男人四十先箍牙 (十四)

[29.05.2012] – week 7 – aligner (4/46)

一如所料, 朝早除牙箍既時候… 痛不欲生… 睇黎每次轉新牙箍, 都要忍受呢種痛苦兩至三日…

食早餐既時候, 雖然除左牙箍… 但下排牙齒竟然仍隱隱作痛, 痛從牙根開始滲出黎… 感受彷似… 輕輕一拉就可以將整隻牙拉出黎咁痛…

今日牙齒已經唔可以再叫酸軟, 簡直就係酸痛! 攪到食早餐都冇乜胃口…

補充一件尋晚在診所發生既小事…

就係… 我多口問姑娘可唔可以俾個invisalign既大紙盒俾我(個盒寫住我個名的); 之前我在其他forum睇過有人可以問診所攞… 用黎裝用過既牙箍, 整整齊齊咁…

點知, 原來係唔可以攞既, 姑娘話因為盒裡面仲裝住幾十副未用既牙箍… 姑娘show俾我睇, 話佢地要用黎裝住我未用既牙箍, 唔可以俾我住… 要既話, 就要用晒啲箍後先可以俾我…

我一睇, 個盒內原來仲有廿幾個箍… 計計下, 隨時要成年後先用得晒… 攞紙盒既念頭要放棄了, 決定另外再買個箱仔黎好好收藏用過既箍做紀念…

照咁睇… 我整個療程既所有牙箍基本上已經ready晒, 只係診所幫我保管, 適當既時候先派俾我… 當然, 我仲未俾晒錢, 佢唔扣住啲牙箍, 容乜易我走數?! :P

另外, 幫客人keep住都係好事, 以免我地大意唔見或撈亂, 又或者唔跟指示戴足兩星期, 你知啦, 一定有某啲人好心急, 可能每箍戴一星期就急急換, 希望快啲完成療程… 令牙根無法轚固, 最後失敗收場!

夜晚擦牙既時候, 留意到牙面好似比以前污糟, 下排既大牙牙面有啲啡紋現左出黎, 唔知係以前冇留意? 定係擦牙擦多左, 反而擦蝕左令污漬容易食入法郎質? 定真係因為成日笠住個箍會令牙齒污漬長期留在原地, 容易食入法郎質呢?

剛剛先叫戴左個半月… 啲牙紋已經開始出現, 點捱兩年呢?!

又開始擔心了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (十三)

[28.05.2012] – week 7 – aligner (4/46)

終於等到見醫生既大日子, 而家有工作, 而且好忙… 所以約八點半都差點走唔到…

抛低永遠做唔完既工作, 老遠由灣仔飛地鐵去到長沙灣, 再步行到牙醫診所, 原來, 都唔係想像中咁耐, 八點三已經到達診所…

所見情境, 簡直係畢生難忘, 多人到塞滿診所, 有啲人索性企出門口… 在登記診所等候左十數分鐘, 被安排到等候室… 診所多人, 等候室仲多人! 成個等候室清一色係女士… 等候室大約可容納十五人左右… 正好, 全等候室都坐滿女仔, 女人群中只剩一個好幼既」位」… 我尷尬地」攝」在兩位小姐中間一條小隙中…

好彩我身型都唔算大份, 剛好攝得入… 但就要好似奄春咁瑟縮在中間, 迫到兩隻手只可以夾住自己個身, 郁都唔敢郁, 費事唔小心撞親隔離…

等下等下… 呆等左廿分鐘… 雖然有晒心理準備要等好耐… 不過放工真係好攰, 好想快啲了結左件事返屋企休息休息… 期間, 聽到隔離兩個女仔傾計, 大約都係話個牙醫好好賺之類, 言語間討論到箍牙費係三萬零蚊, 好貴又剩… 又話個牙醫一定買到豪宅啦云云…

毫宅… 我絕對唔會質疑阿醫生兄買唔買得起, 但係… 隔離位小姐話三萬幾蚊貴, 我就好唔認同… 事關, 我個case要接近五萬蚊! 對比起三萬幾, 我絕對屬於大股東級數…

我相信好多人箍牙費都只係三萬幾… 因為佢地既牙只係小小唔齊, 唔似我… 真係要箍46個先勉強夠皮… 比起好多人30零個就KO… 我俾多啲都係合理既(安慰自己的說)

等左大約半個鐘, 被安排入房坐」手術」椅… 醫生好忙, 張椅坐得唔多舒服… 我好唔自然咁又坐多十幾分鐘, 好在房內有私人大電視, 欣賞左一節平時冇機會亦唔會睇既TVB劇」耀舞長安」

期間, 偷望到放左手術枱上… 我既」病歷」, 上面附上一張圖, 類似指示在牙齒上整attachment之類既instruction!

我當堂驚一驚… 之前在網上睇過invisalign既個案, 好多時都會用attachment黎加速牙齒移動, 而用左attachment後, 啲牙會黐住一粒粒既方塊, 好難睇, 兼夾令到安裝或拆除牙箍都難好多…

係我最唔想遇到既事, 點知… 竟然咁快就要做… 望多兩望張instruction紙, 大約左右各裝兩粒, 即係一共四粒… 唉! 都算好既… 聽聞話有人裝過十幾粒! 四粒算係小兒科…

時間一分一秒咁過, 好快又過左十分鐘… 醫生終於出場…

劈頭一句就問我: 「慣唔慣呀?」

我」Er」都冇」Er」半聲, 就回左兩個字: 「慣呀!」

可能問題同答案都太直接, 一時間, 我感覺成間房內鴉雀無聲, 醫生及兩位助手大家都好靜, 靜到我呢個」病人」有啲唔自然… 所以話呢, 「破冰」既第一句, 真係唔好問Yes or No既問題… 而回答既答案, 亦都最好唔好係Yes or No, 否則, 破冰唔成就會更dead air…

既然我回答得唔好, 我就順勢抛出一句: 「呀! 唔知點解, 換新箍後只係緊左三日, 之後就無晒感覺既呢可?」

此時, 結冰既房間忽然有番少少生氣… 醫生滔滔不絕回應: 「無錯呀! Exactly就係郁三日架咋… 因為頭三日就係移動你既牙齒, 之後十一日就係俾啲牙骨跟住移動… blah blah blah… 如果唔係啲牙就會變黑的… blah blah blah…」

雖然我唔係好明佢之後十一日既解釋… 但傾計無野好得過有人附和你… 而醫生用左咁長篇大論附和我親身體會既三日theory… 我心裡面暗暗感激…

醫生好快咁幫我檢查左上下排牙齒, 無任何comment… 之後, 佢就拿起一塊好薄既銼, 在我各牙齒中來回銼左三至四下…

好在我之前在forum睇過相關文章, 知道佢係銼細啲牙, 俾多啲位牙齒移動… 但親身被醫生一下下銼落去, 又係另一番感受… 好似挫極都唔完咁… 又唔知銼到條隙有幾闊, 心裡面好驚好難睇…

腦裡面竟然諗到一樣野, 就係聽日約左friend食飯… 今日攪到牙隙又疏, 又落attachment, 突然冒起個念頭想唔去, 想收埋自己…

正當個腦係咁轉轉轉既時候… 醫生突然一句: 「得啦! 返去繼續正常咁箍牙就OK…」, 並示意我潄口及可離開…

下? 唔係要落attachment咩?! 我心裡面諗… 不過… 唔駛落仲好啦, 其實我真係唔想用attachment…

臨離開前同姑娘小姐預約下一次見醫生… 今次醫生俾左四套牙箍我, 換言之, 即係下次見醫生已經係八個星期後既事… 姑娘建議我下次去旺角診所覆診… (我心諗, 吓?! 唔係真係咁發下嘛? 開完銅鑼灣分店, 而家仲開埋旺角店, 醫生, 你真係好發囉!)

見完醫生後, 除左既舊牙箍冇再戴返… 又未食晚飯, 決定今晚要放縱一下… 走左去食好耐冇食既譚仔…

好耐冇一個人出街食晚飯了; 因為牙箍既關係, 一個人, 好多時都係買外賣或屋企簡單咁煮就算… 唔想除箍太耐…

去到譚仔, 原來已經夜晚十點, 舖內好少人… 因為無戴牙箍, 就放棄左買外賣, 索性坐入舖舒舒服服咁食… 喪叫左三餸酸辣米線, 再加土匪雞翼… 博老命…

其實一個人根本唔會食得晒咁多野, 不過太耐冇食譚仔, 想食多少少…

雞翼上枱後, 先發覺… 叫錯野…

(三餸酸辣米線加雞翼, 凍奶茶走甜)

自從箍牙後, 已經好耐冇用門牙進食… 因為感覺門牙移左位, 咬合好唔習慣, 好唔想用門牙… 所以儘量唔食要用門牙既食物… 今次叫左雞翼, 純屬意外… 但因為已經送到, 就試下用門牙食…

可能因為箍了足足兩星期, 門牙已經穩固, 咬落雞翼度沒有酸軟感覺, 感覺還好… 不過始終唔太敢大力咬… 但今次證明原來門牙都幾有力的…

感覺餘下42個箍既人生無咁枯橾, 可以放膽食多啲款式既野了!

食完米線, 返到屋企第一件事係… 照鏡… 一直都好擔心啲牙隙闊得好難睇… 點知, 一照之下… 其實又唔係好覺… 唔細心睇, 其實唔會觀察得到… 每個牙逢之間只多左一條絲咁幼既隙… 從此推算, 每個新箍所推動既距離, 真係少得可憐…

憑肉眼睇就唔覺太大分別… 但一用牙線, 效果就立竿見影… 以前買過一款粗牙線… 用落去好多時都攝唔入, 最後放埋一邊無用… 今次專登拎返出黎試下… 嘩… 簡直如履平地… 一放就攝左入去… 鐵証我啲牙逢真係疏晒!

(左: 平時用開既牙線, 好幼)
(右: 比平時牙線粗至少一倍既」方便」牙線)

徹底擦牙及潄口後, 戴上第四個牙箍… 開頭兩三分鐘, 感覺係另一個金剛圈… 緊到連眼淚都想標出黎… 點知… 十數分鐘後, 竟然無晒感覺! 睇黎, 我既適應能力又進入另一層次… 到底… 跟醫生銼大左我既牙逢有冇關係呢?

希望明早除箍刷牙無監生拔牙既感覺就好了…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (十二)

[14.05.2012] – week 5 – aligner (3/46)

時間過得好快, 踏入箍牙第五個星期… 可能工作有點壓力, 在公司都不太覺牙箍束縛… 只係食飯前後既時候麻煩啲… 攪到唔太願意同同事食飯, 一個星期只一齊食一兩次吧… 其他時間, 都係儘量自己食… 快快食完就潄口戴返個箍…

一如以往, 戴新箍既時候, 真係覺得好緊好緊… 其實都係好事, 起碼感覺到佢俾緊力去移動牙齒… 最痛苦, 都莫過於刷牙或食野要除箍既時候… 要監生將牙拔出一樣酸痛…

希望酸痛日子早啲過去吧… 不過經驗話我知… 起碼有兩至三日酸軟期…

牙醫診所在每次換箍既日期, 都會send一個sms提示我… 不過, 都在下晝先收到… 而兩次提示既上一晚我已經乖乖換左新箍…

不過… send個提示總好過不聞不問既, 起碼感覺牙醫係負責任, 關心顧客的… (CRM的威力不可忽視!)

唔知點解, 上兩個牙箍… 在除下來清潔既時候, 總覺得佢係透明中帶黃, 唔再似新開既時候咁精瑩通透…

極有可能因為我係一個奶茶怪… 餐餐lunch都飲熱奶茶, 雖然戴回箍前都會徹底潄口, 但我相信啲黃漬係潄口沖唔走的, 一定要刷牙先刷得走… 可惜我又未致於型到在公司廁所刷牙… 所以一戴牙箍, 就會沾上茶漬…

由第三箍開始, 我試下只飲凍奶茶(無熱奶茶咁濃)… 睇下情況有冇改善, 如果都係黃… 就可能要轉飲品了…

[16.05.2012] – week 5 – aligner (3/46)

新箍既第三日, 有個好強烈既感覺, 下排生得最歪既一隻牙終於失守, 明顯被牙箍推動了, 而且往外推既感覺好強烈… 呢隻牙生得好怪, 係向內插的… 亦可能因為係咁, 所以被牙箍以反方向推動既感覺最強烈… 雖然照鏡之下, 其實箍左四個星期, 啲牙睇黎根本無分別…

我相信, 四個月以後分別應該會明顯啲…

加油啊…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (十一)

[11.05.2012] – week 4 – aligner (2/46)

第二個牙箍既尾聲, 基本上已經感覺唔到牙箍既壓力, 牙齒亦無酸軟感覺… 似乎, 牙箍最後既幾日, 真係齋等時間過…

今日同同事傾談一輪之後, 突然有個奇怪感覺… 咦? 好似無黐脷根咁喎… 應該係慢慢自動適應戴住牙箍講野, 特別係啲ssss音, 開始懂得就力… 無漏咁多風, 自然發音較準…

不過, 始終開始一個新箍既時候又要重新適應過…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (十)

[03.05.2012] – week 3 – aligner (2/46)

上唇內側昨天又被刮損, 顯然又係講野太多太快… 似乎, 說話係牙箍宿敵… 每次高談闊論後都會刮損…

一天過後, 傷口依然隱隱作痛, 根據經驗, 似乎又要等兩三日先可以復完…

新牙箍用了四日… 壓力已經消失, 牙齒亦不太覺酸軟了… 似乎, 頭三日係牙齒強力移動期… 第四日開始就會穩定…

唔通, 一個牙箍戴十四日, 頭四日係移動, 後十日係俾佢地停一停休息下? 返四放十… 牙齒既假期比例真係比人類多, 好幸福…

[06.05.2012] – week 4 – aligner (2/46)

不經不覺已經戴左三星期牙箍…

係呢三個星期裡面, 基本上用餐已無任何咀嚼, 只要吞得落喉嚨, 我就會將食物吞下… 前面牙齒被牙箍移動過後, 合埋口時會感覺下排口牙會接觸到上排牙齒的牙肉位, 感覺好怪, 唔敢合埋口合得太大力(無戴牙箍既時候)…

所以, 要咀嚼係有一定困難… 特別係戴新牙箍頭三日, 門排牙齒超酸軟, 根本連咬斷炒米粉都有困難!

感覺自已越黎越似野獸, 什麼牛扒豬扒雞扒, 都係切細左之後就一口吞下… 雖然仲未胃痛, 但我估都日子不遠矣…

上星期被牙箍刮損了右邊唇內側… 今日, 左邊唇內側又被牙箍刮損了! 唉… 又要痛三日…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (九)

[30.04.2012] – week 3 – aligner (2/46)

戴了牙箍兩星期… 基本上戴和除已經很習慣了… 早已沒有甚麼辛苦感覺, 就只好像重複裝卸一個度身訂造的保護殼一樣, 所有接合位都恰到好處, 輕易地就可以完成…

又或者, 只是牙箍戰敗放跟牙齒的角力? 已經變型或退化? 所以乖乖地貼服在原有的牙形上?

晚上臨睡前, 是換第二個箍的重要時刻…

第一次換箍, 發覺新箍根本不能帶上! 試了差不多五分鐘才可夾硬套上去…

之後, 感覺新箍很有力, 心想, 明早要除應該會很困難…

第二套的牙箍… 感覺上面較有力, 把整棚牙也牢牢箍住, 下面相對就沒太大的感覺…

睡覺的時候, 可能因為頭部躺在枕頭上的關係… 令牙箍壓力變得更加大… 好像金剛圈一樣越箍越緊, 緊得令我遲遲沒法入睡…

可惜, 此刻身旁已經沒人可傾訴…

壓力, 以後只能獨自面對…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (八)

[25.04.2012]

悲傷的日子… 這篇文章本來不應在這裡出現… 可是, 又偏偏跟箍牙存在一點點的關係…

今天, 跟拍拖四年的女友分手了…

對我來說是個很突然, 很沉重的打擊…

箍牙本來是件開心事… 為了那人生大計而實行的計劃… 現在已經沒有了原來意義…

詳細的不說了… 我須要好好冷靜一下…

(待續…)


應該早已沒期待…

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (七)

[23.04.2012]

第一日返工…

為左保持形像, 希望第一次見同事談吐唔失禮… 在公司樓下偷偷搵個位除左牙箍… 先上去report duty…

返工詳情唔講了…

大約九點除箍, 捱到十一點半, 覺得無乜野需要再講, 又偷偷走入廁所戴返個牙箍…

戴到lunch前五分鐘, 又走入廁所除箍出去食飯… 真係好麻煩… 不過, 都係第一日先係咁, 以後睇定啲, 可能去到餐廳先除箍, 就算係十數分鐘, 戴得幾耐得幾耐啦… 始終希望緊守每日戴22個小時規則… 就算唔夠, 都儘量接近22小時…

食完飯, 大約兩點先戴返個箍… 計落即係除左箍成個半鐘… 加埋今朝返工又冇帶成兩個幾鐘… 即係今日遠遠唔達標了!

都無辦法… 唯有下午開始戴足全日…!

下午有機會同同事對話, 我唔知佢地聽唔聽到我痴脷根, 但我自己就肯定覺得勁漏風了! 啲si音c音… 全部都漏晒風… 唉… 形像何存呀?!

同啲同事唔係咁熟… 又無理由無啦啦話人聽自己箍緊牙…

唯有第日搵機會透露下… 希望人地多多體諒…

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (六)

[20.04.2012]

箍牙的第五日, 基本上已漸漸習慣箍牙生活, 每日定時除箍進食, 刷牙潄口用牙線… 成為例牌動作…

不過, 在第五日中午左右, 感覺到下唇內側好像給牙箍的膠邊刮損了… 可能上一晚同朋友食飯暢談得太興奮, 說話太多, 令牙箍跟下唇內側磨擦太激烈, 不知不覺間刮損了…

後果就係… 現在每次講野都會隱隱作痛…

之前聽朋友講, 佢細個時用鋼箍就成日會刮損口腔, 攪到係咁生飛滋… 佢話用我呢種透明牙箍唔會喎…

其實, 世事邊有絕對丫… 而家咪又係損左! 用手指摸下個牙箍邊, 真係幾利下, 唔明點解invisalign唔將個邊收圓少少…

[21.04.2012]

箍牙的第六日…

每次戴回牙箍前, 我都儘可能用牙擦輕輕清潔牙箍, 先再戴上… 希望保持牙箍清潔, 及戴上去時比較清新…

但當晚正在洗擦牙箍時… 啪的一聲, 聽到硊裂既聲音, 大吃一驚… 仲以為個牙箍斷左…

檢查之下, 原來在上排牙箍門牙位的內側裂開了… 裂口好細, 大約1mm左右, 輕輕按時會啪喇啪喇咁響, 真係好得人驚… 驚再試多兩下會一直裂落去, 成個牙箍分成兩節…

今日只係第六日, 個牙箍仲要戴多八日! 以後真係要好小心… 我唔想第一個箍就要返廠! 以後仲有45個箍要戴, 點捱呀?

不過… 雖然個箍裂左, 戴落又好似冇乜問題咁… 希望佢頂得到八日後換箍啦…

[22.04.2012]

箍牙的第七日… 亦係我漫長待業假期既最後一個休息日… 因為收到offer了! 聽日就返工了…

唔知戴住個牙箍點同同事傾計… 但係希望唔會有障礙啦, 我唔希望啲同事第一個印像以為我係痴脷根…

總結七日, 每日最開心既時間, 就係進食既時候, 因為可以除低個箍, 真係一種解脫黎…

唔駛被個牙箍鎖住, 又可以食野, 簡直係雙重享受!

(待續…)

男人四十先箍牙,一圓兒時心願。 如對內容有意見, 歡迎留言或聯絡我:

男人四十先箍牙 (五)

女朋友公事繁忙, 今晚又唔可以陪我食飯, 所以我既最後大餐要一個人食…

我揀左平常最喜愛既垃圾食物做大餐… 就係麥當勞…

大餐叫左麥樂雞餐+脆香雞翼+雙牛芝堡, 最後真係飽到塞唔入… 仲有少少想嘔既感覺, 不過無所謂, 就算幾唔健康都好, 以後兩年… 食量一定會大減, 以前肥左既都會十倍瘦返…

聽從護士既忠告, 飽餐後徹底擦左牙, 用牙線, 仲用埋潄口水清潔牙齒, 正式戴上金剛圈…

帶左之後, 感覺兩個箍好有力, 將啲牙緊緊套住… 但不致於痛… 之前在網上爬過唔少文, 有啲人未習慣話會痛… 我就唔覺痛, 只係感覺到有股力在口腔內… 一邊睇住電視, 好快仲習慣左添…

女朋友夜晚返到黎, 傾左陣計, 佢竟然無發覺我帶左牙箍…

實情係, 我從睇醫生, 倒模, 直至戴箍, 我都冇話過俾佢知… 想俾個意外驚喜佢, 點知… 透明牙箍原來真係咁勁, 連身邊最親既人都唔發覺…

不過, 一開口, 我自己就即時有痴脷根既感覺… 好多發音自己都覺得古怪… 例如啲c音, s音之類… 可能因為上下排牙因為扣左箍, 合唔埋, 所以發啲sssss音就漏晒風…

結果, 全晚佢都竟然冇發覺…

[17.04.2012]

第朝起身, 帶左成晚箍, 第一次除箍刷牙… 嘩! 感覺前排棚牙好酸軟… 除箍既時候, 感覺就好似監生拔啲牙出黎咁, 個心真係好驚一拔就連啲牙都拔埋出黎… 最後, 當然無事… 但刷牙時候, 真係一刷一驚心, 因為刷牙時一接觸到前排牙齒, 立即有酸軟感覺… 啲感覺, 就好似幾十年前換牙時候咁… 酸酸下就甩出黎… 所以咪話唔驚…

啲牙酸軟晒, 連早餐都唔係好想食… 求其丁左個公仔點心食就算…

食野根本無法用到門牙, 只好將食物直接放到口腔內, 用大牙咬…

突然有個感覺, 就係好想戴番個牙箍, 因為無左牙箍既保護, 成日都覺得啲牙好鬆…

早餐後再做戴箍前指定動作(擦牙, 牙線, 潄口), 就戴返個箍了… 戴好之後, 感覺好實在, 好安全…

夜晚同女朋友出街食飯, 飯前先偷偷地除左箍, 飯後又偷偷戴返, 佢依然無感覺到我有咩唔同… 真奇怪, 我講野明明覺得好痴脷根喎… 唔通只係我自己錯覺? 還是平日我覺野本身就痴脷根呢?

夜晚回到屋企, 我終於都忍唔住同佢講左我箍左牙, 佢都好驚奇… 驚奇唔係個箍隱藏得好… 係驚奇我做乜成四十歲人先去箍牙…

我當然冇講箍牙想結婚靚仔啲, 只係話呢個係兒時夢想, 只係三十年後先實踐姐…

(待續…)

男人四十先箍牙,一圓兒時心願。 如對內容有意見, 歡迎留言或聯絡我: