男人四十先箍牙 (七十)

[19.10.2013] – week 79 – aligner (29 + 5/32)

尋晚訓到半夢半醒, 被牙箍既壓力整醒左… 感覺到啲牙(大牙)好酸軟, 呢種感覺, 已經有啲陌生; 因為… 自從換左套新箍… 一直都好」輕鬆」…

尋晚趁訓前換第#5箍… 仲加左橡筋… 點知訓到半夜就」出事」… 其實, 我一直都無介意過呢種感覺… 無他既, 越大感覺, 就覺得越有效囉!

講返尋晚換箍… 對照過新同舊箍… 雖然#4箍只係戴左三個星期, 但同新簇簇既#5對比… 啲顏色真係差好遠… 雪白既#5箍… 同已經淡黃色既#4… 併埋一齊, 真係感覺不寒而栗…

牙箍用2, 3個星期可以換, 但我啲牙… 仲有半世人用喎… 咁發黃法, 都唔係辦法…

我啲牙除左唔整齊, 仲幾黃下… 自問都係一個早晚刷牙既人, 真係唔明點解有啲同事啲牙可以白到反光! (已証實係真牙, 唔係牙套) 我就越刷越黃… (其實係偏灰)

唔通牙齒都有」天生麗質」呢回事?

我以前好少留意人地牙齒, 甚至連自己既哨牙都好少理… 可能箍左牙, 而家成日都會留意下人地既牙, 同時都會特別關注自己既牙… 雖然已經比以前齊左好多, 但反而自己不斷發掘出對棚牙更多不滿既地方… 真係犯賤…

尋日經過百老匯電器… 竟然發現上星期見到賣$8xx既電動水牙線, 大減價至$6xx… 嘩… 大型連鎖店既海鮮價, 真係恐怖… 不過, 就算$6xx我都唔會買… 因為, 我在網上商店, 已發現只賣$5xx, 可惜… 只接受郵寄… 大佬呀, 我成日唔係香港, 點收貨呢?… 所以, 最後都冇買到…

不過呢團火我仲未熄, $5xx我接受到… 可以買黎一試, 不過… 留意下幾時有實體店, 或者見面交收既網購先入貨吧…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十九)

[06.10.2013] – week 78 – aligner (29 + 4/32)

話咁快, 內地黃金週就黎放完… 亦都代表我下星期就會重回上上落落大陸既日子…

上個星期, 雖然話唔駛上大陸, 但在香港公司都忙個不停… lunch除左箍, 諗住食完飯輕鬆多陣唔戴住, 點知坐低無耐就俾人捉左去開會, 一開就半晝… 轉下眼… 戴箍時間又嚴重不達標…

睇黎, 第#4箍又要迫自己戴3個星期… 計下計下, 如果個個箍都要戴3個星期… 我相信呢度既網友全部都會快過我箍完 (包刮77個箍那位 T_T) 我真係會變左全程陪你地箍牙直至完成… 好偉大…

今日突然醒起, 原來我仲未book下次見醫生既時間… 因為上次護士俾左4套箍我, 話覆診時間太遠, 未有得book住… 點知… 時間過下一星期, 過下又一星期… 我都唔記得上次見醫生係幾耐之前… 不過, 我仲有2個新箍未戴… 以我2-3星期一副新箍既進度… 仲可以捱多個幾月先見醫生, 下星期約醫生, 時間應該仲好鬆動…

尋日經過百老匯, 入去睇下啲水牙線… 嘩… 睇中心水果支philips, 要成八百幾九百蚊… 打左折都要八百鬆啲… 雖然對佢印像感覺良好… 但都係睇定啲先, 唔好太衝動, 否則會好似屋企支電動牙刷咁… 我估都有好幾個月無掂過佢了! 都係用普通牙刷有feel啲… (買左水牙線, 可能又會覺得普通牙線好feel啲)

唔留意由自可, 一留意… 牙漬又好似嚴重左, 啲牙齒咬合面上… 有啲凹凸不平既小窿, 之前好地地, 但而家有啲地方留左啲漬係度, 其實都幾難睇… 箍牙之前係無架! 應該都係因為用牙箍… 令到啲漬長期黐在上面, 無被飲水, 或口水沖刷… 久而久之形成左牙漬…

唔知, 完成療程後, 有冇方法一次過徹底洗走佢呢? 又或者講… 佢地捱唔捱到我完成療程呢? 可能好快就變左蛀牙了! T_T

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十八)

[01.10.2013] – week 77 – aligner (29 + 4/32)

國慶一日假期, 終於可以休息下… 打下blog, 回下comment…

新物料既牙箍… 已經用到第四個… 唔知關唔關隻物料事… 定係我啲牙已經習慣左不斷移動… 近期換箍… 已經無左啲極度酸軟既感覺… 又唔係完全無既… 不過感覺少到… 換箍下一日… 鋸扒, 雞翼… 呢類高危食物, 而家都已經可以照食… 以前… 酸軟感已經令我連食既衝動都無…

尋晚同班好舊既同事食飯… 上次見, 已經係成年前… 當時, 好似只係箍左牙幾個月…

今次再見… 成餐飯, 似乎無人發現我啲牙齊左… 只係個個都覺得我瘦左… 當然啦, 我真係有認真減… 可能係呢個原因, 大家都集中在我瘦既話題上… 似乎忽略左我臉上既笑容, 已經同以前唔同左… 起碼… 笑起上黎, 露出既牙唔會再出出入入唔齊… 當然… 仲未泊返入去… 但我相信,橫切面已經無以前飛得咁出…

上一個箍, 用左3個星期先捨得換… 因為… 每日都戴唔夠時間, 無謂急住2星期換… 箍唔夠期就換箍… 最終可能因快得慢… 第二, 反正都加左成十幾個箍… 都趕唔切下年生日前完成整個箍牙療程… 都已經變得無乜野好急… (仍耿耿於懷中… >_<)

話雖如此… 箍住啲牙, 仍然有好多野唔方便… 當然… 有想食既野… 唔可以即時食… 係好麻煩… 另外… 我始終覺得成日戴住牙箍… 特別係返工既日子… 食完lunch, 食完晚飯… 無刷牙戴箍… 啲食物漬留左在牙面… 戴左箍… 會令啲口水唔能夠沖刷牙面, 令啲牙漬好易形成…

而家我啲牙漬, 牙石又開始慢慢出動了… 好鬼頭痛…

我見坊間有樣野… 叫水牙線… 原理係用壓力將啲水從個針孔咁細既窿噴出… 稱聲可以有效去除牙面牙逢既污漬… 我未試過, 亦都無朋友係用家… 唔知有冇效呢? 有冇人可以話我知?

(待續…)

男人四十先箍牙,一圓兒時心願。 如對內容有意見, 歡迎留言或聯絡我: