男人四十先箍牙 (五十五)

[22.05.2013] – week 58 – aligner (28/46)

今朝, 係掛著黑雨警告既日子… 尋晚一直都訓得唔多好, 行雷閃電… 都醒都好多次… 醒完又訓唔返…

反正訓唔著, hea訓到早上同屋企人冒雨去飲茶… 茶樓竟然都幾多人; 即係話, 雖然黑雨唔駛返工, 但其實好多人都唔怕風雨, 乘機出街搵節目…

序完… 不過呢篇文, 其實都唔係講箍牙… 主要都係向大家報個喜…

尋日, 終於收到offer, 有公司請我了… 下星期要做返打工仔!

自從由四月一日開始搵工… 一共寄左20封email, 4次interview… 經歷近兩個月既期待又期待… 由本來信心十足, 直至開始懷疑自己能力… 終於, 在一個風雨飄搖既下午… 收到一個無比燦爛既消息…

份工係我心水之一, 今次做in-house, 唔需要好似上一份工咁賣豬仔, 不斷接唔同既客(補充: 我係做IT的 :P) 而且從interview中, 感覺到公司既管理層都好nice, 有big family feel的…

不過interview得知, 份工都幾多往返內地trip, 間中都會有東南亞trip… 要做定心理準備, 未來老細應該睇中我呢庭單身寡佬, 覺得我好適合… ^_^」

希望各位唔好介意, 我仲想藉呢篇文, 鼓勵下正在(或打算)追尋夢想既各位…

如果有夢想… 就努力去實現啦… 雖然中間不斷會有障礙, 但只要你唔好放棄, 不斷向前, 終有一日夢想會實現!

正如我上年年尾做出左辭工既決定, 唔立即搵新工… 為左實現考取專業試, 單車環島旅行, 同寫手機apps既夢想; 好多人都唔認同我既做法… 認為應該先搵到工, 再用工餘時間去實現夢想… 但我覺得返左工就無可能做到以上3件事, 所以我選擇冒險, 完夢先開始搵工…

而開始搵工後既頭一個月, 其實仲係充滿信心既… 不過日子耐左… 搵工email既回覆率低於預期, interview後又無反應, 漸漸開始有啲懷疑自己既能力, 甚至懷疑自己既辭工決定有冇做錯?

不過, 我每日都對自己講… 要對自己既決定有信心, 唔好氣餒, 要以樂觀既心情去面對逆境… 否則, 苦瓜乾咁, 都唔知點面對餘下既interview…


(每每有氣餒既感覺, 我就會記起Rocky既呢番話; 睇完即刻充滿返力量, 同大家分享一下)

下星期, 就要面對新工作既挑戰… 本來六月頭約左醫生辦工時間去倒新模, 而家返新工, 都唔方便請假去做… 唯有同診所商量下可唔可以安排啲較夜或週末既時段做了…

紿終, 份工要緊呀…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十四)

[10.05.2013] – week 56 – aligner (27/46)

又到左兩月一度見醫生大日子… 約左夜晚7點旺角診所, 其實我大可以約早啲, 肯定會無咁多人… 但世事點講得埋, 兩個月前我都估唔到到而家都未搵到野做, 原本諗住約7點都怕放工趕唔到黎嘛 =_=」

去到診所, 出奇地少人… 數埋我大約得10客個左右… 等左15分鐘就可以見醫生…

醫生檢查左我啲牙之後, 大讚我刷牙刷得有進步… 無積牙石喎… 其實, 唔知係唔係因為啲牙泊整齊左, 容易刷得乾淨, 所以啲暗位就無咁容易積牙石…

醫生話我啲牙進度幾好呀, 仲叫護士load返張一年前倒模前影既相示眾… 嘩… 42寸大電視load出黎, close up個咀, 救命呀, 唇上鬚根每粒都清清楚楚, 唔駛放得咁清楚下嘛?!

睇返我一年前既牙, 真係… 真係好亂七八糟… 兩隻門牙45度飛出黎, 後面啲牙胡亂咁生, 疊疊埋埋… 而家睇返, 自己都接受唔到…

經過一年漸進式既箍牙日子, 不經不覺啲牙開始泊齊收返入去… 真係好開心…

尋日同阿媽食飯講開今日我會去睇牙醫… 我阿媽都讚我啲牙整齊左好多 ^_^」

不過呢, 醫生都係果句… 話我下排門牙同箍既gap越黎越大了… 而家足足離箍頂1mm咁多… 所以決定到29箍就倒模做過晒啲牙箍… 而第29箍就會帶多幾個星期, 等新牙箍返先繼續療程了…

我冇問醫生駛唔駛加錢… 睇佢語氣, 應該唔駛掛? 如果要加錢… 理論上應該先問過我… 邏輯都合理掛? anyway… 答案六月中就揭盅…

再者, 醫生話… 我個牙弓似乎無當初諗得咁理想, 可以由V型箍到變U型… 佢再一次話: 「如果你15歲開始箍就好容易, 但係你年紀都…」

囧」rz… 我知既… 我知既… 我係15歲既double仲凸好多嘛… 真係好hurt… 男人到左某年紀, 其實都好介意俾人話老…

最後, 醫生在我每個牙縫間鉏左兩下, 等啲牙有位走… 今次無乜」大手術」就走得…

臨走醫生話醒支漂牙膏俾我用… 可能佢見我啲牙黃啦, 哈哈… 無諗到原來箍牙途中都可以漂牙… 仲以為要箍完牙先一次過攪添…

拎新牙箍時, 姑娘俾左支筆型既漂牙膏俾我…

whitening_pen

好方便, 扭兩下啲gel就會在筆頭唧出黎, 再利用筆頭既毛掃就可以搽落牙齒度… 超級準確方便… 不過唔知效果顯唔顯注… 我諗一兩個星期後就會知! (支筆寫住gel得2ml容量, 都唔知日日用捱唔捱到兩星期xdddd)

我十年前其實漂過一次牙, 當年好大陣仗, 要先倒模… 之後有牙套同十幾支gel… 好貴架! 公司既牙科保健優惠價都要二千幾蚊… 但效果真係唔錯, 用完後啲同事都話我啲牙白左好多… 但佢地係以為我曬黑左先顯得明顯白左, 激死!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五十三)

[04.05.2013] – week 55 – aligner (26/46)

望下日曆, 原來不經不覺已經踏入左五月…

即係話… 我已經整整四個月無做野啦! 自己真係唔覺時間過得咁快… 因為呢四個月, 真係做左唔少大事… anyway, 呢四個月身邊既朋友不斷替我擔心… 話… 「你仲未搵到野做呀?!」

佢地語氣好似世界末日咁… 緊係啦, 佢地個個都要養老婆仔女, 點會明一個單身男既自由暢快感覺?

其實, 真正開始寄第一封信出去… 係四月一日(愚人節 xddd), 到今日, 大約都只係寄左十零封左右啦… 相比起我以前啲同事, 每日迫自己寄五封出去, 漁翁撒網式, 有殺錯無放過既搵工方式, 我自己就唔係太認同…

自從上年份工既不愉快經驗, 我真係想花多少少時間黎搵一份合適既工…

其實寄完信(email)出去之後, 都有啲電話response既… 都係clarify下啲資料(同expected salary Orz), 跟住… 當然潛晒水…

在四月尾, 竟然一連收到兩個電話安排五月2, 3號見工… 大大話話都成年冇見工, 心裡面難免有啲緊張…

而個牙箍, 亦都係一個心理障礙…

一來, 戴住個牙箍… 無論我幾習慣都好, 始終都有啲音發得唔係咁清楚… 特別係英文 -_-」

所以, 諗左都一陣子, 我決定interview時除左佢…

同埋呢… 唔知戴牙箍既您們有冇呢種同感… 就係戴住個牙箍, 成日感覺好口乾, 成日都不斷要吞口水咁… 所以呢, 攪到好似好多口水咁… 成日都感覺到個口有味… 唔係咁想開口講野… XO

所以最好既做法都係interview之前就除左佢; 我直頭係出發前就已經除定… 費事到時臨急臨忙兼顧咁多野…

終於, 尋日見埋第二份工, 暫時都未有其他工見住… 又可以收拾返心情, 應付仲未考完既試…

見兩份工都叫順利, 表現… 中規中矩啦, 不過個市場競爭咁大, 大把勁人做住份工都同你爭… 所以, 唔敢諗得太樂觀…

聽日就會換新箍了… 其中一隻門牙同牙箍既gap似乎越黎越大, 咬埋chewies都冇乜幫助… 我諗, 都好快應驗醫生講既… 到28個箍咁上下就要重新倒模了… 唉! 我真係唔想呀…

倒模, 其實咪即係又要等返兩個月先會有新箍戴囉… 咁即係我既療程又會再延長了…

要keep住兩個月無進展(仲要戴住同一副箍)… 有少少唔開心喎! T_T

(待續…)

男人四十先箍牙,一圓兒時心願。 如對內容有意見, 歡迎留言或聯絡我: