男人四十先箍牙 (六十)

[30.07.2013] – week 68 – aligner (29/46)

等下一個星期, 等下又一個星期… 今日終於收到診所既sms, 話我既新aligner到左… 睇下月曆, 原來, 已經等左差唔多兩個月了…

我上一次換新箍係五月尾, 即係話… 第#29箍足足用左兩個月… 比我去台灣旅行一副箍用個幾月更長時間… 都箍到冇晒感覺, 雖然話每日戴下除下… 我估副箍都已經勞損得好利害, 可能已經同兩個月前既型狀唔同左…

下次換箍, 個模係按我兩個月前既型黎做, 兩個月後先戴, 可能真係會痛到癲!

電話打去診所預約… 諗落其實我都冇乜時間可以去診所, 一個星期只有一兩日在香港, 在香港又要OT到勁夜… 唯有開口就同姑娘講要book最夜既booking… 點知… 俾姑娘一句就大到了!

最夜既booking竟然係… 夜晚10點! 嘩… 真係估佢唔到… 難得有睇牙咁大個免OT金牌, 我點都唔會OT到咁夜先離開公司囉! 約9點就夠了… 果日早啲放工, 早啲返屋企換件衫, 食個靚晚飯先施施然去見醫生仲好…

不過, 竟然最快既日期都要兩個星期之後 =___=」 即係仲要戴多兩個星期先有新箍用… 唉… 攪成咁, 我40歲前完成箍牙既希望, 已經全完幻滅了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十九)

[12.07.2013] – week 65 – aligner (29/46)

剛由大陸返到香港, 可以講… 終於捱到返來…

條脷前日唔知幾時, 唔知點解被牙箍界損左… 攪到一講野, 一食野就超痛… 變左食野又痛到食慾不振, 講野更加慘, 邊講邊痛… 仲要黐埋脷根…

直至現在, 都冇同事知我箍牙, 我亦唔想專登講俾人知… 最慘係我份工係由朝講野講到晚… 仲要講普通話, 真係講野講到一舊舊, 同啲同事又未熟… 極度樣衰…

好彩而家可以唔駛戴足廿二小時, 我成日都要偷偷地除低個箍休息下… 唔戴箍, 講野就舒服少少… 一戴左, 我條脷直頭感覺到牙箍邊既鋒利… 用條脷輕輕掂一掂, 都痛到飛起…

可能, 同一個牙箍真係戴得太耐了… 攪到啲邊位開始變變地型…

我已經唔記得左呢個箍戴左幾耐… 我估… 都起碼個半月了!

我諗, set新箍應該差唔多時間做好了… 真係希望診所快啲call我去拎, 我就快忍受唔到呢對箍了… 終於捱到星期六/日, 希望儘量講少啲, 食少啲… 叫」養返好」個傷口… 星期一返工唔想做漏口仔…

另外, 今日搭港鐵時… 在車門玻璃窗既倒影望到自己… 真係瘦晒, 仲係落晒型既瘦… 仲有, 個黑眼袋跌到落地… 睇落個樣好老, 好老… 點算呀?

箍牙箍靚左, 又到對眼… 仲係老態既黑眼圈…

網友們, 除左休息之外(儘量啦, 身不由己), 有冇啲補救方法呀?!

(待續…)

男人四十先箍牙,一圓兒時心願。 如對內容有意見, 歡迎留言或聯絡我: