男人四十先箍牙 (三十四)

[25.11.2012] – week 33 – aligner (17/46)

唔經唔覺, 又順利用完一個箍… 今日換上第17個箍… 因為加左attachment既關係, 一戴就已經好緊, 好貼服, 好大力… 緊到眼淚水都差啲標出黎…

自從加左attachment後, 我頭兩日用新箍, 都習慣唔加橡筋, 因為我有啲除箍恐懼… 怕加左像筋後, 除箍會更加辛苦, 所以暫時頭兩日都唔加橡筋住…

講完關於箍牙, 有點事實在不吐不快…

就係關於我工作… 有睇我以前文章既人都知… 我呢份工從四月開始做… 不經不覺, 伴住我箍牙既日子, 已經做左足足七個月… 終於, 我在上星期五遇到一個觸發點, 令我不得不辭職了!

做野辛苦我可以忍, 放工後經常自願性OT我可以忍, 但… 每次勞心勞力為公司解決災難後, 客戶都識感激欣賞, 但自己上師卻半點讚賞都欠奉, 永遠嫌慢, 更將更多其他人解決不了的問題搬到我枱面要我立即解決… 害得我自己讀書進修的時間都賠上, 考試日期一拖再拖… 拖了幾個月都無辦法專心溫習…

就因為老細星期五的一句刻薄說話… 我要爆了! 我諗, 我星期五黑左半日臉… 無再同老細傾過計… 之後, 我認真地攝高床板諗左兩晚, 決定好, 剛剛email左我老細及hr dept, 我辭職了…

在電郵按下」Send」的一刻… 我真係解脫了…!

以上小故事同箍牙無關係… 仍然多謝你地將佢睇完 ^_^

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十三)

[18.11.2012] – week 32 – aligner (16/46)

上星期, 機緣巧合之下撞左入香港invisalign fan club, 登記左做會員… 撞岩佢地做緊promotion, 登記成為invisalign star(即係已經用緊invisalign既客戶), 仲可以獲贈invisalign禮品包(沙灘大毛巾、化粧鏡、筆記簿、原子筆及文地貓Memo Pad)

登記完兩日, 就收到email通知, 去北角拎禮品, 仲要係office hour… 雖然遠左啲, 不過… 時間上都可以安排下既… 朝早九龍見完客, 就搭地鐵過左海… 上埋invisalign公司拎禮品… 佢地公司都幾靚架裝修得…

一入門口, 就見到啲禮品好整齊咁放晒係矮櫃入面… 我估… 我可能係今日第一個客戶拎禮品… 職員從攝到冚既櫃裡面拎左一份禮物俾我… 前後都唔到3分鐘, 我就離開invisalign公司了! 真係有效率…

本來仲頭痛緊拎住公事包, 點樣拎一大堆禮品… 但invisalign都幾細心, 預備左個幾靚仔既大白色環保袋俾我… 一次過裝好晒所有禮品, 好輕鬆就可以拎走所有野…


(inviaslign禮品:漏左個化粧鏡在公司, 影唔到, 個鏡盒藍色, 雙面鏡有蓋, 好靚的!)

免費幫香港invisalign fan club賣下廣告 ^_^
http://www.invisalign.com.hk/fansclub/

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十二)

[12.11.2012] – week 31 – aligner (16/46)

尋晚終於換第16副牙箍… 唔同既係… 今次我已經加左attachment… 再配合橡筋… 絕對可以應得上係宇宙最強既invisalign組合…

本來諗住上箍時會超級痛, 點知… 又唔係… 唔算好痛, 但因為有attachment粒粒, 上牙箍時」啪」一聲就定左位, 感覺上比無attachment箍得緊, 但絕對冇上一副痛三日既感覺…

不過我既憂慮並無消失… 因為換左箍最難受既, 會係第二朝除箍刷牙既時候…

尋晚訓得都唔錯, 唔係因為唔痛, 係因為踩左全日單車, 累到嘔… 所以戴完箍一撻落床就訓到天光… 呢個真係幾好既安眠方法…

第二朝… 一起身, 已經感覺到牙根酸軟… 心知不妙…

刷牙除箍時, 嘩… 真係好緊好緊… 緊到好似用超能膠黐實左一樣…

因為加左橡筋… 除箍係一定要先除下, 再除上… 所以我好努力咁除下面牙箍先… 攪左好耐… 我諗差唔多成分鐘, 慢慢撩下撩下先令到牙箍鬆少少…

當第二粒attachment都成功退出黎之後… 「卜」一聲… 下排牙箍一野飛左出黎, 跌埋落地, 九千里咁遠添… 都話牙箍加橡筋真係好危險… 好笑既係… 兩條橡筋仲停留在上排牙箍既夾口位… 彈彈下… 一如前唐師長名句: 「條條揈」…

千辛萬苦除晒兩個牙箍… 真係唔係講笑… 痛到癲, 特別係牙齒好酸軟既時候, 好驚夾硬除會整歪啲牙…

刷完牙急忙戴返牙箍… 早餐都冇心機食, 唯有飲兩包牛奶頂肚…

返工講野又變左漏口仔… 全日都冇乜心機開口, lunch都爭啲唔想去食… 因為朝早冇食過野, 最後都選擇左出去食… 不過代價就係要喱埋係廁所忍痛強拉左個箍出黎… 痛到呢… ORZ!

加左attachment三日, 暫時未感覺到其他網友所講既」加速牙齒移動」… 但加左attachment既好處, 係上橡筋後講野、 口嗡嗡唱gangnam style, 牙箍無再甩出黎了…

希望短期內可以習慣attachment… 裝卸牙箍自如…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (三十一)

[09.11.2012] – week 30 – aligner (15/46)

不經不覺, 之前拎既6副牙箍已經用到尾聲… 今晚又到見醫生既日子…

放工後, 懷住戰戰兢兢既心情到達位於旺角既醫務所… 驚, 唔係驚牙醫… 係驚佢診所又爆棚, 迫到插針都插唔入, 多人過行年宵既虛冚場面…

上到診所, 今日人流都算適中… 不過仍然係無凳位兼成診所企滿人… 但今次起碼叫有個角位俾我攝下, 唔駛好似上次咁攝到出門口仲要有條隊…

今日約七點半, 準時七點半報到… 大約再等20分鐘就見醫生… 感覺良好…

見醫生, 例牌佢都會有句輕鬆既開場白…

今次, 佢問我… 「辛唔辛苦呀?」

我又俾佢突如其來既一句KO了… 本能地回彈左粒音, 就講… 「Uh?… 辛苦?!… 唔辛苦? 點解會辛苦既?」

可能我既回答太無厘頭, 醫生窒左一下… 佢話, 「個箍呀, 戴得辛唔辛苦呀?」, 「食飯有冇唔方便咁呀?」

其實佢問我辛唔辛苦, 我梗係知佢問我箍牙啦, 唔通問我返工辛唔辛苦咩? 不過」辛苦」係好籠統既詞語, 要形容我對箍牙既感覺, 絕對唔可以咁簡單兩字回答… 我都不知幾想即時whatsapp我個blog俾佢參考下, 我呢30個星期寫既心情…

不過, 基於自然反應, 我冇答佢頭一個問題, 直接答左佢第二個問題… 我話: 「食飯唔方便就梗架啦!」

醫生呆一呆… 旁邊既護士亦」必」聲咁笑左出黎… 之後醫生再冇同我講野了… ice breaking無聲無息咁完結左…

醫生檢查左我啲牙… 都係果幾句, 進度唔錯… 不過醫生話我個箍鬆鬆地… 用像筋好易直接扯甩… 今次要加attachment…

Attachment… 嘩… 終於出現… 我一直既終極惡夢終於出現了…

醫生話, 用attachment加像筋效果會好好多, 又唔怕甩… 不過就好難除囉… 佢仲安慰我… 話我只用四粒attachment, 算最少架啦… 人地仲多呀… (我除左」感激」兩個字, 真係諗唔到其他字回佢, 當然, 我只係心裡面講)

加Attachment前… 我點都諗唔到會出現超級痛苦既呢一幕… 痛到我握實兩拳, 兩腳不由自主咁撐到直一直, 雙眼緊閉… 一直含住兩泡眼淚… 為左男人既尊嚴, 我差唔多頂左五分鐘, 一粒聲都冇必過出黎, 默默忍受呢個突如其來既極刑!

極刑就係… 醫生話要幫我啲牙隙開啲位… 我初頭以為佢又用鐵鉏鉏我啲牙, 但今次, 佢話要用機… 我心知都不妙… 點知, 實際比我想像中更恐怖…

就係… 醫生用一塊有少少厚度既牙簽狀物體, 夾硬在每個牙隙都攝入去… 然後再用機器車薄我既牙齒, 令到我啲牙隙闊啲, 多些空間給牙齒移動…

試諗下… 16隻大牙唔計, 都要做16隻牙… 上下各8隻… 每兩隻牙中間都攝一次, 車一次… 種樹方程式計, 即係上下各攝7次, 合共14次…

老實講… 真係好難捱架… 感覺就好似夾硬在牙隙中間撐開佢, 推開啲牙… 所謂牙痛慘過大病, 隻隻牙都直痛歸心!

好唔容易忍到醫生整完… 到佢為我加attachment既時候, 我已經無晒感覺, 成身軟晒咁灘係凳度, 咬住佢俾既唔知海棉定軟膠物體, 整下整下就黐左四粒attachment入口…

其實牙齒上有attachment都冇乜大感覺, 就好似食完野黐左啲食物在牙齒上既感覺咁… 只不過, 呢四粒野係用條脷」了」唔走的…

醫生見我一臉茫然… 主動俾條invisalign既動畫俾我睇, 睇我牙齒在46個箍中既變化過程… 當係呵返我剛受強烈折磨既心靈… 其實佢呢種安排真係有效, 睇完條片, 我真係無晒痛既感覺… 因為… 真係好神奇, 如果46個箍之後真係如佢動畫效果一樣, 我啲牙不但整齊晒, 連尖既牙弓都變返正常, 變返一個好靚既弧形… 我即時問醫生, 係唔係連牙弓都真係咁神奇會變形架? 醫生話係喎…

如果真係咁, 我覺得真係好神奇喎… 啲牙肉會跟住牙齒走…

我順道問醫生… 加左attachment可唔可以洗牙, 因為我發覺箍牙後, 啲牙漬嚴重左… 其實, 我只係順口問下, 無諗過醫生即刻推返我落凳, 手起刀落… 即時幫我洗埋牙… 嘩! 等如硬塞$300入我袋, 真係全晚不斷有感動位…!

最後, 醫生又問左一個我接唔住既問題… 就係: 「你用咩牙膏?」

我真係諗左半秒… 呢條問題咁難答既? 到底佢想問我牙膏牌子丫? 定係牙膏既味道? 定係牙膏既特別成份呢?

最後, 我選擇左答牌子… 我話: 「黑人牙膏囉!」

唔知佢覺得我答成點, 佢再問: 「咁有冇用潄口水?」

我好自豪咁答: 「梗係有啦! 我次次刷完牙都會用, 仲用埋牙線添呀!」

我唔係搏掌聲, 我只係想話俾醫生聽我真係有好好保護啲牙齒, 但仍然都唔知點解有牙漬…

點知, 醫生話我知… 原來漱口水會令啲牙漬越黎越深的, 叫我唔好再用…

嘩! 我真係萬萬諗唔到… 乜原來漱口水會加深牙漬, 真係聞所未聞… 不過既然係牙醫親口講, 我都會信佢既… 雖然我已經用左廿幾三十年… 一於箍牙呢段時間, 唔會再用了…

臨走前, 醫生只俾左3個新箍我… 約定12月中再覆診, 可能佢想密啲觀察我用左attachment後既進度… 我覺得都岩既… 睇下有冇明顯既改善再跟進都係好事…

從今晚就開始有attachment, 唔知會唔會唔習慣… 有時間再同大家分享…

(待續…)

男人四十先箍牙,一圓兒時心願。 如對內容有意見, 歡迎留言或聯絡我: