男人四十先箍牙 (六十七)

[24.09.2013] – week 76 – aligner (29 + 3/32)

箍牙既後遺症-黑三角, 今日終於出事…

話說今日食飯後, 都同啲同事吹左好耐時間水, 之後去廁所戴返個牙箍, 戴牙箍前照一照鏡…

OH!!!… 出事! 有粒好大既食物殘渣攝實左在上排門牙同旁邊牙齒間既黑三角, 仲係填滿左個黑三角… 好鬼樣衰… 我諗, 同同事傾計既時候, 啲同事都見到呢個醜態, 只係無人當面笑我…

唉! 我其實在飯枱, 食完飯後已經不斷飲水潄口, 原來都無乜幫助… 呢個神秘黑三角, 攝左野入去, 係完全無感覺的… 好彩今次唔係攝菜, 否則真係樣衰多x10倍…

下次無得離開飯枱, 都好應該用牙籤了細心撩下… 免得同類醜事再發生!

唉, 耿耿於懷中… 不吐不快呀!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十六)

[22.09.2013] – week 76 – aligner (29 + 3/32)

八號風球下既星期日… 本來呢個時間, 我都要去訓… 但狂風暴雨, 嘈到爆… 真係訓唔著…

又爬起身打篇blog…

話咁快, 11粒attachment都陪左我兩個幾星期… 意料之外既係… 而家仲未慣, 莫講話戴住箍… 連除箍後都唔係好慣… 食野既時候, 唔知點解… 總會好易咬到咀唇…

唔知呢啲係唔係自然反應… 加左啲粒粒在牙齒上… 總會令到食野既時候咬合有啲偏差…

另外, 自從多左咁多粒attachment後, 除牙箍既手勢都唔同晒… 從往日只用右手就除得晒, 而家變左下箍要用左手, 上箍要用右手… 可能係啲attachment關係, 令到下箍唔可以用右手開…

同埋… 久唔久都要被夾唇肉係例牌事… 真係有觸電感覺! 不過唔知係唔係夾得多… 而家夾到都冇流血, 冇變飛滋了! 呢啲真係叫做訓練有素… 夾損得太多, 而家口腔內既皮變厚晒, 再夾都唔易夾損… 都唔知算唔算值得慶祝…

最後, 呢篇blog最主要想講既就係… 我決定自己將#3號箍既時間延長多一個星期… 即係共戴3個星期… 原因… 真係自己戴得好唔夠時間… 雖然不致於要戴多一星期… 但… 因為種種因素考慮, 我認為星期五晚訓前換新箍既最合適既…

原因, 我應該以前提過下… 就係… 俾自己3晚時間去習慣個新箍, 等星期一返工講野同食野都無咁辛苦囉…

話時話, 換新箍黐脷筋已經絕少發生… 應該真係適應左了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十五)

[11.09.2013] – week 74 – aligner (29 + 3/32)

擁有11粒attachment既第三日… 個箍真係好難好難除… 一來, 隻新物料好貼牙, 二來, 11粒attachment令到個牙箍扣得啲牙好緊… 而家, 最快都要成半分鐘先可以除到晒兩個箍… 仲係要忍住痛除… 希望快啲可以適應到…

本來習慣睇醫生當晚會寫blog, 但放工實在太攰, 加上又返左大陸… 攪到隔左成兩日先寫呢篇blog…

話說星期一放工… 又係匆匆忙忙去診所… 一如以往既」客似雲來」… 整個等候室都係女性… 一個中年男人擠在女人堆中間, 仍然係好尷尬… 但… 講真, 我已經開始習慣…

等下等下… 好彩有個新game, 123猜猜猜陪我… 等左45分鐘… 就輪到我見醫生…

例牌檢查完牙齒後, 醫生話我多左好多牙石… 唉… 我都唔想… 睇怕都係因為我大陸多油多鹽多糖… 食完飯又冇得刷牙, 次次都係清水潄口, 匆匆戴回牙箍… 啲牙唔污糟就有鬼啦…

今次醫生話要幫我鋤下啲牙… 唉! 我最驚就係呢樣野…

鋤牙唔恐怖, 最恐怖係醫生鋤之前, 會用一枝」牙籤」在你牙縫中攝開條隙… 攝既過程… 真係痛不欲生… 好彩, 我都叫做忍得下痛既人… 但一攝一鋤既過程… 我都好明顯渣緊拳頭… 攪到成個手心都係汗…

幸運既係… 今次鋤牙時間唔係太長… 我估3-4分鐘左右啦…

之後… 戲肉就到… 我本來得4粒attachment… 今次要加多7粒… 變成11粒啦…

醫生護士夾手夾腳幫我戴上一個定位牙箍… 上面有晒標記, 方便黐啲新attachment上去… 個牙箍非常薄… 貼左上去… 一啲感覺都冇…

整個黐attachment過程, 我估大約10分鐘左右… 其間, 只聽見/感覺醫生護士不斷用工具在我口中」做手術」… 又唔知佢地攪緊乜… 段時間真係幾難過… 最主要, 係怕不自覺係咁流口水… 但又好彩, 守得住個水壩… 我唔係太接受到當住陌生人前流口水…

10分鐘過後, 護士叫我除返個定位牙箍潄口… 嘩… 個牙箍真係好薄, 加上已經整左11粒attachment… 攪左好耐我都除唔到… 護士話幫我除… 點知佢都除唔到… 最後要兩個護士一齊先攪得掂… 救命…

每次見醫生… 佢見到我有牙石, 都會免費幫我」攪掂」… 呢份禮物, 真係貼心… 不過, 免費係其次… 最主要係我常有呢個疑問… 到底係唔係我唔識刷牙呢?

臨離開診所… 護士俾左四套新箍我… 即係話… 兩個月後再見了!

之後既兩日… 每次除牙箍, 其實都好唔習慣… 每次都拼盡九牛二虎之力… 先可以成功除到箍… 自問已經唔係剛剪完指甲… 但加左attachment之後, 的確會令個箍咬得好實…

一個唔小心… 回彈既牙箍仲好容易夾親口腔內既肉… 一但損埋, 啲飛滋肯定痛足幾日…

就好似剛剛有4粒attachment既時候, 都需要一啲時間適應… 我希望唔需要太耐啦!

今日打住咁多先… 今晚剛從大陸回來, 聽朝一早又要上返去了… 要爭取時間休息下…

(待續…)

P.S. 我仍然覺得啲護士稱呼我為」病人」唔多洽當… 我箍牙之嘛… 無病喎!

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十四)

[07.09.2013] – week 73 – aligner (29 + 2/32)

眨下眼, 對上一次打blog, 已經係三個星期前…

過去呢幾個星期, 我在大陸時間比香港更多… 莫講話夜晚打blog既心情都冇… 戴箍既時間, 每日亦無22個鐘… 大陸食飯時間長, 仲要坐車去食… 有時在公司除牙箍… 坐車加食飯, 可能只係lunch回來已經用左我個半鐘… 莫講話晚飯, 同同事食飯, 又無理由急急食, 急急戴返…

而家出現問題, 遠遠唔夠醫生建議既22個鐘… 咁… 我真係要考慮下同醫生講… 每套箍用3星期了… 如果真係咁… 睇怕… 我起碼再要箍多兩三年! 諗起都黐線… 同有少少絕望既感覺… Orz…

下星期一, 我就會去牙醫度加多5粒attachment上去了! 而家除箍食飯既時候, 我係最開心既…  因為除左牙箍… 牙箍上既attachment位就唔再附在我既門牙上… 依起棚牙笑, 起碼唔會有幾粒野黐在上面… 朋友同事, 亦都唔會報以奇怪眼神望我門牙…

另外, 唔知關唔關新物料smarttrack既事… 以往用新箍, 啲牙齒頭幾日會好酸軟, 但係呢兩個箍… 無左以前果啲超酸軟感覺… 都唔知好事定係唔好事… 又或者, 只係新療程既頭幾個箍, 俾你慢慢去適應既原故吧?

無睇自己個blog一排… 唔知點解, 點擊率突然升左好多… 唔知係唔係有人link左我個blog去某啲blog或forum呢? 為我帶左咁多新朋友黎… 我真係好感激…

(待續…)

男人四十先箍牙,一圓兒時心願。 如對內容有意見, 歡迎留言或聯絡我: