係移民了…

生小朋友之前, 完全無諗過自己人生會行呢一步, 不過生左小朋友後, 的確係多左好多野要諗, 例如佢將來既居住環境, 生活, 教育… 等, 真係唔係窮有窮養咁簡單… 眼見屋企附近既所謂名校, 一到啲乜乜收生季節, 就幾千人在校外排隊, benz, 寶馬, 七人車, 各爸媽爺嫲仲有工人齊齊黎霸頭位, 無論有錢無錢一樣黎跨區同你爭一個本來好方便你小朋友返學既學位…

仲有本人住小單位, 生小朋友後都要諗下佢將來既住屋問題, 有得揀都唔想佢繼續要訓廳, 可惜香港住屋問題都係無可救藥, 想換多個房既細單位比小朋友, 我兩公婆都要捱多廿年先再換到一間多幾十呎既屋仔…

今日七一, 香港已經回歸左廿年, 結果係點, 我諗大家都睇得好清楚… 政治野我唔識, 只係小市民一個, 我感覺到既就係市民越捱越辛苦, 連基本生活都要好辛苦先捱到… 我在今年年頭已經移民左外地了… 但我一樣日日睇香港新聞…

好啦, 呻多無謂… 講番我棚牙啦, 其實上一篇文打完無耐, 我就不經不覺地箍完左牙, 開始戴retainer, 而呢款retainer, 應該唔係invisalign原廠出既, 我估係醫生自己搵工廠做的, 所以咁平… (印像中係$200一個, 上下即係$400, 記錯請原諒!), 同埋由倒模至拎retainer都係一個星期, 好快!

就咁睇, 個retainer同透明牙箍差唔多樣, 但拎上手就覺得好薄, 好輕… 戴上去之後, 感覺幾舒服, 因為無左箍得好緊既感覺…

retainers

醫生話retainer只要每日訓覺戴就可以, 不過想戴多啲都無問題… 我戴左四年箍, 咩都慣晒啦, 為左棚牙好, 我決定在可能既情況下, 我都盡量keep住戴個箍…

我揀左每日lunch先除箍, 到食完晚飯後先戴番, 咁樣係最方便我… 因為lunch後好多時公司會有tea或小食, 跟住好快又晚飯, 又戴又除的確係好唔方便…

呢個模式, 我就一直keep住到現在了…

不過, 戴左大約個半月左右, 呢個透明retainer就開始有啲破損… 唔知係唔係有時合埋口時用力得滯, retainer在犬齒咀嚼位附近開始穿窿… 去到兩個半月時, retainer其中一邊就裂開左了, 我估佢都唔會太襟用…

holes

crack

返去牙醫診所例行檢時, 姑娘話可以繼續戴住先, 直至做過新既先換都ok…

我同診所講左我會移民, 無機會成日覆診啦… 我問可唔可以第日爛左時, 叫診所寄過副新既比我… 點知, 原來診所話再次拎retainer都要重新倒模, 舊既模用完就唔會keep架啦 (我仲以為啲野入晒電腦, 一想要就可以打印番出黎添… ORZ)

既然如此, 咁我就要求一共做兩副retainer啦 (即係$400×2=$800)

由於我飛左就無得番轉頭, 所以姑娘好努力地幫我倒模, 目標係要倒到一個好完美既模去造retainer… 卒之, 我印像中好似上下夾埋倒左十幾次, 倒到成枱都係模先滿意, 其實我心裡面超感激佢地既專業, 不過只係天性怕醜無當面開口讚下佢地…

mould

2016年年尾, 我就拎左將會陪住我外地生活既兩副retainer… 姑娘話雖然我打算戴爛一副先換另一副retainer, 但建議我久唔久要換黎戴下, 以免有一副太耐唔用, 啲膠會硬化…

聽落又有道理, 副新retainer我就大約戴左一個月, 我就換上另一副新既retainer…

唔戴由自可, 一戴… 咦?!?! 咁緊既…? 原來… 兩副retainer雖然係同一個模啤出黎, 但肯定已經唔係完全相同了… 以我既推斷, 應該係戴左一個月既retainer, 已經變左型… 所以我既牙隨住retainer既變型, 已經同無用過既果副越差越遠, 所以一換副新既, 就覺得好緊囉…

換句話說, 得閒換下呢一招, 應該就係唔work架啦… 我都唔想我棚牙成日都retain唔到個型… 寧願爛到無可再爛先換另一副了 (到時戴唔戴到, 到時先算!)

而我保存副retainer既方法係…. 得閒就濕下水, 等佢唔會乾到裂囉, 希望呢招work啦! So far到依一刻, 副retainer好似仲好好…

不過, 戴開果副retainer, 就真係五勞七傷了, retainer犬齒位已經穿左窿, 近智慧齒位置, 仲斷成兩節, 不過由於我仲想捱多陣先, 所以仍然堅持唔換… 睇下仲可以捱幾耐囉, 其實… 都算襟捱, 年頭戴到而家, 都戴左足足半年了…

好啦, 呢篇文係襯個女午睡時寫的… 個女起左身, 又要停筆了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O三)

[04.08.2016] – week 225– (29 + 29 + 23/26)

好耐冇寫文了, 不經不覺, 原來已經八個月無寫, 我估好多人都覺得我從此收筆…

不過當然唔係啦, 我團火仍在, 只係人生到左另一個階段, 係比較多野要兼顧, 唔似得舊時單身寡仔, 成日對住部電腦, 咪好多時間寫文囉…

趁今日個女訓左, 心血來潮即刻寫啦… 費事機會錯過左, 又唔知等到幾時有下次…

人生另一個階段, 我唔係指結婚喎, 結婚已經係我上年既里程碑, 我今年已經做左老豆了! ^_^

無錯, 係戴住牙箍咁做埋老豆, 呢個療程真係多姿多采…

所以點解我咁少時間寫文, 其實從我老婆大肚, 個女出世, 直到今日, 我真係身心俱疲, 有時間都會休息下, 或者享受下家庭樂… 雖然成日想寫, 不過最後都係無寫…

另外, 今年經濟唔好, 公司裁員… 好多人又離職, 真係好混亂呀! 正所謂, 要走既好容易, 留係度既人先係最鞎難…

好啦! 報告左好多近況, 係要講下我棚牙箍成點了!

本來呢, 過去左既星期一就換retainer, 點知打八號風球, 就臨時改左聽日…

本來仲剩番3個箍未戴, 不過上星期覆診既時候, 醫生話已經可以開始戴retainer了… 經過上次既鐵線retainer教訓, 今次我第一時間舉手話要做透明retainer, 比醫生出聲還要早… 見佢本來諗住比個slide我揀架…

我就好堅決咁話, 上次戴鐵線, 我真係連講野都有困難, 所以我都係覺得用番透明箍最方便… 醫生話retainer每日要戴10-12個鐘, 其實我就無所謂, 做左透明箍, 就算返工戴都好ok…

今次比較驚喜既係, 做透明retainer, 只係一個星期咋… 咁快既? 舊時我記得要3-4個星期… 唔通科技已經進步左咁多? 畢竟我都箍左4年牙… 可能而家做箍真係快左好多!

近幾次同醫生既無聊對話, 變左湊仔經, 原來醫生既」小朋友」已經好大了… 去左外國讀書, 而我呢… 岩岩先出世, 唉… 真係仲有排捱… 醫生傳授左小小湊仔貼士比我, 試過都(有時)ok架…

唔知, 仲有冇幾年前既網友仲間中睇下我個blog有冇update, 隔左8個月無update, 仲會失驚無神黎睇下… 而又岩岩睇到update呢? 打個招呼丫… 我都好有興趣知道大家既進度… 應該, 正常都箍完左啦?

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O二)

[31.12.2015] – week 194 – (29 + 29 + 13/26)

終於趕得切在2015年既最後一日寫文… 不過都係蛇王在公司時間寫, 因為今日公司實在充滿住一股假日氣氛, 而我… 亦都好想趁住呢種氣氛黎打我呢篇文章…

對上一次寫文, 已經係個半月前既事了…

而呢個半月內, 我人生亦踏入左另一個階段…

就係… 我在十一月底… 結左婚啦!

係唔係好突然呢? 不過認真講, 絕大部份朋友都係我在fb宣布果陣先知… 不過對我黎講, 都算有計劃既… 我都算plan左5個月, 因為同老婆/家人都有共識, 一切從簡, 所以其實無乜野特別野要攪… 只係簽紙註冊, 雙方家人一齊食餐飯, 同渡蜜月…

至於做新郎哥當日, 當然仍係戴住牙箍, 呵呵!

估唔到, 時間匆匆, 由開始箍牙, 轉工, 甩拖, 轉工, 搵gf尋尋覓覓, 拍拖, 而家結埋婚, 都竟然仲未箍完牙… 有幸有大家一齊陪住我渡過, 分享下喜與悲…

今日到左2015年除夕, 真係感觸良多…

好啦, 講左大半版私人野… 都講下箍牙事啦…

其實, 而家棚牙都無乜特別變化… 每一個箍都在修正啲牙逢啦我覺得係… 犬齒旁既牙逢仍然好明顯下… 不過仲有成13個箍, 我希望遲啲真係可以泊返埋佢, 靚仔啲…

而家每次換箍, 我第一件事, 就係會將上顎既牙箍attachment位既開叉口剪左佢, 以免佢刮到咀內既牙肉, 形成飛滋… 其實在對上兩到三個箍, 我都因為刮到肉而生飛滋, 痛足成個星期…

2015-12-03 203636r
(attachment個勾凸晒出黎)

可能我份工成日都要講野, 講得多… 個叉位唔知點解會越黎越向出, 向出左呢, 又會開始刮… 刮刮下, 就會刮損啲肉…

所以呢, 由上個箍開始, 我都一定會剪左個叉佢! 效果良好, 而家一直都無再刮損了!

2015-12-03 204122r

2015-12-03 204133r
(左右都剪晒佢, 一了百了!)

最後, 祝大家2016年既願望都會實現, 開開心心!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一O一)

[15.11.2015] – week 188 – (29 + 29 + 11/26)

各位好, 可能大家以為我寫到100篇後從此唔再寫blog, 其實唔係… 只係我比較懶, 同埋都幾多野要忙, 所以… 平平淡淡地箍牙就無乜野好寫, 有空閒時間都頹廢下咁囉… 不過我團火仍然都仲在…

八月至今, 其實都做左好多野, 令呢段時間匆匆就過左, 忽然就過左三個月… 雖然唔太關箍牙事… 唔特別講了… 呀, 都係講一樣屈埋在心既野比大家聽…

就係我在九月左右, 我走去割左粒粉瘤… 呢粒瘤在下顎, 其實都已經發現左3-4個月… 初頭好似蚊爛咁上下, 但成日都唔散… 摸落去, 好似粒豆咁… 仍住佢越黎越大, 為左唔好進一步比佢擴大, 唯有去醫院割左佢囉… 唉, 醫生手勢真係麻麻, 而家下留左個15x3mm既疤係度… 最衰既係, 其實粒瘤無清晒, 估計仲有1/3左右… 醫生話唔想攪到啲神經線喎, 話唔小心切到神經線就會歪咀… 唉… 你話點咪點囉, 我又唔係醫生… 總之我而家瘤又割唔晒, 又多撻」啦」… 年頭先脫左癦(左邊臉)諗住靚仔啲, 而家在左邊臉下顎多左撻」啦」… 真心唔開心架… 好, 吐完苦水…

呢三個月, 見過醫生一次, 說話唔多, 不過就比佢話啲箍戴到過晒時間… 鬼咩, 成日換箍時間又撞岩出國, 我最唔鍾意帶多副箍出國, 寧願同一副戴多一至兩星期, 又或者咁諗… 出國好多時候都掛住食野, 未必會戴得足, 咁就帶左新箍都唔應該換住…

突然, 又諗起牙肉既黑三角, 似乎… 佢已經係永久既… 一路都無乜會生番牙肉既跡象, 算啦… 人到四十, 都好難求啲牙肉再重生… 不過, 慘就慘在唔單止有黑三角, 黑三角下面既牙隙仲係好闊下… 新既呢套箍都已經去到11, 但似乎都無重新泊齊既感覺… 唔通, 呢條牙隙會伴我終老? >_<上次見完醫生, 護士已經無幫我約下次覆診日期, 因為就算約左, 我都未箍晒手頭上既箍… 大家都知嘥氣, 所以今次我等自己箍到手頭上尾二個箍先去book時間覆診了…而家計下計下… 我下年四月, 真係好可能可以做多一次漢堡包測試比大家睇 (即係話仲箍緊)

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (一百)

[08.08.2015] – week 173 – (29 + 29 + 6/26)

經過好多波折, 終於可以成功打第一百篇blog文了! 都已經成個月無打… 其實中途一直都想打, 但係病, 壞電腦, 出差頻密, 週末又陪女友, 種種理由… 變左成個月後先交到文了! 嘻!

上回講到, 牙齦炎, 令到我無端端斷續賺左3日sick leave, 講真… 拎到自已都唔好意思, 但唔拎又唔得, 痛到乜都唔想做, 講野食野都唔方便… 唯有留係屋企發霉休養…

我既牙肉, 腫到遮左智慧齒約1/5既位, 載返個牙箍… 簡直係極刑咁… 夾更頂住啲牙肉, 可能因為咁… 所以遲遲都未能完全康復…

之後呢… 索性唔戴牙箍住, 諗住等佢康復先繼續啦… 後來有一日, 忽發奇想… 不如剪鬼左智慧齒個位啦… 等佢唔駛頂住啲牙肉咁辛苦…

我就用較剪剪走牙箍最後既一格… 餘下鋒利既既邊位, 我就用指甲銼, 慢慢銼滑佢, 銼圓佢… 一戴返上去, 簡直係有重生既感覺… 一啲都唔再痛啦!

brace_trim

大約4-5日後, 就完全消腫了…

由於牙肉痛影響左進度, 5號箍前後足足戴左成4個星期咁滯… 望下牙箍袋上既日期, 真係心傷… 真係要箍埋下個生日先可以完成最後一次療程了!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十九)

[06.07.2015] – week 169 – (29 + 29 + 5/26)

不經不覺, 打呢篇blog, 已經跳左兩個箍無分享進度了… 事關在六月真係好多事發生, 除左見醫生換左箍外, 出差頻密, 公司亦出現唔小人士變動, 非常煩惱… 另外亦6月仲去左5日台灣旅行…

講重點先… 今日時間打呢篇blog, 主要因為sick leve, 前日開始… 口腔劇痛, 痛到連開口, 吞口水都痛… 去睇醫生, 醫生話係牙齦炎… 原因係話可能食物殘渣攝在牙隙, 感染左啲牙肉, 發炎喎…

醫生一講到呢度, 我個腦就諗到… 應該係我開始戴牙箍食野有關啦… 箍左三年牙都無發生過, 一習慣戴箍食野, 就出現呢種病…

之前都在電視聽過牙齦炎, 只係無諗過會發生在自己身上…

亦估唔到會係咁痛苦, 真係食唔安, 訓唔樂… 個腮起左一舊, 腫到入口腔, 我初頭仲以為係飛滋, 搽左一日吻百蜜都無好轉, 先急急去睇醫生…

自問每次食完野, 都盡量潄口, 但始終有時唔能夠除箍, 難免會有啲食物殘渣留在口腔…

到今日, 已經食左日半藥… 情況都唔係太好, 腮仍然腫痛… 攪到今日都返唔到屋, 留在屋企休養… 不過人就算精神既, 訓唔著… 就打下blog啦…

前兩個星期, 旅行完回來… 就去左覆診, 今次覆診經歷無乜特別野講… 唯一比較特別既, 就係同醫生吹水時, 佢竟然記得我職業… 雖然… 我係IT人… 呢點好易記(亦可能我太IT Look)… 但醫生可以一口講出我做乜嘢field(比較另類的IT field)… 呢點我好肯定佢記性真係好好囉…

唔得了… 打打下blog牙肉又腄痛起上黎… 攪到無晒心機… 唔好音思, 下次再續…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九十八)

[29.05.2015] – week 163 – (29 + 29 + 2/26)

轉眼又過左一個月, 上一篇仲話有野想同大家分享, 都已經耐到唔記得左想share啲乜野… 唔緊要啦, 呢篇都係share啲重新箍牙既趣事新鮮事咁啦… 真係一日未箍完都會繼續會有新鮮事…

話說上回應該講到我岩岩重新變番箍牙中年… 由於今次應該係我人生最後一套箍, 我今次既箍牙策略改變左… 想嘗試下每日盡量足鐘數(包括食嘢), 所以我大部份時間都戴住… 開頭真係好唔慣… 但我諗應該試左4, 5日, 就開始習慣了… 真係試過戴箍食雞扒, 雞肶, 水果, 打埋邊爐都毫無難度, 原來副箍真係幾西利下… 咀嚼咬野冷熱都乜都得!

不過呢, 戴住箍雖然食到野, 但係有個問題, 就係咀嚼既時候, 其實牙箍同口腔會有磨損的(可能我未慣)… 唔夠幾日, 我個口腔就生左粒大飛滋了… 痛左我近一個星期, 日日狂搽吻百蜜都救唔番! 真係損到講野都劇痛!

另外, 新呢副箍… 由於在後排大牙太多attachment粒粒, 我用左3年既除牙箍方法竟然失效了… 最初既時候, 用成2, 3分鐘都除唔到副箍, 好似黐實左咁… 人係生既呢個道理無錯… 往往都能夠從錯誤中學習, 幾日之後, 已經掌握到除箍既方法… 不過呢種方法, 都算幾夾硬… 就係用姆指, 從最尾既牙內側輕輕挑起牙箍, 然後姆指食指大力向下一拉, 好似撕膠紙咁一嘢拉出黎… 呢個方法, 其實對門牙幾傷下… 因為開頭既時候啲牙岩岩箍鬆左, 感覺又好似夾硬拉隻門牙出黎咁囉… 不過, 過左一星期左右, 又無事了… 人既適應能力真係幾強下…

講番戴箍食嘢… 戴箍食嘢好處係… 唔駛邊食邊內疚, 又唔駛時時刻刻諗住幾時走去戴番個箍… 但另一個問題出現勒… 就係箍隙攝野…

teeth
(第一次攝菜攝到咁明顯, 直頭展覽館咁用玻璃鑲住! X_X)

食嘢既時候, 難免會咀嚼… 有啲食物, 趙到咁上下, 就會攝晒入牙與牙箍之間既空位, 越攝就越上… 根本避無可避… 就會出現攝嘢自已又唔知既狀況… 一個人食就話無所謂姐, 但一班朋友, 一班同事, 特別係一班其他公司既合作伙伴一齊食飯, 有講有笑… 咁就大家樂啦!

比人見到你笑晒咁攝住啲粒粒餸頭餸尾打包返屋企… 真係咩face都無晒…

我就正正試過幾次… 雖然有時食嘢係忘形到唔記得左自已戴住箍, 又忘形到同朋友笑晒傾計… 當食完野有機會清理牙箍既時候, 先發現… 已經太遲了…

以後, 呢啲情況我都要盡量小心… 我得閒就會用手機自拍mode, 偷偷地望下自已啲牙有冇攝野, 雖然無啦啦望住部手機依起棚牙, 比人睇到都有啲攪笑, 但始終係好過比人睇到你牙隙攝野既…

同埋, 戴箍食完野, 點都要盡快去廁所洗箍… 唔好處就係… 邊度有水潄口呢? 以前除定箍食, 就大可以慢慢坐係位用水潄乾淨個口, 先搵機會戴返個箍… 但而家次序掉轉左, 就只有盡快搵機會去廁所(一定要有地方洗箍, 因為食完嘢, 副箍好污糟), 但去廁所… 又無理由帶杯水, 帶個杯入去潄口掛, 所以… 戴箍食嘢, 都有佢既幣處囉…

最後一點… 就係, 一直戴箍食嘢, 副箍變黃變得好快… 雖然有網友教話用梳打粉勤啲洗, 副箍會乾淨啲… 但我呢種懶人, 用水沖, 用牙刷刷下已經好盡力啦, 仲話用梳打粉洗刷… 真係應該唔會有呢一日出現…

tone
(新舊箍比對, 舊箍明顯發黃)

好勒, 又夠鐘休息啦… 自從公司多左一間大陸分公司後, 去大陸既時間又再多左… 攪到放工越黎越少精神時間了… 莫講話打blog, 就算拍拖時間都少啦…

拍拖? 無錯… (係咪個宣佈位set得幾好? xddd) 我拍緊拖啦, 已經係2個月既事… 上次無機會同大家講下… 不過, 我都想趁打呢篇blog, 同大家share下呢件開心事…

好啦, 岩岩從大陸回來, 飯都未食就趕住打呢篇blog… 有時間再同大家share下…

(待續…)

男人四十先箍牙,一圓兒時心願。 如對內容有意見, 歡迎留言或聯絡我: