男人四十先箍牙 (六十三)

[19.08.2013] – week 71 – aligner (29 + 1/32)

唔能夠唔承認, 新既牙箍真係箍得好緊好緊! 而家未上啲attachment粒粒, 戴左成個星期, 個牙箍一樣貼服到極貼, 要除出黎真係要費九牛二虎之力… 真係唔敢想像第日在牙上裝左attachment後, 除箍會係件幾痛苦既事!

invisalign呢隻叫SmartTrack既新質料, 真係唔講得笑… 柔軟中又帶點硬… 頭幾日戴, 真係感受到啲牙俾佢推郁左既酸軟, 以為穩定左會容易啲除箍… 哈, 又唔係喎… 一樣咁難除!

前幾日, 偷偷地冇人時, 在廁所好努力咁除箍… 點知… 除極都除唔到… 以前既箍, 基本上兩三秒就一定除晒… 而家, 最快起碼都十零秒先除得晒上下箍…

正當無從入手咁除下箍既時候, 竟然被突然入廁所既同事撞到正…

終於, 隱藏左三個月既秘密有第一個同事知左…

傾左兩句關於牙箍既事, 佢都好直接咁講… 「真係估唔到你呢個年紀都會箍牙」… 呢位80尾未到90後既年輕人… 講說話真係直囉唔該…

估唔到換新箍仲未上attachment, 就已經唔能夠再暪住同事…

我相信月尾公司去大陸三日旅行, 肯定會俾更多人」發現」我係箍牙人士…

被人發現唔緊要, 我最怕大陸啲食食玩玩團, 有牙箍唔太方便咋… 而家啲同事成人食零食我都唔參與, 扮晒節食(其實真係要), 已經唔係咁好… 上去玩, 又乜都唔食, 真係好快俾人孤立了!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十二)

[12.08.2013] – week 70 – aligner (29 + 1/32)

今日, 放工8點急忙趕去牙醫診所拎期待左成兩個月既新箍, 成身大汗去到診所… 一入門口, 簡直可以用萬人空巷黎形容… 成間診所都係客, 企爆左個十幾人既等候室, 連reception都企爆埋… 我估大大話話都有廿幾人…

護士小姐叫我去另一個舖位等住先, 到我既時候會打電話叫返我過黎… 咁我就死死地氣走過隔離街既診所等… 點知… 原來連呢間診所都爆埋… 最後, 我就企係診所街外門口等… 好彩, 呢個世界有智能電話, 有低頭族, 咁做企街都冇咁悶… 話咁快就企在街上等左45分鐘…

終於等到見醫生… 見醫生之前, 係另一位護士送上新牙箍俾我試戴…

new_aligners

一戴之下… 嘩… 咁長既?! 放入口差少少啃親喉嚨… 睇真啲… 原來新既牙箍會包埋智慧齒… 唔怪得一戴上去咁唔慣啦…

另外, 新牙箍既物料同以前都唔同左… 以前既箍比較硬, 欠缺彈性… 但今次一摸上手, 真係好感覺到有少少橡膠既感覺… 軟身小小…

戴上去後, 一照鏡… 咦? 咁多粒粒既…! 數下數下… 原來下排有7粒attachment, 上排有4粒… 嘩…! 大鑊了! 以後真係難戴難除了!

望一望個invisalign膠袋, 咦? 印刷精美左好多… 用料都靚左好多… 再望一再… U1 of 32?!

原來, 成套模都做過晒… 由原來既一套46個箍, 變成一套32個箍… 計一計數… 我之前戴左29個箍, 而家重新開始計32個… 嘩! 咪變成一共61個箍?!!!

本來, 只係戴多17個箍就完成整個療程… 而家一下子多左15個… 真係唔知笑好定喊好! 順利完成整個療程都起碼要涯多年幾!

個blog真係要改名為」男人箍牙箍到四十幾」先岩…

個箍由診所戴到返屋企, 諗住食飯時除… 點知… 唔知係啲新物料夠貼身… 定係新箍既原故… 真係好難除… 除左成分幾鐘先除得晒兩個…

心諗, 慘了… 以前除箍好快, 就算同同事一齊去廁所, 都冇人知我戴箍… 如今啲物料貼咁多, 而且咁多attachment(而家啲牙仲未上新粒粒)… 就咁笑起上黎, 已經睇到好多粒粒在牙箍上, 好樣衰呀! 從今開始, 又唔敢露齒笑了!

聽聞一早又起程返大陸了… 今日都忍唔住打篇blog先… 趕住早睡早起, 打到亂七八糟, 請勿見怪… 早抖! ^_^

後記: 臨訓前刷牙照鏡… 發覺就算唔E起棚牙笑, 就咁講野, 下排牙齒前面既三粒attachment真係好鬼顯眼呀! 好樣衰呀! 嗚… 我以後點見人啊?

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六十一)

[04.08.2013] – week 69 – aligner (29/46)

停左換新牙箍呢兩個月, 因為戴箍時間好有彈性… 除箍時間相對多, 所以食野都食多左…

今日上磅, 嘩! 大鑊… 平均體重上升左6磅, 其實, 唔磅都知有唔妥, 個肚腩由年頭自己都滿意既水平, 到而家, 成日覺得褲頭緊緊地… 照鏡時個腩開始圓圓地… 之前大半年既努力運動成果, 化為烏有了…

希望開始下個新箍時, 啲進食時間會減返至」正常」… 而家返工辛苦, 成日都放縱自己, 加上唔駛戴足22小時, 想食野就立刻除箍食… 新工食飯時間又唔定, 上大陸仲要多油多鹽多糖, 唉… 終於有報應…

上一篇blog先講到口裡面既痱知搽左藥膏就好快好返… 點知… 話都冇咁快, 就親身証實左touch wood理論… 好快, 條脷又被刮損左… 今次輪到左邊了… 牙箍同開會/Presentation, 真係天敵黎… 一下唔小心, 就會刮損!

下星期就可以拎新箍了, 好期待!

(待續…)

男人四十先箍牙,一圓兒時心願。 如對內容有意見, 歡迎留言或聯絡我: